Раководството на Ливерпул ја одредило цената на Ибрахима Конате, чиј договор со клубот истекува следната година.

Според „Ас“ од Мерсисајд бараат 50 милиони евра за Французинот. Централниот дефанзивец за сега одбива да го продолжи договорот, бидејќи според медиумите во Шпанија, одлучил да направи нешто слично на она што го направи Трент Александар Арнолд.

Имено, да го чека истекот на договорот и да премине во Реал Мадрид како слободен агент.

Се појавија информации дека кралскиот клуб може да се обиде да го ангажира Конате уште ова лето. Токму поради тоа, Ливерпул ја постави оваа цена на 26-годишниот Французин. Според „Ас“ на „Енфилд“ се категорични дека или оваа сума ќе биде платена, или Конате ќе остане до истекот на неговиот договор. Изворот тврди дека во Реал се подготвени да платат меѓу 20 и 25 милиони евра, но не и повеќе.

Баерн Минхен имаше големи планови со Жоао Пальиња кога го доведе пред една година од Фулам за отштета од дури 51.000.000 евра, но ова лето можеби ќе следува раскин.

Репрезентот на Португалија не се истакна во Баварија, има одиграно 25 натпревари, но со ограничена минутажа, делумно и поради проблеми со повреди, па сега се зборува сè погласно за неговото заминување од клубот.

Баерн наводно е спремен да се раздели со него за 25.000.000 евра, интерес покажаа Тотенхем и Астон Вила, а сега погласно се зборува за Интер како потенцијална дестинација на Пальиња.

„Нероазурите” започнаа нов проект со тренерот Кристијан Киву кој сака да ја зајакне конкуренцијата во средниот ред, а наводно профилот на 31-годишниот Португалец се вклопува во ваква замисла.

Барселона се подготвува за разделба со тројца играчи пред почетокот на нивната азиска турнеја. Во рок од една недела, Каталонците сакаат да ги раскинат договорите со играчот од средниот ред Ориол Ромеу и голманот Инаки Пења, како и да го продадат напаѓачот Пау Виктор.

Ромеу и Пења имаат уште една година од договорите, а доколку бидат раскинати предвреме, ќе добијат дел од преостанатата плата. Играчот од средниот ред е баран од клубови од Ла Лига, вклучувајќи ја и Џирона, каде што Ромеу играше како позајмен минатата сезона. Пења има понуди од странски клубови, но голманот би сакал да остане во Ла Лига.

Барса е подготвена да го продаде Виктор за 10 милиони евра или половина од неговите права за 5 милиони со опција за откуп. Според изворот, можно е напаѓачот да замине на турнејата со тимот, но неговата иднина не е во Барселона.

Федерико Валверде е играчот со најмногу минути во изминатата сезона во Европа. Фудбалерот од средниот ред на Реал Мадрид одигра 72 натпревари за „белите“ и за селекцијата на Уругвај.

Тој помина 6.116 минути на теренот. На второто место на ранг-листата е Бруно Фернандеш. Играчот од средниот ред на Манчестер Јунајтед и репрезентацијата на Португалија има 5.796 минути игра на 66 натпревари.

Трет на листата е голманот на Милан и на репрезентацијата на Франција, Мајк Мањан, со 5624 минути на 63 средби.

Барселона го идентификуваше крилниот напаѓач на Баерн Минхен и на шпанската репрезентација, Брајан Сарагоса, како реална опција за засилување според вредноста на трансфер-пазарот.

23-годишниот Шпанец ја помина последната сезона на позајмица во Осасуна. Таму на 28 натпревари имаше еден гол и шест асистенции. Тој постигна еден гол и за шпанската репрезентација.

Тековниот договор со германскиот клуб му е до летото во 2029-та. Неговиот трансфер вреди 12 милиони евра.

Хесус Ваљехо и официјално ја затвори страницата во Реал Мадрид. 28-годишниот дефанзивец потпиша со шпанскиот второлигаш Албасете.

Стоперот пристигна во Мадрид уште во 2015 година од редовите на Зарагоза, но за цели десет години запиша само 35 настапи и најчесто беше испраќан на позајмица. Во кариерата настапуваше уште за Ајнтрахт Франкфурт, Зарагоза, Вулверхемптон и Гранада, а сега добива нов предизвик со Албасете.

Иако немаше голема улога, Ваљехо собра богата колекција на трофеи: два пехари во Лигата на шампионите, три на Светското клупско првенство, по еден во Ла Лига, Купот на Кралот, Суперкупот на Шпанија и УЕФА Суперкупот.

Фудбалерите на Шкендија по продолженија се изборија за пласман во второто коло од квалификациите за Лигата на шампионите откако вечерва со 2-1 беа подобри од велшки ТНС.

Допатува ТНС во Скопје со ремито од 0-0 во првот натпревар, а Шкендија денеска го отвори резултатот во 18-тата минута.

Тамба се најде на вистинското место и ја смести топката во мрежата по една мајсторија на искусниот Бесарт Ибраими кој знаеше како да го пронајде во шенаесетникот. Иако гостинскиот состав немаше премногу шанси, сепак по една грешка на дефанзивецот на тетовскиот клуб, Фетаи Вилијамс во 38-та минута израмни на 1-1.

Во второто полувреме Шкендија имаше иницијатива, но без посериозни прилики, па така и по 90 минути немаше победник.

Моментот на одлука се случи во 116 минута кога Ибраими одново одигра важна улога и токму по еден негов удар од далечина топката дојде до Адеми кој ја упати во петерецот од каде што Боехам си ја погоди сопствената мрежа.

Во следното коло Шкендија ја чека потежок предизвик против романката Стеауа.

Манчестер Сити потпиша нов договор со производителот на спортска опрема Puma во вредност од неверојатни 1.18 милијарди евра. Со овој договор, соработката продолжува барем до 2035 година, а годишната вредност на договорот се зголемува на 118 милиони евра, што е значително зголемување во однос на досегашните 77 милиони евра годишно.

Според „Гардијан“, ова е рекорден договор за еден клуб од Премиер лигата, највисокиот ранг на англискиот фудбал, на годишно ниво. За споредба, Манчестер Јунајтед во 2023 година потпиша десетгодишен договор со Adidas вреден околу 1.06 милијарди евра, додека Ливерпул има договор вреден 71 милион евра по сезона.

Откако партнерството со Puma започна во 2019 година, тимот на Пеп Гвардиола освои четири титули во Премиер лигата и стана втората англиска екипа во историјата што ја освоила тројната круна. Претставникот на Сити, Феран Сориано, не го криеше задоволството.

„Се здруживме со Puma со амбиција да се предизвикаме себеси и да ги надминеме очекувањата. Тоа и го постигнавме во изминатите шест сезони“, изјави Сориано. „Денешното обновување го зацврстува нашиот однос и го проектира во уште посветла иднина“, додаде тој, како што пренесува „Гардијан“.

Неколку извори од „островото“ објавија дека Ливерпул отворил преговори со Њукасл за трансфер на Александер Исак, се шпекулира дека „црвените“ се подготвени да го соборат рекордот на Премиерлигата и да платат околу 120 милиони фунти.

Арне Слот сака ова лето да донесе нов напаѓач, изминатиов период Ливерпул се поврзуваше со неколку имиња, а последните информации велат дека клубот од Енфилд отворил преговори со Њукасл за трансфер на Александер Исак.

Веста прв ја објави добро упатениот новинар Фабрицио Романо, а истото потоа го потврдија уште неколку други извори.

„Црвените“ се подготвени втор пат ова лето да го соборат рекордот на Премиерлигата, а како што пишуваат Дејвид Орнштајн и Бен Џејкобс, сумата која се подготвени да ја платат е 120 милиони фунти.

Останува да се види каков потег ќе повлече Њукасл, изминатиов период често се говореше дека Швеѓанецот нема да биде продаден.

Интересно, една од опциите на Ливерпул за засилување на нападот е Уго Екитике, кој денеска беше поврзан со трансфер токму во Њукасл во зделка вредна рекордни 80 милиони евра за популарните „свраки“.

Машкиот шампион на Македонија, Струмица 47&72 ќе се соочи со романскиот првак Динамо Букурешт во првата рунда во ЦЕВ Лигата на шампионите. На денешната ждрепка во Луксембург струмичани го добија најтрофејниот романски клуб за нивни ривал на стартот на новата елитна сезона.

Првиот натпревар Струмица го игра на домашен терен, 21/23 октомври, додека реваншот е една седмица подоцна во Букурешт (28/30 октомври).

Женскиот првак Јанта Волеј Кисела Вода, пак, во најелитното европско клупско натпреварување ќе дебитира во втората рунда, каде на денешната ждрепка за противник го доби претставникот на БиХ, Гацко. Со трикратниот шампион во низа на БиХ, тимот на Јанта ќе игра во термините – 21/23 октомври пред домашната публика, односно на гости во Гацка 28/30 октомври.

Тројцата македонски претставници во третиот по квалитет европски клупски куп, Челинџ купот во новата сезона, Штип УГД во машка конкуренција, односно Наковски Волеј и Работнички Скопје кај дамите, попладнево на ждрепката во Луксембург ги добија противниците.

Штип УГД во првото коло ќе има далечно гостување кај норвешкиот клуб Кол ИЛ од Осло. Првиот натпревар освојувачот на Купот го игра на гости, 11/13 ноември, додека реваншот го игра дома една недела подоцна 18/20 ноември.

Кај дамите Наковски Волеј како освојувач на Купот беше сместен меѓу носителите и на стартот на натпреварувањето ќе се соочи со ТЈ Острова од Чешка. Првиот меч девојките на Наковски го играат 28/30 октомври, додека реваншот е 4/6 ноември.

Работнички Скопје, кој со вајлд-карта доби право за учество во Челинџ купот, ќе игра против дебитантот Рае Спортдикол Властон од Естонија. Во истите термини како и Наковски Волеј, играат и одбојкарките на Работнички, но разликата е што првиот меч го играат дома (28/30.10) додека вториот дуел го играат на гости (4/6.11).