Пауло Дибала во зимскиот преоден рок би можел да го засили Челзи.

Италијанските медиуми пренесуваат дека лондонскиот клуб е заинтересиран да го доведе Аргентинецот кој во својот договор има клазула од 12 милиони евра која не важи само за клубовите од Серија А.

Дибала во Рома пристигна како слободен играч, па така побара во неговиот договор да има клазула која лесно ќе може некој клуб да ја плати. Клазулата важи до 15-ти јануари, па така Челзи ако е навистина заинтересиран нема многу време.

Маурисио Покетино има пролбеми во нападот, Николас Џексон и Армандо Броја не се на потребното ниво, додека Кристофер Нкуку повторно е повреден и ќе паузира три месеци.

Дибала би можел да биде решение, иако не е класичен напаѓач. За Рома во досегашниот дел од сезоната постигна шест голови и додаде исто толку асистенции на 17 натпревари во сите натпреварувања.

Њукасл го продолжи договорот со централниот дефанзивец на тимот Фабијан Шер. Двете страни се договорија да соработуваат до крајот на сезоната 2024/2025.

„Во овој тим се чувствувам како дома. Се чувствувам многу удобно да живеам во Њукасл, го сакам овој град. Сакам да играм за клубот и да им носам радост на нашите неверојатни навивачи. Не можам да опишам со зборови колку ги сакам и колку ми значи нивната поддршка“, изјави Шер за прес-службата на Њукасл.

Шер игра за англискиот клуб од 2018 година. Оваа сезона, дефанзивецот одигра 28 натпревари во сите натпреварувања, на кои постигна еден гол. Претходниот договор на играчот со сегашниот клуб важеше до крајот на јуни 2024 година. Проценетата цена на фудбалерот, според интернет порталот Трансфермаркт, е 10 милиони евра.

Претходно се дозна за можниот трансфер на играчот од средниот ред на Њукасл, Бруно Гимараеш во ПСЖ.

Англискиот состав Њукасл може да испрати понуда за играчот на Барселона, Рафиња, откако Каталонците најавија дека сакаат да се ослободат од 27-годишниот репрезентативец на „кариоките“.

Рафиња кој беше купен од Лидс во 2022 година за големи 58 милиони евра, за шпанскиот состав одигра 69 натпревари со ефект од 14 голови и 19 асистенции.

Во исто време се појавија шпекулации дека Рафиња е интересен и за екипите од Саудиска Арабија.

Тодор Тодороски, 24-годишниот македонски репрезентативец кој игра на позицијата десен бек, ќе има нов клуб во својата кариера.

Станува збор за романската екипа на Поли Јаши, која моментно е на 14 позиција со 23 бодови. Оваа информација ексклузивно ја пренесува романскиот портал „digisport.ro“, Тодороски потпиша договор на две години со Поли Јаши.

Сезонава имаше само пет настапи во најсилното унгарско фудбалско првенство во дресот на Залаегерсег.

На клупски план беше дел и од скопски Металург, Вардар, Осиек, Шибеник, Раднички Ниш, Серед и Сумгајит.

За најдобрата македонска репрезентација од 2021 година има до сега шест настапи.

Доривал Јуниор е новиот селектор на Бразил, потврди Сао Паоло, клубот со кој искусниот стручњак го раскина договорот.

Нашиот клуб го најавува заминувањето на тренерот Доривал Јуниор, кој побара раскин на договорот за да ја преземе бразилската репрезентација“, беше објавено на сајтот на Сао Паоло. Се очекува официјално соопштение од бразилскиот фудбалски сојуз и објавување на деталите од договорот, кој според медиумите ќе биде потпишан до летото 2026 година.

ФС Бразил го отпушти Фердинанд Диниз поради лошите резултати на тимот во претходните месеци.

По шест одиграни кола во квалификациите за Светското првенство, Бразил освои само седум бода и е на шестото место, последно кое гарантира директна виза за СП во 2026 година.

Доривал Јуниор во својата богата тренерска кариера ги предводеше речиси сите бразилски гиганти – Фламенго, Палмеирас, Сантос, Флуминенсе, Васко де Гама, Крузеиро, Интернационал…

Црногорскиот фудбалер Стефан Савиќ по осум успешни години е пред заминување од Атлетико. Поранешниот играч на Партизан, Манчестер сити и Фиорентина оваа сезона падна во втор план кај тренерот Чоло Симеоне и одигра само 972 минути во сите натпреварувања.

Турските медиуми пишуваат дека Фенербахче инсистира на трансферот на официјално најдобриот црногорскиот фудббалер во 2023 година.

Дека Атлетико е подготвен да се раздели со Савиќ покажува и податокот дека клубот за него нема да бара обесштетување.

Кардиф, кој се натпреварува во Чемпионшип, би можел да биде нова дестинација на македонскиот репрезентативец Енис Барди.

Како што стојат работите, Барди оваа зима најверојатно ќе го напушти Трабзонспор со оглед на тоа дека е ставен на трансфер листата.

Опцијата која се споменува во турските и островските медиуми е дека Кардиф ќе го доведе Барди на позајмица до крајот на сезоната, но не е познато дали би постоела клазула за обврска за откуп.Во овој момент тренер на Кардиф е турскиот стратег Ерол Булут.

Се поврзуваше Барди и со Унион Берлин од Бундеслигата, но од тоа веројатно нема да има ништо.

Фенербахче е во напредни преговори со  напаѓачот на Манчестер Јунајтед, Антони Марсијал, кој е на излезна врата од „Олд Трафорд“.

Французинот минатото лето се врати на „Олд Трафорд“ после позајмицата во Севиља, но не добива голема минутажа кај Тен Хаг.

„Црвените ѓаволи“ се спремни да го продадат во јануари, а Фенербахче испратил понуда од 7 милиони евра.

Марсијал веќе дал зелено светло за трансферот, а двата клуба се во напредни преговори и се очекува наскоро да постигнат договор.

Наполи го објави трансферот на дефанзивецот на Салернитана, Пасквал Мацоки.

Оваа сезона 28-годишниот фудбалер одигра 18 натпревари во италијанското првенство без да постигне гол. Авторитетниот онлајн портал Трансфермаркт ја проценува пазарната вредност на Мацоки на 4 милиони евра.

Мацоки потекнува од екипата на Верона. Фудбалерот играше за Салернитана од 2022 година. Италијанскиот дефанзивец претходно во својата кариера настапуваше за тимови како Парма, Перуџа, Венеција и Римини. 

По 18 кола во Серија А оваа сезона, Наполи е на осмото место на табелата со 28 бодови. Во следниот натпревар од домашното првенство, Наполитанците ќе играат на гости кај Торино.

Манчестер Јунајтед е заинтересиран за потписот на дефанзивецот на Џирона, Мигел Гутиерез, објави весникот „Сан“. 

Според истиот извор, во изминатите неколку недели, скаутите на „црвените ѓаволи“ постојано присуствувале на натпреварите на Џирона на кои учествувал 22-годишниот фудбалер. 

Се нагласува дека Манчестер Јунајтед сериозно ја разгледува опцијата да го придобие Гутиерез во текот на актуелниот преоден рок. На Манчестер Јунајтед му треба засилување на позицијата лев бек откако Серхио Регилон го напушти клубот.

Да потсетиме, оваа сезона дефанзивецот на Џирона учествуваше на 20 натпревари на сите турнири, на кои постигна еден гол и три асистенции. Актуелниот договор на играчот со клубот е до летото 2027 година. Според информациите објавени на порталот Трансфермаркт, пазарната вредност на фудбалерот е 20 милиони евра.