Менаџерот на Барселона, Ханси Флик, јавно ја критикуваше шпанската репрезентација за, како што вели, невнимателен пристап кон здравјето на Ламин Јамал за време на репрезентативната пауза. Младиот крилен напаѓач се врати во клубот со повреда, што го натера Флик да изрази големо незадоволство за начинот на кој Шпанија се однесувала кон еден од нејзините најталентирани играчи. 

Според Флик, Јамал настапил на двата натпревари на Шпанија и покрај тоа што чувствувал болка. Тој не тренирал меѓу натпреварите поради непријатноста, но сепак добил лекови против болка и играл 79 и 73 минути во мечеви во кои Шпанија веќе имала убедлива предност. Флик го оцени ова како недостиг на грижа за здравјето на фудбалерот, особено со оглед на неговите години и потенцијал. 

Од Шпанската Фудбалска Федерација веднаш реагираа, објаснувајќи дека првичните лекарски прегледи не покажале никакви проблеми. Дополнително, тие наведоа дека од Барселона не добиле никакви информации за можно оштетување кај Јамал. Сепак, тензиите меѓу двете страни растат, особено поради ограничената директна комуникација меѓу Флик и селекторот на Шпанија, Луис де ла Фуенте. 

Флик потенцираше дека заштитата на играчите, особено на младите ѕвезди, мора да биде приоритет и повика на подобра соработка меѓу клубовите и националните тимови во иднина. 

Реал Мадрид се подготвува да поднесе детален извештај до ФИФА во кој ќе бидат истакнати низа контроверзни судиски одлуки во шпанскиот фудбал. Документот, кој беше најавен на „Real Madrid TV“, ги опфаќа настаните од оваа и претходната сезона, кои клубот смета дека ја нарушиле правичноста на натпреварувањето во Ла Лига. 

Сè поголемата загриженост поради, како што велат од клубот, неконзистентно и сомнително судење, ги натерала да побараат меѓународна реакција. Со вклучување на ФИФА, Реал Мадрид се надева дека ќе поттикне транспарентност, одговорност и потенцијални реформи во начинот на кој се судат натпреварите во Шпанија. 

Доколку ФИФА го сфати извештајот сериозно, можно е да започне поширока истрага за судиските практики во шпанските натпреварувања. 

Арсенал прави значителен напредок во преговорите за нови договори со Букајо Сака и Вилијам Салиба, откако клубот поднесе освежени понуди за да ја обезбеди иднината на двајцата клучни фудбалери. 

Извори блиски до преговорите велат дека и двајцата играчи сакаат да останат на Емиратите, а разговорите се одвиваат во позитивна насока. Од клубот изразуваат оптимизам дека договорите ќе бидат наскоро финализирани, со оглед на тоа што остануваат само неколку ситни детали. 

Оваа иницијатива на Арсенал е дел од пошироката стратегија да се задржат младите ѕвезди кои имаат клучна улога во неодамнешниот подем на тимот и во неговите идни планови. 

Взаемната желба за продолжување на соработката е добар сигнал за брза завршница, додека клубот се стреми кон стабилност и континуитет, и на теренот и надвор од него. 

Реорганизацијата во Челзи под водство на Ензо Мареска продолжува со контроверзии, при што Рахим Стерлинг и Аксел Дисаси се целосно отфрлени од тимот. И двајцата моментално тренираат одвоено од првата екипа, што укажува на долгорочна, а не привремена одлука. 

Дисаси и Стерлинг имаат различни термини за тренинг и тренираат на различен терен од остатокот на тимот. Ова не е последица на повреда или медицински причини, туку е дел од стратегијата за нивно отстранување од активниот состав. 

Од август, двајцата не се дел од активностите на првиот тим, ниту се вклучени во плановите на клубот. Се работи за јасна одлука, тие веќе не се дел од проектот на Челзи. 

Ситуацијата се влоши по нивното одбивање да заминат од клубот за време на летниот преоден рок. Со високи плати и долгорочни договори, Челзи сега ќе мора повторно да бара решенија за нивно заминување, можеби дури во јанурари. 

Летниот трансфер период заврши на Островот, но Челзи веќе размислува за иднината и следната година, а сега англиските медиуми открија дел од плановите.

Во повеќето европски лиги заврши летниот трансфер период и сè е јасно во однос на играчките состави.

Еден од најактивните клубови на Островот во врска со трансферот пазар беше лондонскиот Челзи.

На Стамфорд Бриџ, меѓу другите, пристигнаа Алехандро Гарначо, Жоао Педро, Џејми Гитенс, Лиам Делап, Џарел Хато…

Сините значително се засилија ова лето и шефот на стручниот штаб – Енцо Мареска доби целосна поддршка од управата.

Сега, англиските медиуми, поточно “TBRFootball” откриваат одредени планови што ги имаат лондонските Сини.

Имено, според овој извор – Челзи следното лето ќе се потруди да донесе два играчи, и тоа се Марк Геји и Мајк Мањан.

Фудбалерите на Милан ја совладаа Болоња со 1:0 во третото коло од Серија А. Единствениот гол на натпреварот го постигна Лука Модриќ за кого ова беше прв погодок во дресот на новиот клуб.

Модриќ во второто коло oд Серија А запиша прва асистенција за тимот на Милан, кога во погодок ја претвори Рубен Лофтус-Чик, а со вечерашниот гол остави својот печат во новите страници на италијанското првенство.

Капитенот на хрватската репрезентација стана најстариот играч од средниот ред кој постигнал гол во историјата на италијанското фудбалско првенство. Модриќ постигна гол на 40 години и пет дена, додека претходниот рекорд го држеше поранешниот играч на Милан, Нилс Лидхолм, кој на 26 март 1961 година постигнал погодок против Интер на 38 години и 169 дена.

Менаџерот на Манчестер Јунајтед, Рубен Аморим, по поразот на неговата екипа со 3-0 од градскиот ривал Манчестер Сити, изјави дека нема намера да го менува стилот на игра на тимот, и покрај постојаните критики.

Тој беше категоричен дека ако клубот сака промена во својата филозофија, ќе мора да го сменат него, а не тој самиот да се смени.

Поразот од градскиот ривал е уште еден удар за Аморим, чиј тим има само 4 бода по првите четири натпревари во Премиер лигата. Ова е најлошиот почеток на сезоната на Манчестер Јунајтед од 1992/93 година. Аморим, кој ја презеде функцијата на 1 ноември минатата година, победи само на 8 од 31 натпревари во првенството, а „Црвените ѓаволи“ се на незавидна позиција во долната половина од табелата. „Разбирам и прифаќам дека ова не е рекорд што треба да го имате во Манчестер Јунајтед“, рече Аморим.

„Нема да се променам. Кога ќе одлучам да ја сменам мојата филозофија, ќе го направам тоа. Инаку, мора да ја смените личноста. Ќе разговараме за тоа по секој натпревар што ќе го изгубиме. Не верувам во тоа, не верувам во системи. Верувам во својот начин и ќе играм на свој начин сè додека не сакам да го сменам“ изјави Аморим.

Крилниот напаѓач на Ливерпул, Мохамед Салах, реализираше удар од 11 метри во натпреварот од 4-тото коло од англиската Премиер лига. Средбата против Барнли заврши со резултат 1-0 во корист на Ливерпул. Египетскиот интернационалец го постигна 35-от гол од пенал за Ливерпул во англискиотшампионат и го сруши рекордот на Били Лидел, кој имаше 34 гола од пенал.

Да потсетиме дека овој гол беше 188-ми на Салах во англиската Премиер лига, благодарение на што 33-годишниот фудбалер се искачи на четвртото место на листата на најдобри стрелци во историјата на првенството.

Ливерпул, предводен од Арне Слот, го доби четвртиот натпревар од почетокот на сезоната во Премиер лигата и е прв на табелата со 12 бода.

Манчестер Сити забележа импресивна дерби победа над градскиот ривал Манчестер Јунајтед, победувајќи со 3-0 на својот „Етихад“. Ова беше втор успех за „граѓаните“ од почетокот на сезоната, бидејќи тимот се искачи на осмата позиција во привремениот пласман. „Црвените ѓаволи“ продолжуваат со своите разочарувачки игри и остануваат само 14-ти на табелата.

По натпреварот, Пеп Гвардиола изјави за „Скај Спортс“ дека духот на тимот е посилен од кога било, благодарение на промените направени за време на летниот преоден рок.

„Променивме многу работи за време на овој преоден рок, додавајќи девет нови играчи во јадрото на тимот“, коментираше Гвардиола.

И покрај радоста од победата, тој нагласи дека ова е само еден натпревар.

„Денес тоа значи многу, играчите беа толку агресивни. Сите беа како машини. Во четврток играме против Наполи и мора да реагираме и да бидеме помалку наивни. Минатата сезона и оваа сезона бевме толку слаби во тој поглед, но духот е тука, а капитените се фантастични“, додаде тој.

Гвардиола посвети посебно внимание на некои од неговите клучни играчи, а за Ерлинг Халанд рече: „Ерлинг беше неверојатен од самиот почеток, но оваа сезона беше подобар од кога било. Би рекол дека е подобар од годината кога ја освоивме тројната круна. Многу ни недостигаше Фил Фоден, а минатата сезона беше најдобриот играч во Премиер лигата, па ни треба, има работна етика. Фил е јадрото, срцето на клубот, од академијата и го сака Сити. Неговото враќање е добра вест за нас“, заклучи Гвардиола.

Пелистер доживеа непријатно изненадување во мечот од петтото коло на Првата македонска фудбалска лига, во кој Арсими забележа висока победа од 0-4.

Иако домаќините важеа за фаворити, нивните напади се покажаа како недоволно агресивни и непрецизни за да ја затресат и мрежата на гостинскиот тим. Воведните шанси на Ристовски и Булатовиќ не беа реализирани, во првиот случај со добра интервенција на Ислами, а во вториот, дирекот беше сојузник на Арсими. До крајот на првиот дел, битолчани успеаја да погодат и пречка, но потоа темпото на нивната игра опадна.

Во вториот дел Арсими поведе од втората шанса. Армин Бесагиќ реализираше во 66 минута за 0-1, по асистенција на Гафури. Пелистер не успеа да создаде нови шанси и во последните десет минути од средбата прими три бода.

Во 81. минута, Таипи влезе во шеснаесетникот на домашните и го совлада Јовчевски, а неговиот пробив првично беше оценет за офсајд, но по прверката од ВАР, беше прифатен. Веќе во следниот напад Шефити погоди за 0-3, а конечниот резултат го постави Игнатов во судискиото продолжение во соло продор.

Во следното шесто коло пелистерци в четврток гостуваат во Скопје против Работнички.