Македонскиот напаѓач Илија Несторовски продолжи со одличната форма и втор меч по ред се запиша меѓу стрелците за Славен Белупо, постигнувајќи гол во ремито 1-1 против Истра.

Белупо беше на чекор до победа благодарение на голот на Несторовски во самиот финиш од првиот дел, кога прецизно реализираше пенал.

Гостите ја држеа предноста до длабоко во судиското продолжение, сè до 91. минута, кога Превљак успеа да израмни и да спаси бод за Истра.

Новиот погодок доаѓа само едно коло по неговите два гола во претходното во кое беше избран и во тимот на колото.

Интер Мајами со убедливи 5-1 го победија Њујорк Сити и станаа шампиони во источната конференција, во големото МЛС финале ќе играат против Ванкувер кој со 3-1 славеше на гостувањето кај Сан Диего и триумфираше на Западот.

Меси и соиграчите убедливо го совлдаа Њујорк Сити, Аргентинецот не успеа да даде гол овојпат, запиша една асистенција.

Херој беше Аленде кој даде хет-трик, по еден погодок постигнаа Силвети и Шеговија.

Со овој триумф Интер Мајами ја освои источната конференција, а во големото финале ќе игра против Ванкувер.

Тие со 3-1 славеа кај Сан Диего и ја освоија западната конференција.

Бразилското финале на Копа Либертадорес не ги исполни очекувањата, но донесе голема драма и ескалација на ривалството на реалција Рио – Сао Паоло.

Фламенго е нов првак на Јужна Америка, откако во тактичкото финале во Лима (Перу) го совлада Палмеирас со 1-0 (0-0).

Дуелот не беше допадлив и спектакуларен, но надмудрувањето на двата тренери царуваше. Моментот на одлука се случи на почетокот од вториот дел, кога по корнерот на Уругваецот Де Араскаета, највисоко скокна Данило и ја закова топката во мрежата на Палмеирас (1-0). Палмеирас реагираше, имаше и неколку шанси, но не успеа да се врати во натпреварот.

Ова е четврта јужноамериканска титула за Фламенго, 25-та за бразилските клубови, кои по долга оотрага се изедначија со аргентинските клубови на врвот на вечната листа.

Дури и во играта на бројки Бразил е сега поуспешен со дваесет загубени финалиња, наспроти тринаесет на аргентинските клубови.

Фламенго ќе го претставува континентот на Интерконтиненталниот Куп следниот месец, а веќе има „билет“ и за Светското клупско првенство во 2029 година.

Екипата на Милан со минимални 1-0 го доби дербито со Лацио на „Сан Сиро“ и така барем до утре ќе биде лидер на табелата.

Првото полувреме помина без поголеми возбудувања, со двете екипи внимателни и без сериозни шанси, па на пауза се замина со почетните 0:0.

Клучниот момент дојде веднаш по почетокот на вториот дел. По одлична акција и додавање од Томори, Рафаел Леао одлично се снајде во казнениот простор и стрелаше за 1-0.

Лацио се обиде да се врати во игра, создаде неколку солидни прилики, но Милан успеа да ја задржи контролата и да го сочува минималното водство.

Екипата на Манчестер Сити со голот на Фил Фоден во судиското надополнување стигна до победа од 3-2 против Лидс во 13. коло од Премиер лигата. „Граѓаните“ по првиот дел имаа водство од 2-0 со головите на Фоден и на Јошко Гвардиол, но гостите од Лидс Доминик Калверт-Луин и на Лукас Нмеча стигна до 2-2. Во првата минута од судиското надополнување Фоден со својот втор гол донесе победа за неговата екипа и второ место на табелата зад Арсенал, а пред Челзи.

На другите два дуела одиграни во Премиер лигата: Сандерленд – Борнмут 3:2 и Брентфорд – Барнли 3-1. Вечерва се играат натпреварите: Евертон – Њукасл и Тотенхем – Фулам, а другите натпревари од оваа рунда на програмата се утре (недела).

Европскиот и француски шампион ПСЖ попладнево претрпе пораз во дербито на 14. коло на во францускиот шампионат. Победа од 1-0 на домашен терен постигна Монако.

Стрелец на единствениот гол беше јапонскиот интернационалец Такуми Минамино во 68.минута. Монако последните 10-тина минути ги играше со играч помалку откако капитенот Тило Керер доби црвен картон.

Монако со денешната победа се проби на шестото место на табелата со 23 бодови, а ПСЖ е во опасност да го „испушти“ првото место доколку Олимпик Марсеј или Ленс постигнат победи во ова коло.

Повозрасните љубители на фудбалот сигурно го паметат легендарниот италијански дефанзивец Џанлука Замброта. Фудбалер кој можеше да игра на десен и лев бек, а во Јувентус имаше улога како крило, објави на социјалните мрежи дека повторно бил подложен на операција.

Минатата недела во Болоња му била извршена операција за корекција на варус деформитет, состојба поради која нозете добиваат форма налик на буквата „О“.

Замброта веднаш им се обрати на своите фанови и на Инстаграм. Објави фотографија на која се потпира на штаки, им се заблагодари на сите за поддршката и додаде:

„Полека, но право напред…“. претходно, во јавноста се пишуваше дека докторите се чудат како воопшто успева да оди во таква ситуација.

Операцијата на која беше подложен се нарекува остеотомија. Замброта сам ја објасни на едноставен начин:

„Во пракса, ми ги исправуваат нозете така што ми отсекуваат мали делови од коската погоре и подолу, па ми вградуваат плочки.“

Фудбалскиот клуб Рад би можел да добие сериозен финансиски поттик од Блискиот Исток. Според информациите, Никола Петковиќ успеал да го заинтересира саудискиот принц Бин Абдула Бин Сау за инвестиција од околу шест милиони евра во клубот од Бањица.

Приказната доби тежина откако на адреса на Рад пристигна официјално писмо во кое принцот заедно со соработниците Обед и Абдула Алотаиби и со поддршка на Петковиќ го потврдува интересот за почеток на преговори.

„Со ова писмо, го изразуваме нашиот формален интерес за потенцијални инвестиции во фудбалскиот клуб Рад од Белград. Во овој стратешки договор, со нас како партнери се господата Обед и Абдула Алотаиби, како и г-дин Никола Петковиќ. Го признаваме историското наследство на клубот и гледаме силен потенцијал за негов развој. За правилно да ја процениме оваа можност, ве молиме да ни дадете точни информации за финансиската состојба, оперативните обврски и идните планови. По приемот на овие информации, подготвени сме да започнеме официјални преговори“ стои во писмото.

Рад сезонава настапува во Првата белградска лига група Ц, петти ранг на фудбалот во Србија и по тринаесет кола се наоѓа на првото место.

Фудбалерите на Пелистер и Македонија Ѓорче Петров го поделија пленот во Битола, откако во еден возбудлив натпревар, исполнет со многу шанси на двете страни, одиграа нерешено 1-1.

Натпреварот започна динамично, со брза размена на закани. На почетокот, Еступијан имаше шанса за домашниот тим, додека од спротивната страна, Керим се закани кон голот на Пелистер, но и двајцата беа спречени од сигурните голмани.

Гостите од Ѓорче Петров први дојдоа до водство во првата посериозна акција.

Гостите стигнаа до водство од 0-1 по големата грешка на домашниот голман Андреј Јовчевски во 22. минута, гол кој на крајот му беше препишан на Христијан Пецов

Веднаш по водството, Пелистер тргна кон израмнување. Петковски имаше обид кој заврши покрај голот, а потоа на сцена стапи Лука Булатовиќ. Тој имаше дури три шанси за гол во првото полувреме, но во сите нив, голманската мрежа ја спаси гостинскиот чувар Јанков.

Второто полувреме започна со притисок од Македонија ЃП. Гостите имаа три обиди, а најопасен беше шутот на Мартиновски од 16 метри, но голманот на Пелистер, Јовчевски, беше сигурен.

Клучниот момент за Пелистер се случи во првиот конкретен напад во вториот дел, кога конечно беше пробиена одбраната на гостите. Стрелец на израмнувачкиот гол за 1-1 беше напаѓачот Лука Булатовиќ, кој успеа да ја материјализира една од своите бројни шанси.

По израмнувањето, возбудувањата продолжија, а следуваше период на погодени рамки од голот. Во 70. минута, Стоиловиќ од Македонија ЃП ја погоди стативата, а само неколку минути подоцна, Ристовски од Пелистер одговори со погодена греда.

Во завршницата, Стефан Спировски имаше два обиди (во 83. и 85. минута) кон голот на Јанков, но без промена на резултатот. Последната шанса на мечот му припадна на Стоилов од слободен удар, но топката беше запрена од сигурниот Јовчевски.

Со конечниот резултат 1-1, двата тима освоија по еден бод во оваа интересна пресметка.

Македонската женска фудбалска репрезентација до 19 години ја запиша втората победа на квалификацискиот турнир (Рунда 1, Група Б5) за Европското првенство на УЕФА, совладувајќи ја селекцијата на Азербејџан со 3-1.

Нашиот национален тим доминираше во текот на целиот натпревар. Калина Попоски го отвори резултатот во 19. минута по одлично изработена акција, а предноста ја зголеми Теона Галабовска во 27. минута од пенал. Галабовска беше стрелец и на третиот погодок, во 49. минута, со што ја заокружи одличната партија.

Гостинската селекција успеа да намали преку Јуругова во 35. минута, но немаше сила за целосен пресврт.

Македонија со овој триумф прави значаен чекор напред во квалификациската кампања и го најавува решавачкиот меч против Словенија од последното коло.