Ливерпул ги започна првичните разговори со Доминк Собослај за нов, долгорочен договор, поради неговите извонредни настапи оваа сезона. Унгарскиот ас е меѓу клучните играчи во тимот на Арне Слот и се наметна како еден од најконзистентните фудбалери во клубот, и покрај катастрофалната форма на тимот.

Иако преговорите се сè уште во рана фаза, постои позитивен напредок меѓу клубот и претставниците на Собослај. Ливерпул сака да го задржи играчот долгорочно со подобрени услови и продолжување на сегашниот договор, кој важи до 2028 година.

Заедно со Рајан Гравенберх, Собослај се смета за централен дел од иднината на клубот. Ливерпул сака да избегне евентуални интереси од други европски гиганти и да го награди неговото влијание, лидерство и техничка зрелост.

Собослај оваа сезона ја има одиграно секоја минута во Премиер лигата и Лигата на шампионите, има постигнато 2 гола и запишано 5 асистенции. Неговата постојаност и високо ниво на игра ја зајакнаа решеноста на клубот што поскоро да го финализира новиот договор. Потврда дека Унгарецот е еден од највредните адути на Ливерпул оваа сезона.

Хери Мегваер доживеа повреда на задната ложа за време на натпреварот меѓу Манчестер Јунајтед и Тотенхем, кој заврши 2-2. Капитенот на англиската репрезентација беше заменет во 72-та минута од мечот, кога на негово место влезе Лени Јоро. Мегваер, кој неодамна се врати во составот по претходна повреда, доби медицинска помош на теренот, но не можеше да продолжи со игра.

Ова е нов удар за Јунајтед, кој го продолжи својот низ на натпревари без пораз, но повторно остана без клучен дефанзивец. Тимот водеше со 1-0 речиси цел натпревар, но по излегувањето на Мегваер предноста се стопи. Тотенхем израмни, а во судиското продолжение Матијс де Лихт со удар со глава му донесе бод на Јунајтед.

Дополнителен проблем за „црвените ѓаволи“ беше и повредата на Бенџамин Шешко, поради која тимот мечот го заврши со играч помалку.

Повредата на Мегваер доаѓа во незгоден момент, бидејќи искусниот стопер беше еден од најстабилните играчи во дефанзивата оваа сезона. Од клубот ќе ја проценат сериозноста на повредата и времето потребно за негово заздравување.

Манчестер Јунајтед по репрезентативната пауза го пречекува Евертон на „Олд Трафорд“ и ќе се надева дека англичанецот ќе биде подготвен за настап. Фановите со нетрпение ќе ги очекуваат новостите за неговата состојба и можноста за брзо враќање на теренот.

Фудбалерот на Челзи и аргентински репрезентативец, Ензо Фернандез, објави дека нема да биде на располагање за националниот тим поради проблем со коленото што го мачи последните четири месеци.

Фернандез откри дека се бори со коскен едем на коленото, состојба што се влошила поради големиот број натпревари и недостигот од одмор. По консултација со медицинскиот тим на Аргентина и селекторот, заеднички било одлучено тој да направи пауза за да се опорави за време на паузата.

„Се носев со оваа болка уште од почетокот на сезоната, но со толку многу натпревари немав време за одмор. Болката стана посилна, па решивме дека најдобро е да запрам две недели. Најважно е да бидам подготвен за битните делови од сезоната и тоа го направив во согласност со докторите,“ изјави 24-годишниот играч.

Одлуката се смета за превентивна, со цел да се избегне поголема повреда пред важните мечеви, вклучувајќи ја „Финалисимата“ против Шпанија.

Лионел Меси достигна неверојатен рекорд, 400 асистенции во својата професионална кариера. Историскиот момент се случи во доминантната победа на Интер Мајами со 4:0 над Нешвил во плејофот на МЛС, каде што Аргентинецот постигна 2 гола и запиша 1 асистенција.

Меси беше двигателот на секоја акција на тимот. Тој го отвори резултатот рано во натпреварот, а пред полувремето го зголеми водството со својот втор погодок. Во финишот на мечот, со прецизна додава, му асистираше на Тадео Аљенде за четвртиот гол, токму тој пас ја означи неговата 400-та асистенција во кариерата. Со ова, Интер Мајами обезбеди место во полуфиналето на Источната конференција, првпат во историјата на клубот.

Во текот на својата блескава кариера, Меси има 303 асистенции со Барселона, 35 со Пари Сен Жермен, 39 со Интер Мајами и 63 со репрезентацијата на Аргентина. Освен што е еден од најдобрите стрелци во историјата на фудбалот, неговата визија и умешност во создавање шанси го прават вистински мајстор на играта, играч кој не само што постигнува, туку и ги прави подобри сите околу себе.

Хулијан Алварез, еден од најистакнатите напаѓачи на денешницата, неодамна проговори за дел од своето детство кој, како што вели, го направил поинаков од многумина негови соиграчи. Во неодамнешно интервју, тој се потсети на советот што му го давал татко му уште од најрана возраст: „Нема тетоважи, нема цигари, нема алкохол.“
Тие зборови, признава Алварез, станале негово животно начело.

Кога бил запрашан за своето необично „чисто“ тело, нешто што особено се забележува за време на собирите на аргентинската репрезентација, каде што бил „единствениот без тетоважи“, Алварез истакна дека тоа не е бунт против трендот, туку личен избор.
„Едноставно, се чувствувам пријатно во својата кожа,“ рече со насмевка.

Алварез објаснува дека правилата на татко му не биле строги забрани, туку начин да го научи на фокус и здрав животен стил. Денес, иако живее под постојано медиумско внимание, тој и понатаму ги следи тие вредности.
Неговата дисциплина надвор од теренот се претвора во мир и концентрација на теренот, клучни фактори за неговата форма и конзистентност.

Аргентинецот моментално е меѓу најдобрите играчи во тимот на Диего Симеоне. Со 9 голови и 5 асистенции на 18 натпревари за Атлетико Мадрид оваа сезона, Алварез стана еден од најопасните напаѓачи во Ла Лига и Лигата на шампионите.
Неговата комбинација од посветеност, скромност и талент го претвораат во фудбалер со ретка ментална сила, и во играч чија приказна штотуку почнува да се пишува.

По летниот трансфер од Челси во Ал Наср, Жоао Феликс направи вистински бум во Саудиската Про лига. Португалецот брзо се наметна како прв стрелец на првенството со 10 погодоци, а во сите натпреварувања има вкупно 14 голови и 3 асистенции. Вкупно 17 директни учества во 16 настапи, што најдобро ја отсликува неговата влијателност.

Оваа форма претставува ново поглавје во кариерата на 26-годишниот напаѓач, кој по тешкиот престој во Челси и кратката епизода во Милан конечно најде средина каде што може да го покаже својот потенцијал. Под водство на португалскиот стратег Хорхе Хезус и во тим со Кристијано Роналдо, Феликс брзо се прилагоди на новата лига и средина.

Неговите досегашни настапи го вратија оптимизмот и му донесоа признание како еден од клучните играчи во борбата на Ал Наср за титулата. За Феликс, ова е повеќе од обична промена на клуб, тоа е вистински „нов почеток“, можност повторно да ужива во фудбалот и да ја потврди својата класа.

На 9 ноември 2025 година, Пеп Гардиола стигна до еден од најимпресивните подвизи во својата блескава кариера, ја предводеше својата екипа по илјадити пат. Јубилејниот натпревар го прослави на најдобар можен начин, со убедлива победа од 3-0 против Ливерпул.

Екипата на Гардиола уште еднаш покажа зошто многумина го сметаат за еден од најголемите фудбалски умови во историјата. Од Барселона, преку Баерн Минхен, па до Манчестер Сити, неговата филозофија за „совршен фудбал“ го промени начинот на кој денес се игра играта.

Во своите 1.000 натпревари, Гардиола има неверојатен рекорд: 716 победи, 156 нерешени и само 128 порази, што претставува процент на успеси од 71,6%, бројка која малкумина можат да ја достигнат.

Со вкупно 40 големи трофеи, тој во просек освојува по еден на секои 25 натпревари. Неговата колекција опфаќа повеќекратни шампионски титули, купови и три триумфи во Лигата на шампионите, симбол на неговата конзистенција и совршенство.

Со овој јубилеј, Гардиола се приклучува на елитното друштво на тренери како Сер Алекс Фергусон и Арсен Венгер. Но, неговото влијание оди подалеку од бројките и трофеите.

Познат по револуционерните тактики и бескомпромисната посветеност на убавата игра, шпанскиот стратег инспирира генерации тренери и ја менува самата суштина на модерниот фудбал.

Додека дебатите за „најголемиот менаџер на сите времиња“ продолжуваат, неговите резултати, рекорди и траен печат во фудбалот му даваат повеќе од силен аргумент.

Клупскиот колега на македонскиот репрезентативец Ељиф Елмас, Скот МекТоминеј се поврзува со трансфер со екипа од Премиер лигата. Шкотскиот репрезентативец минатата сезона го напушти Манчестер Јунајтед и направи трансфер во Наполи. На теренот во дресот на Наполи прикажува одлични игри и неговата форма ги задоволува сите пред сè бројните симпатизери на клубот.

Но, таквиот начин на поддршка во Италија, му создава притисок. Тој живее заедно со својата долгогодишна девојка Камерон Ридинг, но често на улиците знае да биде опкружен од голем број фанови.

МекТоминej ланската сезона беше еден од клучните играчи за освојувањето на титулата со 17 постигнати голови и 7 асистенции на 46 натпревари, а беше прогласен и за најдобар играч на Серија А.

Сезонава има постигнато четири голови со една асистенција на 10 натпревари, но три голови постигна за седум дена (два против ПСВ во Лигата на шампионите и еден против Интер).

Тренерот на Наполи Антонио Конте е задоволен од ефектот на шкотскиот интернационалец, кому договорот со Наполи му трае до јуни 2028 година, а клубот дојде откако за него беа платени 25,7 милиони фунти.

Душан Влаховиќ се најде во фокусот на јавноста откако „Билд“ објави дека Баерн Минхен сериозно е заинтересиран за неговото доведување.

Раководството на германскиот клуб веќе контактирало со Влаховиќ и неговите агенти, а играчот изразил големо воодушевување и јасно дал до знаење дека сака да се пресели во Минхен.

Планот е Влаховиќ да пристигне следното лето, без отштета, бидејќи тогаш му истекува договорот со Јувентус. Дури и ако Хари Кејн остане, Влаховиќ порача дека со задоволство би прифатил улога во Баерн.

Јувентус ова лето се обиде да го продаде Влаховиќ за да поврати дел од вложените 85 милиони евра, колку што плати на Фиорентина во 2022 година, но не успеаја.

Бернардо Силва неодамна даде на знаење дека би можел да го напушти Манчестер Сити по истекот на договорот следното лето, а за него е заинтересиран – Милан.

Раководството на Милан веќе го контактираше Португалецот за да ги открие неговите планови за по завршувањето на сезоната.

Португалскиот играч, кој сè уште не е подготвен за преселба во Саудиска Арабија, има 31 година и јасно е дека може да одработи уште неколку сезони на највисоко ниво.

Милан сака да ја искористи ситуацијата и да го доведе Силва без обештетување на Сан Сиро следното лето.