Бразилецот на Барса, Рафиња, откри како се чувствува по освоеното петто место на изборот за Златната топка. Иако призна дека посакувал да го освои трофејот, тој истакна дека искуството му донело скромност и поширок поглед кон играта. „Фудбалот е колективен спорт, дури и кога се доделуваат индивидуални признанија,“ рече Рафиња, нагласувајќи дека најважно е тимот да успева.

Во осврт на своите настапи за Барселона и репрезентацијата на Бразил, тој изрази благодарност за постигнатото, објаснувајќи дека не сака да се фокусира само на пропуштената награда, туку на целиот пат и напредокот што го постигнал.

Рафиња останува уверен дека еден ден може да ја освои Златната топка, но подвлекува дека најголем приоритет му се тимските трофеи. „Фудбалот е цикличен, секогаш има нови шанси. Петтото место е голема чест, но и мотив да бидам подобар,“ изјави тој.

Таквиот став ја потврдува неговата решителност да продолжи да се развива, без да го изгуби чувството за тимска работа и скромност.

Со посебна емоција зборуваше за Барселона, клубот кој го смета за свој дом. „Би сакал да ја завршам кариерата тука, да освојувам титули и да им помагам на помладите играчи,“ истакна тој.

Неговите бројки ја потврдуваат извонредната сезона, 34 голови и 22 асистенции на 57 натпревари, статистика што целосно го оправдува неговото место меѓу најдобрите во светот.

Рафиња денес изгледа како играч што совршено ја комбинира амбицијата со скромноста, а лојалноста кон клубот и тимскиот дух го прават вистински пример за професионализам и посветеност.

Фудбалерот на Реал Мадрид и репрезентативец на Франција, Едуардо Камавинга, не тренираше со националниот тим поради мускулна повреда, што го натера селекторот Дидие Дешамп на нови промени во составот. Камавинга повторно има проблеми со мускулите, па неговото отсуство дополнително ги зголемува грижите на Реал Мадрид, кои оваа сезона се соочуваат со серија повреди на клучни играчи.

На негово место, селекторот го повика играчот на Јувентус, Кефрен Тирам, кој веќе има настапи за младинските селекции и дебитираше за сениорскиот тим во 2023 година. Повикот за Тирам доаѓа во вистински момент, бидејќи Франција бара стабилност во средниот ред пред претстојните натпревари за квалификациите за Светското.

Повредата на Камавинга е уште еден удар за Реал Мадрид во сезона исполнета со повреди, а останува неизвесно кога младиот играч ќе се врати на терените.

Атлетико Мадрид е пред официјализирање на нов долгорочен договор со Џулијано Симеоне, со кој младиот напаѓач ќе остане на Ванда Метрополитано до 2030 година. Клубот е исклучително задоволен од неговиот напредок, професионализам и посветеност, а продолжувањето на соработката е потврда за довербата што ја имаат во неговиот потенцијал и улога во иднината на тимот.

Симеоне оваа сезона блеска со одлични партии, освојувајќи ја наградата за играч на натпреварот трипати по ред во изминатиот месец. Неговата енергија, борбеност и дисциплина совршено го отсликуваат препознатливиот дух на Атлетико. Навивачите веќе го нарекуваат „Пуро Атлети“, симбол на карактер и непокорност, особено импресивен за играч кој сè уште го гради своето име во сенката на семејна легенда.

Како син на славниот тренер Диего Симеоне, Џулијано успешно ја надмина тежината на презимето, градејќи сопствена кариера со труд, интелигенција и решителност. Неговата посветеност и зрелост на теренот му обезбедија значајна улога во составот на татко му. Со новиот договор, Атлетико јасно покажува дека го гледа како дел од своите долгорочни планови и идни успеси.

Српската фудбалска репрезентација утре на „Вембли“, со новиот селектор, Вељко Пауновиќ, ќе и се спротивстави на Англија во квалификациите за пласман на Светското првенство.

Пауновиќ, официјално функцијата ја презеде минатиот понеделник од Драган Стојковиќ Пикси. Во пресрет на натпреварот, порталот „Foot mercato“, пишува дека пред да го ангажира Пауновиќ, Фудбалскиот сојуз на Србија го контаактирал Тијаго Мота.

Според овој извор, натурализираниот Италијанец ја одбил понудата, бидејќи бил заинтересиран за работа само во клупски фудбал.

Мота потпиша тригодишен договор со Јувентус во летото 2024 година, а бидејќи беше отпуштен од најтрофејниот италијански клуб веќе во март, тој е должен да му плаќа до истекот на договорот или до моментот додека тој не најде нова работа.

Ова значително ги одредува амбициите на човекот кој се истакна на клупата на Болоња во текот на предминатата сезона, иако во меѓувреме доби покани од Монако, Реал Сосиедад, Аталанта, Вулверхемптон и Ајакс.

Фудбалската репрезентација на Англија успешно ги финишира квалификациите за Светското првенство. Англичаните изборија место на Мундијалот, а од вечерва ги започнуваат подготовките за планетарната смотра. Во К групата, Англија во претпоследното коло ќе ја пречека Србија.

Пред натпреварот на „Вембли“, селекторот Томас Тухел ѝ порача на англиската јавност дека Хари Кејн, Фил Фоден и Џуд Белингам не можат да играат заедно во неговиот систем.

Тој додаде дека нема да бега од тешки одлуки дури ни на Светското првенство, бидејќи неговата работа не е сите да играат и сите да бидат среќни, туку Англија да победува.

„Можат ли да играат заедно? Можат, но во различна формација. Засега не планираме да ја менуваме структурата“, одговори Германецот на последната прес-конференција пред дуелот со Србија.

„Можеби би можеле да играат заедно, но не на иста позиција. Наместо да бараме начин сите да играат, можеби е подобро секој да игра на својата најдобра позиција и да има здрава конкуренција. Моментално, двајцата се во директна борба за место. Тие се добри пријатели, може да биде позитивно соперништво. Тие не се непријатели. Се почитуваат едни со други и се борат за истата позиција“, додаде тој, покажувајќи како се носат непријатни одлуки и во исто време отфрлајќи го притисокот од јавноста.

Белингам доби повик за прв пат од јуни и пријателскиот натпревар со Сенегал, додека Фоден не играше за националниот тим од март минатата година и дуелот со Латвија.

Последнопласираната екипа во Премиер лигата Вулверхемптон има нов менаџер. 42-годиншниот Роб Едвардс од Мидлсброу седнува на клупата на премиерлигашот до јуни 2029. Вулверхемптон го откупи договорот од Мидлсброу.

Едвардс на клупата ќе го наследи Витор Переира, кој е сменет по серијата слаби резултати од почетокот на сезоната.

Во периодот од 2016 година Едвардс веќе седеше на клупата на Вулверхемптон, како привремен тренер.

Едвардс беше фудбалер на Вулверхемптон од 2004 до 2008 година, а настапуваше и за репрезентацијата на Велс.

Вулверхемптон со само два бода по 11 натпревари се наоѓа на последното место на табелата.

Европскиот шампион ПСЖ подготвува терен за купување на ново засилување. Дајот Упамекано сè уште го нема продолжено договорот со својот клуб Баерн Минхен. Договорот истекува летово и многу лесно може да се случи играчот да замине од клубот.

Доколку двете страни не постигнат договор, можно е да се случи Упамекано да биде мета и на некоја од екипите од Премиер лигата.

Во случај Упамекано да не постигне договор со Баерн и влезе во последните шест месеци од актуелниот договор играчот има право да преговара со други клубови.

Лидс Јунајтед веќе сериозно размислува за јануарскиот прозорец бидејќи се обидува да ги зголеми шансите за опстанок во Премиер лигата.

На месец и пол до пристигнувањето на јануарскиот преоден рок, Лидс веќе има планови за можни трансфери. Најочигледна слабост на Лидс е позицијата на десното крило. Обидите за Факундо Буонаноте, а потоа и за Хари Вилсон беа неуспешни кон крајот на летниот преоден рок, но првите луѓе на клубот имаат намера повторно да се активираат на можен трансфер на Вилсон од Фулам.

Велшкиот репрезентативец изгледаше дека уште на лето ќе се приклучи во Лидс, но трансферот пропадна, а сега 28-годишниот Вилсон сам посакува промена на средината. Неговиот договор моментално истекува во летото 2026 година, што го прави подложен на понуди со намалени цени. Останува да се види со каква понуда за него ќе излезе Лидс.

Џонатан Дејвид може многу бргу да го заврши својот престој во Јувентус. Наводно тој веќе се поврзува со заминување од Јувентус само неколку месеци откако се приклучи на клубот, а шпекулациите сугерираат дека би можел да замине кога ќе се отвори преодниот рок во јануари.

Канадскиот напаѓач пристигна на стадионот „Алијанц“ на почетокот на тековната сезона по истекот на неговиот договор со Лил, што се смета за голем успех за „бјанконерите“. Клубот го гледаше како идеална замена за Душан Влаховиќ и очекуваше дека веднаш ќе има влијание пред голот. Сепак, времето на Дејвид во Торино не помина како што се очекуваше, бидејќи не се етаблира како сигурен стрелец.

Според „Тутојуве“, неколку клубови внимателно ја следат ситуацијата на Дејвид, а Милан се појавува како една од најзаинтересираните страни. „Росонерите“ активно бараат да го зајакнат својот напад и се вели дека го гледаат Давид како играч со соодветни атрибути за да го зајакнат својот состав.

Поранешниот играч на Манчестер Јунајтед, Аксел Туанзебе, го тужи клубот за 1 милион фунти (1.300.000 евра) поради наводна „клиничка небрежност“ во третманот на повреда на грбот, тврдејќи дека таа му предизвикала „сериозни“ и долгорочни проблеми.

Туанзебе, кој поминал низ познатата фудбалска академија на клубот, ја поднесе тужбата во Високиот суд уште во јули, а сега се откриени клучни детали од случајот.

Главната поента на тужбата се однесува на стрес фрактура на долниот дел од ‘рбетот (фрактура на pars interarticularis) што ја претрпел во јануари 2020 година. Судските документи наведуваат дека повредата му предизвикала на играчот „значителна болка и непријатност од нејзиниот развој и влошување“.

Проблемот, се тврди, станал хроничен во јули 2022 година, кога Туанзебе ја претрпел истата повреда, но на десната страна од долниот дел од ‘рбетот. Во тужбата се наведува дека соодветен третман веројатно би спречил подоцнежни компликации.

„Соодветните планови за лекување веројатно би резултирале со тоа што тужителот би ја избегнал болката и непријатноста наведени подолу и би му овозможиле да игра професионален фудбал на елитно ниво без ограничувања или пречки“, се наведува во документите.