Поранешните фудбалери на Манчестер Јунајтед и Англија, Дејвид Бекам и Гари Невил, го купија мнозинскиот удел во англискиот клуб од четвртата лига, Салфорд. Новите сопственици си поставија цел да стигнат до Чемпионшип, втората лига на англискиот фудбал, во следните пет години.

Салфорд Сити објавува дека клубот е преземен од нова група сопственици предводена од Дејвид Бекам и Гари Невил, а во која се вклучени и американскиот бизнисмен Деклан Кели, како и Мервин Дејвис. Последните двајца ќе бидат новите копретседатели на одборот на директори на клубот, се наведува во соопштението на клубот.

Салфорд ја заврши сезоната на осмото место во Лига Два, еден бод зад Честерфилд, кој ќе игра во плејофот за да ја пополни Лига Еден на седмото место.

Бетис и Челзи ќе се борат за трофејот во Конференциската лига. Финалето на Конференциската лига е закажано за 25 мај во Вроцлав.

Бетис прв пат во 117-годишната историја ќе игра европско финале. „Зелено-белите“, по продолженија ја елиминираа Фиорентина со 4-3

Првиот меч во Севилја заврши со победа на Бетис 2-1, а со ист резултат заврши и реваншот во Фиренца.

Бетис поведе со голот на Антони, а потоа Фиорентина направи пресврт со головите на Робин Госенс. Херојот на Бетис стана Ез Абде кој успеа да погоди во 98.минута.

Челзи го одработи реваншот против Ѓургарден. По убедливиот триумф во Шведска 4-1, „сините“ на домашен терен славеа со 1-0. Единствениот гол во 38.минута го постигна Дузбери-Хол.

Манчестер јунајтед и Тотенхем ќе се борат за трофејот во Лига Европа, „ѓаволите“ и „спарси“ со нови победи над Атлетик Билбао, односно Бодо/Глимт го потврдија настапот во финале.

Манчестер јунајтед и Тотнем на 21. мај на Сан Мамеш ќе бркаат спас на сезоната, односно триумф во Лига Европа, успех што ќе им донесе и настап во Лигата на шампиони.

„Ѓаволите“ вечерва со 4-1 го совладаа Атлетик Билбао и покрај тоа што првите 45 минути не навестуваа ваков резултат, гостите на пауза заминаа со предност од 0-1 и беа подобар противник.

Но избраниците на Аморим се разиграа во финишот, односно откако во игра влегоа Шо, Маунт и Диало.

Токму Маунт ја почна и ја заврши гол серијата, во 72. минута одлично се ослободи од противникот и пласираше на подалечната статива за 1-1, за во 91. минута да погоди од речиси половина терен.

Помеѓу двете мајстории на Англичанецот, Касемири по едне прекин донесе 2-1, а Хојлунд рутински реализираше за 3-1 во 85. минута.

Тотнем ја доби и втората пресметка со Бодо/Глимт, вечерва во Норвешка триумфираше со 0-2.

Соланке го отвори резултатот во 63. минута, а Поро ги реши сите дилеми во 69. минута.

Арсенал решително одговори на обидите на Реал Мадрид да потпишат договор со Вилијам Салиба со забрзување на преговорите за нов договор со францускиот дефанзивец. Според француското издание „Л’Екип“, медиумите во Англија со недели пишуваат за иден трансфер на Салиба, кој се смета за идеално засилување во срцето на одбраната на кралскиот клуб.

Новиот спортски директор на Арсенал, Андреа Берта, кој беше поранешен архитект на успехот на Атлетико Мадрид, е решен да спречи сценарио слично на она со Килијан Мбапе и ПСЖ – кога Парижаните ја загубија својата суперѕвезда без надомест за трансфер. Затоа Италијанецот започна разговори за продолжување на договорот со Салиба пред неколку недели, а во последните денови тие стануваат сè поинтензивни.

Реал Мадрид го гледа Салиба како долгорочно решение за нивните дефанзивни проблеми. Повредите на Дани Карвахал и Едер Милитао, како и напредната возраст на клучните фигури како што се Рудигер и Алаба, ги принудуваат во Реал да бараат нови лидери во одбраната. Според шпански извори, клубот има два можни планови: или да го потпише Салиба за пониска цена во 2026 година, или да го земе како слободен агент во 2027 година, кога ќе му истече договорот.

Лидерот на табелата во италијанското фудбалско првенство, Наполи, ќе се обиде да го привлече Џек Грилиш од Манчестер Сити, објавува британскиот дневен весник „Сан“.

Според информациите, тренерот на Наполи, Антонио Конте е голем поддржувач на англискиот интернационалец и лично се залага за негов трансфер.

Наполи е три бода пред Интер во трката за титулата во Италија, а Конте сака да направи значаен трансфер за да му помогне на тимот во Лигата на шампионите следната сезона.

Весникот „Сан“ пишува дека Грилиш би го напуштил Манчестер Сити доколку добие добра понуда, а Наполи не е единствениот клуб заинтересиран за играчот од средниот ред. Манчестер Сити потпиша договор со Грилиш во август 2021 година од Астон Вила за 117,5 милиони фунти и тој беше дел од тимот што освои четири трофеи во 2023 година.

Сепак, Грилиш постепено го загуби своето место во стартниот состав во Сити и одигра само 19 натпревари за тимот во Премиер лигата оваа сезона.

Македонската ракометна репрезентација денеска во Талин против Естонија го игра еден од двата клучни натпревари за пласман на Европското првенство 2026. Селекторот Кирил Лазаров го одреди составот кој ќе ѝ се спротистави на Естонија, а во него се најд еповратникот на нашиот гол, Мартин Томовски, но и дебитантот Мартин Ивановски.

За пласман на ЕП, Македонија денеска мора да слави.

Со победата од 2-1 против екипата на Работнички, Шкендија и официјално е новиот фудбалски шампион на Македонија. Попладнево во Тетово во мечот од 31. коло тетовци славеа над Работнички и дојдоа до 4 бода предност пред Силекс на две кола до крајот на шампионатот.

Шкендија ја осигура петтата шампионска круна со оглед на тоа што има четири бода предност пред второпласираниот Силекс, а во следното коло треба да игра со екипата на Гостивар. Но, откако гостиварци се откажаа од шампионатот, Шкендија следното коло ќе добие службена победа од 3-0, поради што уште од сега е јасно дека веќе осигураа доволна предност за шампионска круна.

Во преостанатите денешни дуели, во вистинска драма во Струмица, Брера со пресврт славеше над Шкупи со 4-3, додека Тиквеш дома ја совлада Беса со 1-0.

По потврденото заминување на Трент Александер-Арнолд, Ливерпул е на пат да се раздели и со уште еден свој играч. Станува збор за резервниот голман Каоимин Келехер.

Според пишувањата на англискиот печат, се очекува резервниот голман да замине од тимот ова лето, особено што во Ливерпул доаѓа Гиорги Мамардашвили, кој уште минатото лето беше купен од Валенсија за 38 милиони долари и моментално е на позајмица во шпанскиот тим. Тој ќе го замени Келехер како заменик на Алисон Бекер. Алисон, кој ја потврди својата посветеност на Ливерпул, има договор до 2027 година.

Дефанзивецот на Пари Сен Жермен, Ашраф Хакими, му се заблагодари на тренерот Луис Енрике за пласманот во финалето на Лигата на шампионите.

„Луис Енрике заврши неверојатна работа откако дојде. Тој изгради фантастичен тим, а тоа бара многу работа. Тој е мајстор на својот занает“, рече Хакими.

„Многу луѓе не веруваа во нас, но ние го направивме тоа. Работевме напорно, ние сме тим, ние сме семејство, го заслужуваме овој момент, сите навивачи, сите Парижани“, додаде мароканскиот репрезентативец, кој го постигна вториот гол за својот тим во победата од 2-1 над Арсенал во полуфиналниот реванш.

ПСЖ се пласираше во финалето на Лигата на шампионите, кое ќе се одигра во Минхен на 31 мај.

Шпекулациите за заминувањето на Антонио Конте од клупата на Наполи го натераа претседателот на наполитанците, Де Лаурентис, активно да се вклучи во потрага по нов тренер. Според италијанските портали, Наполи може да го смени тренерот ова лето, па доколку тоа се случи прв на листата на посакувани замени за Конте е Масимилијано Алегри.

Претседателот Аурелио Де Лаурентис е во активен контакт со Алегри, со кого има одлични односи. „Наполитанците“ моментално се на чело на италијанското првенство пред Интер со три бода на три кола до крајот на сезоната и имаат реални шанси да ја освојат титулата. За Конте се шпекулира дека може да застане на чело на Јувентус.