Откако Жозе Мурињо и официјално беше сменет од тренерското место во Тотенхем, лондонскиот клуб како главен кандидат за функцијата во моментов го има името на 33-годишниот Германец, Јулијан Нагелсман. Стретегот на Лајпциг е отворен за можна соработка со Спарс, но камен на сопнување може да биде отштетата која Тотенхем би ја платила за него, а истата е во висина од 12 милиони евра, колку што бараат челниците на бундеслигашот.

Претседателот на Реал, Флорентино Перез, кој е назначен за нов шеф на новоформираната Европска Супер лига излезе со изјава во врска со контроверзното натпреварување кое предизвика вистински тектонски поместувања во светскиот фудбал. Тој вели дека Суперлигата не е напад врз фудбалот, туку негово неопходно спасување. „Сите велат овие се богати и прават што сакаат – не. Јас не сум сопственик на Реал Мадрид, Реал Мадрид е клуб на членови. Сè што правам е за доброто на фудбалот. Сега го правиме ова за да го спасиме фудбалот, кој е во критична ситуација“, рекол првиот човек на мадридскиот гигант. Според Перез, светските клубови се наоѓаат во финансиски потешкотии поради пандемијата и Суперлигата е еден од потезите кои мора да се преземат.

Манчестер Јунајтед спремил нов договор за Бруно Фернандеш и тоа со двојно поголема плата. Раководството на „црвените ѓаволи“ е подготвено да му ја удвои платата на 26-годишниот Фернандеш, кој со новиот договор би заработувал 200.000 фунти неделно. Причината за ваквата реакција на Јунајтед е интересот кон Фернандеш од страна на Барселона и Реал Мадрид, и намерата на „црвените ѓаволи“ да го задржат Португалецот во своите редови. Фернандез дојде во Манчестер Јунајтед од Спортинг Лисабон во јануари минатата година за 55 милиони евра, и веднаш се етаблираше во клучен играч за „црвените ѓаволи“.

УЕФА одлучи да го одложи крајниот рок до 23 април за градовите Даблин, Минхен и Билбао, кои треба да се изјаснат дали ќе дозволат да има навивачи на трибините додека се играат мечевите на Европското првенство. Според одредени информации, трите града ризикуваат да го загубат правото да бидат домаќини на натпреварите на турнирот. Континеталниот собир требаше да се одржи во изминатата година, но, поради пандемијата со ковид-19, турнирот беше одложен за летото пред нас. Планирано е ЕП да се реализира од 11 јуни до 11 јули во 12 градови – Санкт Петербург, Лондон, Минхен, Баку, Рим, Букурешт, Копенхаген, Амстердам, Билбао, Глазгов, Будимпешта и Даблин.

Британската влада разгледува различни опции за да го спречи почетокот на Европската Суперлига во фудбал, изјави портпаролот на британскиот премиер Борис Џонсон. „Видов голем број предлози што беа изнесени како потенцијални решенија. Разгледуваме голем број можности и премиерот сака да разгледа сè што можеме да сториме за да се осигураме дека тие предлози нема да бидат спроведени како што е предложено“ рече портпаролот. Реакциите доаѓаат откако 12-те најмоќни фудбалски клубови од Англија, Шпанија и Италија објавија дека создаваат Суперлига.

Голманот на Ајакс од Амстердам, Андре Онана е близу до напуштање на клубот. „Преговорите се стопирани. Можеби тој ќе се обиде да замине во јули. Штета е што не го решивме ова прашање“, рече Овермарс. Во февруари, Онана беше суспендиран на една година поради кршење на антидопинг правилото. Оваа сезона, Камерунецот одигра 26 натпревари во сите натпреварувања, прими 22 гола и го сочува својот гол недопрен на девет натпревари. Во март, Трансфермаркт го состави список на највредни фудбалери надвор од најдобрите пет европски лиги. Двајца играчи на Ајакс беа на врвот на списокот: Давид Нерес (36 милиони евра) и Андре Онана (36 милиони евра).

Манчестер Сити планира да му понуди нов договор на својот играч за врска Фил Фоден. Овој 20-годишник оваа сезона има постигнато 13 голови и девет асистенции на 42 натпревари. Според изворот, клубот има намера да го продолжи рокот на договорот на Фоден за две сезони – до летото 2026 година и да ја зголеми за повеќе од тројно платата на играчот – од 30 000 на 100 000 фунти неделно. Фил Фоден го постигна победничкиот гол во реваншот од четвртфиналето во Лигата на шампионите против Борусија Дортмунд. Тој стана вториот фудбалер кој постигнал гол во две четврт-финалиња во Лигата на шампионите на УЕФА пред неговиот 21 роденден. Претходно ова достигнување беше направено од напаѓачот на ПСЖ, Килијан Мбапе. Фоден исто така постави рекорд на голови во Лигата на шампионите за англиски играчи на возраст под 21 година.

Кевин Де Брујне заработи повреда на скочниот зглоб и не можеше да помогне до крајот на средбата со Челзи во полуфиналето на ФА Купот. Белгискиот офанзивец ја напушти играта во 48. минута, кога побара лекарска помош. Според првичните имформации, состојбата на 29- годишникот не е добра. По еден дуел со Н’Голо Канте играчот на Манчестер Сити се пожали на болка во скочниот зглоб, а денес беше објавено дека тој ќе мора да пропушт неколку важни натпревари во претстојниот период. Манчестер Сити се надева дека ќе може да смета на Де Брјне за полуфиналните дуели против ПСЖ во Лигата на шампионите. Претходно екипата од Манчестер ќе треба да ја потврди титулата во Премиер лигата, а потоа ќе игра со Тотенхем во полуфиналето од Лига Купот. Кевин Де Брујне беше надвор од теренот осум натпревари во јануари и февруари. Во тој период неговите соиграчи играа одлично и ги добија сите натпревари, а носители на играта беа Гундоган, Бернардо Силва и Фоден.