На предлог на спортскиот директор на Хрватскиот кошаркарски сојуз, Крунослав Симон (ХКС), Управниот одбор на ХКС денес го назначи Томислав Мијатовиќ за селектор на машката сениорска кошаркарска репрезентација на Хрватска.

Мијатовиќ е искусен кошаркарски експерт со долгогодишно меѓународно искуство, како на клупско, така и на репрезентативно ниво.

Тој ја започна својата тренерска кариера во 2001 година во КК Цибона како помошник тренер, а во 2010 година се пресели во турскиот клуб Анадолу Ефес, каде што ја презеде истата улога.

Во текот на повеќе од една деценија во клубот, тој беше клучен дел од тренерскиот персонал во периодот кога Анадолу Ефес освои две титули во Евролигата во 2021 и 2022 година, три титули во турското првенство и три турски купови.

Паралелно со својата клупска кариера, Мијатовиќ беше вклучен во работата на тренерскиот штаб на хрватската машка сениорска репрезентација долги години како тренер, со што стекна вредно искуство и длабоко разбирање на репрезентативниот систем.

Екипата на Јувентус се подготвува да продаде дел од фудбалерите за да може да собере пари за купување на нови играчи во текот на летото, наведуваат денеска медиумите во Италија.

На излезната врата од Торино се Рандал Коло Муани, Ренато Веига и Франциско Консеисао. За српскиот голгетер, Душан Влаховиќ, исто така во континуитет се потенцира дека може да ја напушти „старата дама“.

Засега Јуве не излезе со конкретна информација за споменатите фудбалери.

Три од повредените играчи на Јунајтед – Циркзи, Јоро и Далот – се вратија на тренинзите пред финалниот дуел на клубот против Тотенхем во среда во Лига Европа. 

Оваа вест доаѓа како огромно засилување за Црвените Ѓаволи, кои се надеваат дека ќе го освојат својот прв трофеј оваа сезона и ќе обезбедат место во Лигата на Шампионите за следната. 

Во официјална објава на социјалните мрежи, Јунајтед потврди: „Џош, Лени и Диого се вратија на тренинзите пред финалето на #UEL.“ 

Далот, кој има 51 настап во сите натпреварувања оваа сезона, се здоби со повреда на потколеницата кон крајот на април. 

Циркзи, пак, беше принуден да го напушти теренот во 10 минута од второто полувреме на поразот од Њукасл на 12 април, и се стравуваше дека ќе го пропушти остатокот на сезоната. 

Само десет дена пред финалето, Јоро куцајќи го напушти теренот во второто полувреме против Вест Хем. 

Иако нивната целосна подготвеност за финалето сè уште не е потврдена, фактот што беа вклучени во дел од тренингот што беше емитуван во живо на „MUTV“ е сигурен охрабрувачки знак за навивачите на Јунајтед. 

ПСВ Ајндховен беше крунисан за холандски шампион откако направи извонреден пресврт во завршницата на сезоната, одземајќи му ја титулата во Ередивизи на жестокиот ривал Ајакс. 

Победата од 3-1 на гостувањето кај Спарта Ротердам во неделата ја потврди 26-тата лигашка титула за ПСВ, заокружувајќи една од најневеројатните трки за шампионската круна во историјата на европскиот фудбал. Со само пет натпревари до крајот, Ајакс имаше девет бодови предност и изгледаше сигурно на патот кон својата 37-ма титула. 

Надежите на ПСВ изгледаа згаснати по поразот од 2-0 на домашен терен против Ајакс на 30 март — натпревар што многумина го сметаа за одлучувачки во трката за титулата. 

Но, Ајакс потоа загуби клучни бодови, ремизирајќи два натпревари и губејќи уште два, вклучувајќи го и разочарувачкото реми 2-2 против Гронинген, каде што примија изедначувачки гол длабоко во судиското надополнување. Тоа им овозможи на ПСВ да ги престигне со само еден натпревар до крајот. 

Говорејќи по освојувањето на титулата, Лук де Јонг призна дека дури и играчите на ПСВ се откажале. 
„По поразот дома од Ајакс, веќе се откажавме. Заостанувавме девет бода“, рече тој. 
„Никогаш досега не сум доживеал вакво нешто… Радоста е огромна, бидејќи повеќе не се надевавме.“ 

Тренерот на фудбалерите на Вардар, Гоце Седлоски, верува дека неговите избраници ќе ја победат екипата на Струга Трум Лум и ќе го освојат пехарот во Купот.

„Толку време Вардар го чека ова финале, ќе дадеме максимум и со помош од публиката да ја оствариме целта. Ако играчите одиграат како во претходните шест месеци, се надевам дека трофејот ќе дојде во нашите витрини.

Знаеме каде беше Вардар во првата полусезона ама со макотрпна работа стигнавме до петтото место. Сакам да го заокружиме добриот ритам и утре“ – изјави Седлоски пред мечот на Арената во Скопје.

Европската фудбалска унија (УЕФА) објави дека 69-та церемонија на доделувањето на „Златната топка“, која се доделува на најдобриот фудбалер, ќе се одржи на 22. септември во Париз, во театарот „Шател“.

На свечената церемонија ќе бидат доделени награди и во машка и во женска конкуренција за најдобар голман, стрелец, тренер, клуб и млад играч.

Исто така, ќе има награда за најдобра „акција на солидарност или социјална корист“, која можат да ја освојат и машки и женски фудбалери. УЕФА изјави дека имињата на финалистите за наградите ќе бидат објавени на почетокот на август.

Златната топка се доделува од 1956 година. Наградата во машка конкуренција најмногу пати ја освои Лионел Меси (осум), додека минатогодишниот добитник беше играчот од средниот ред на Манчестер сити, Родри.

Барселона ги освои трите домашни трофеи, за прв пат од 2018 година. Нешто со што може да се пофали претседателот Џоан Лапорта, кој го презеде клубот по две и пол години без трофеј.

Со Лапорта дојдоа трофеи. Прво беше освоен Купот на Карало во 2021 година, потоа Ла Лига во 2023 година, како и Суперкупот, а оваа година беа споени сите три домашни трофеи.

Лапорта истакнува дека ова не се единствените успеси на неговата влада.

„Барса ќе заработи 950 милиони евра. Тоа е речиси милијарда. Многу сме уверени дека наскоро ќе бидеме во рамките на правилото 1:1“, рече Лапорта.

Ова практично значи дека големи имиња повторно ќе можат да бидат потпишани на „Камп Ноу“. Постојат шпекулации за Ерлинг Халанд.

„Ќе има промени во нашиот тим ова лето. Нашите ривали исто така се засилуваат, бидејќи гледаат дека нашиот тим е најдобар во моментов. Халанд? Ништо во животот не е невозможно. Но, во моментов не размислуваме за него бидејќи неодамна тој го обнови договорот со Сити“.

„Ла Стампа“ подметна „бомба“, „Ла Стампа“ ја деактивираше.

На истата страница на влијателниот весник каде што синоќа, еден час пред полноќ, се појави фудбалска ексклузива на годината во Италија, утрово се појави демант.

„Утрово, откако „Ла Стампа“ ја објави сторијата, клубот категорично ги негираше тврдењата: Германскиот тренер, светска икона по годините поминати во Ливерпул и Борусија Дортмунд, нема да седи на клупата на Рома“, се наведува во краткиот текст.

Целата врева се крена кога Рома објави видео во кое култните споменици на „Вечниот град“ се појавуваат по специфичен редослед: Колосеум, Лупа, Олимпико, Пјетро Сан, Пантеон.

Во Рим и пошироко, вклучувајќи ги и редакциите што ги следат случувањата во клубот го препознаваа акростихот (K.L.O.P.P) во сè и мислеа дека ја решиле мистеријата, но Колосеумот отсекогаш и засекогаш се пишувал со „C“ на латински и италијански.

57-годишниот Германец замина од „Енфилд“ во 2024 година, откако емотивно се збогуваше со Ливерпул и неговите навивачи. 

На почетокот на 2025 година, Клоп ја презеде функцијата за надгледување на стратешките планови на Ред Бул и нивната колекција на фудбалски клубови, која ги вклучува: РБ Лајпциг, Њујорк Ред Булс, Лидс Јунајтед и Париз ФК. 

Откако Клаудио Раниери објави дека ќе се пензионира од менаџмент по само една сезона помината во Рома, вниманието веднаш се префрли на неговиот можен наследник. 

Од поранешни тренери во италијанската лига, како Макс Алегри, Стефано Пиоли и Џан Пјеро Гасперини, до понеискусни таленти како Франческо Фариоли, па дури и поранешниот менаџер на Манчестер Јунајтед, Ерик тен Хаг, италијанските медиуми ги разгледуваат сите опции. 

Сепак, според извештајот на „La Stampa“, Рома е заинтересирана за поранешниот менаџер на Ливерпул и тврди дека е постигнат договор помеѓу клубот и 57-годишниот германски тактичар. 

Да се каже дека Јамал е во врвна форма оваа сезона не би била целосна слика за тоа колку добро 17-годишниот играч се претстави за Барселона. Тој беше клучен играч во освојувањето на сите три домашни трофеи на каталонскиот клуб.  

Тинејџерот од Ла Масија пристигна во првиот тим на Барселона како 15-годишник под водство на Чави Ернандез, а под Ханси Флик се трансформира во еден од најдобрите фудбалери во светот, дури и потенцијален фаворит за Златната Топка во 2025 година. 

Клубот е подготвен да го зацврсти неговиот статус како темел на својата иднина. Според доверлив извор на социјалните мрежи, Јамал од следната сезона ќе го носи легендарниот дрес со број 10, промена што ќе се официјализира по неговиот 18-ти роденден на 13 јули.  

Овој потег ќе се совпадне и со потпишувањето на нов договор, со кој ќе се продолжи неговиот престој во Барселона до 2030 година. Новиот договор значително ќе ја зголеми неговата плата, ставајќи го меѓу најплатените играчи во клубот. 

Дресот со број 10, кој претходно го носеше Лионел Меси, моментално му припаѓа на Ансу Фати. Талентираниот фудбалер роден во Гвинеја-Бисао беше назначен како прв наследник на аргентинецот, но поради честите повреди, неговата кариера стагнираше, и можно е да го напушти клубот ова лето.