Поранешниот селектор на Македонија, Никола Илиевски-Џиџи на една недела до почетокот на пролетниот дел од шампионатот на Македонија, седнува на кормилото на Вардар. Во обид да се пронајде спас на сезоната, Џиџи доаѓа во Вардар каде веќе од денеска ќе ги започне подготовките со преостанатиот тим кој го има на располагање за вториот дел од сезоната. Илиевски ќе биде именуван за нов тренер на екипата, а ќе му асистираат Бобан Грнчаров, Златко Таневски и Никола Глигоров. Вардар во првиот дел од сезоната финишираше на петтото место на табелата со 25 освоени бода.

Тимо Вернер има големи проблеми оваа сезона, Челзи летоска го плати 53 милиони евра и требаше да биде еден од ударните играчи на оваа млада и талентирана екипа. Сепак, германецот барем досега не ги оправда очекувањата. Во 21 лигашки настап сезонава има само четири погодоци, а највпечатлив дел од неговата досегашна кариера во Англија се бројните промашувања и лошите игри, поради што навивачите и медиуите се прашуваат дали неговото доведување беше вистинско промашување. Лошата форма на Челзи со отказ ја плати Френк Лампард, а новиот тренер Томас Тухел прави се да го врати Вернер во живот. Се појави видео на социјалните мрежи кое ги воодушеви навивачите на Челзи. На снимката од тренинг се гледа како Вернер постигнува погодок, а целата екипа му аплаудира и го охрабрува, обидувајќи се на тој начин да изрази поддршка во овие тешки голгетерски моменти за германецот.

Натпреварот на РБ Лајпциг од осминафиналето од Лигата на шампионите против Ливерпул на 16 февруари нема да биде откажан и ќе се одигра во Будимпешта поради тоа што Германија ги ограничи пристигнувањата од Велика Британија поради пандемијата на ковид- 19. Германската влада ограничи пристигнување од Британија до 17 февруари по појавувањето на новиот сој на вирусот, и правилата на УЕФА беа јасни – Лајпциг ќе загубеше со 0-3 службено доколку мечот не се организираше. Сега УЕФА потврди дека во соработка со двата клуба и со Унгарската фудбалска федерација, мечот ќе се одигра на „Пушкаш арената“ на истиот датум и во истиот термин.

Реал Мадрид минатата сезона за 60 милиони евра го донесе Лука Јовиќ, но српскиот напаѓач разорача, а јасно е дека на „кралевите“ им е потребен напаѓач кој ќе биде наследник на Бензема.
Поради тоа приоритет на Флорентино Перез на лето ќе биде доведување на врвен напаѓач.
Како што пренесуваат шпанските медиуми на врвот на листата желби на „кралевите“ е Ромелу Лукаку.
Белгиецот игра фантастично во дресот на Интер и во Мадрид веруваат дека би можел да биде идеален наследник на Карим Бензема.

Марк Овермарс ќе го напушти директорското место во Ајакс на крајот од сезоната.
Наводно, Овермарс договорил разделба со Ајакс и од лето ќе работи како спортски директор во Барселона. Овермарс е спремен да се врати на Камп Ноу и дека не можел да го одбие предизвикот во Барселона.
Овермарс во Барселона играше од 2000 до 2004 година и само е еден од низата Холанѓани кои оставија голем траг во Каталонија.

Нашиот фудбалски интернационалец, Горан Пандев, со двата гола на вчерашниот меч против Наполи во Серија А и донесе големи три бода на Џенова во трката за опстанок.

Тренерот на неговиот тим, Давиде Балардини, на шега вели дека ќе го тепа Пандев доколку реши да оди во пензија. Македонецот  по дуелот изјави дека планира ја заврши кариерата по Европското првенство, но, меѓу редови ја остави вратата отворена и за уште eдна сезона.

„Со Горан планираме да ни оди добро до крајот на сезоната а потоа ако реши да се пензионира, ќе го тепам, нема да кажам на никој, ама ќе го тепам. Тој се плаши од мене“, прокоментира тренерот на Џенова со насмевка на лицето.

Швеѓанката Косоваре Аслани, која настапува за Реал Мадрид го постигна третиот најбрз хет-трик во историјата на фудбалот, а со истиот ја осигура победата на својата екипа против Валенсија со 3:1.
Таа се запиша на листата на стрелци три пати во само 154 секунди, а головите паднаа во периодот од 66:40 до 69:14. Се започна со погодок од слободен удар.
Потоа, таа освои топка на работ од шеснаесетникот и постигна втор погодок, а третиот гол беше само за да се запечати победата.
Побрзо до хет-трик во историјата од Аслани досега стигнале само Магнус Арвидсон, кој со Хаселхолм во шведската втора лига во 1995. година постигна три гола за 89 секунди, а тука е и Томи Рос, кој во 1964. година постигна хет-трик во дресот на Рос Каунти, а за тоа му требаа 90 секунди.

Eден Азар не се снајде најдобро во Реал Мадрид, но мора да се каже дека и повредите имаат големо влијание. Иако со бројни бонуси беше платен скоро 150 милиони евра лошата форма и повредите не му дозволуваат да ги оправда очекувањата кои навивачите ги имаа од него и сега се шпекулира дека би можел да си замине. Во дел од шпанските и островските медиуми сега се појави информација дека интерес за Азар покажал неговиот поранешен клуб Челзи. Според информациите понудата би изнедувала помеѓу 40 и 50 милиони евра.

Роналд Куман по доаѓањето во Барселона отпиша неколку играчи, а меѓу нив беше и Луис Суарез што за многумина беше изненадување. Уругваецот ја напушти Барселона и игра фантастична сезона во која во овој момент со 14 гола е прв стрелец во Ла Лига, а Атлетико е на добар пат да стигне до титулата. Сега Суарез зборуваше за моментите кога одлучил да си замине. „Куман ме викна и ми кажа дека нема потреба од играч како мене. Го прифатив тоа, но му одговорив дека имам договор и дека ќе тренирам со тимот. Ми беше тешко да ја напуштам Барселона, меѓутоа почувствував дека клубот повеќе неме почитува како претходно“, изјаву Суарез. Суарез во Барселона играше од 2014 до 2020 година.