Арсенал е во напредни преговори со Ајакс околу трансферот на дефанзивецот Јуриен Тимбер.

„Топџиите“ веќе ги договорија личните услови за 22-годишниот репрезентативец на Холандија и испратија понуда од 30 милиони фунти.

Ајакс за слободата на својата ѕвезда бара 50 милиони евра, но се очекува наскоро двата клуба да ја надминат разликата.

Клубот од „Емирејтс“ изминатите години внимателно следи како напредува Тимбер и верува дека ќе биде големо засилување за одбраната.

Арсенал е многу активен на трансфер пазарот и покрај Тимбер преговара уште за Даклан Рајс и Каи Хаверц.

Анхел Ди Марија реши јавно да каже дека неговиот договор со Јувентус нема да биде продолжен. Тој така реши да се прости од овој клуб, а веднаш почнаа шпекулациите за продолжување на неговата кариера.

Фабрицио Романо сега ексклузивно објави дека Аргентинецот има нов клуб, и дека се договорил со Бенфика.

“Бенфика го финализира потписот на Ди Марија. Се е во завршна фаза, треба да се завршат некои ситни детали.

Се ќе биде официјализирано во следните неколку дена. Тој прифати едногодишен договор и чека да потпише”. напиша Романо на својот Твитер профил.

35-годишниот аргентински интернационалец минатото лето пристигна како слободен играч од Пари Сен Жермен на едногодишен договор, а сега си заминува под слични околности.

Дивок Ориги минатото лето го напушти Ливерпул и се пресели во Милан, но не се снајде баш најдобро во Серија А.

Ориги беше слободе агент и имаше многу понуди, а тој избра да се пресели во Милан, каде требаше да биде големо засилување. Меѓутоа, Ориги главно ја грее клупата за резерви и сезонава постигна само два гола, па Милан е спремен да се ослободи од него.

Најсилен интерес за Белгиецот покажуваат Астон Вила и Вест Хем, кои веќе стапиле во контакт со неговиот агент.

Ориги сака да се врати во Премемиер лигата, но има понуди и од Турција.

Јувентус постигна договор со Марсеј за откуп на Аркадиус Милик, кој ќе остане во Торино и во наредните три години.

Милик минатата сезона играше како позајмен фудбалер во Јувентус и одигра одлично постигнувајќи девет гола во сите натпреварувања. Тренерот Алегри побара од раководството да го задржи Полјакот, па „старата дама“ му ја исполни желбата.

Јувентус постигна договор со Марсеј и за неговиот потпис ќе плати 7 милиони евра.

Милик ќе стави потпис на 3-годишен договор, а и самиот истакна дека е среќен и сака да остане во Торино.

ПСЖ го одреди Хари Кејн како примарна трансфер цел ова лето и веќе почна да работи на трансферот.

Ѕвездата на „Спарси“ одби да го продолжи договорот и ова лето најверојатно ќе ја промени средината бидејќи влегува во последната година од договорот.

Интерес за Англичанецот покажува Реал Мадрид, но сега во трката за неговиот потпис се приклучи и ПСЖ. Спортскиот директор на „светците“ Луис Кампос веќе имал состанок со претставниците на напаѓачот и започнал преговори.

Тотенхем за неговата слобода бара 110 милиони евра, а ПСЖ е спремен да ја плати таа сума и да го направи Кејн наскапиот англиски фудбалер во историјата.

Челзи потпиша договор со францускиот напаѓач Кристофер Нкунку, кој доаѓа во тимот од Лајпциг.

„Сините“ го комплетираа трансферот на Нкунку за 60 милиони евра од бундеслигашот, а овој трансфер беше најавуван веќе со месеци.

„Челзи со задоволство може да соопшти дека Кристофер Нкунку ќе ни се приклучи од РБ Лајпциг во пресрет на сезоната 2023/24“, соопшти клубот.

Пелистер денес го претстави првото големо засилување, тоа е напаѓачот Симеон Христов кој доаѓа од ФК Гостивар.

Искусниот напаѓач има настапувано за ФК Вардар , ФК Работнички , ФК Македонија ЃП, ФК Тиквеш а пред 10 години ги бранеше и боите на ФК Пелистер.

„Благодарност до управата и до тренерот за довербата да бидам дел од тимот и се надевам дека сите заедно ќе успееме во зацртаната цел за влез во ПМФЛ. Ова е мое второ доаѓање во Битола и имам прекрасни спомени од тука. Ова е фудбалски град со голема традиција и навивачи кој заслужува место во ПМФЛ“, изјави Христов по потписот на договорот.

Пелистер сезонава не успеа да се врати во Првата лига и во Втората заврши зад Воска Спорт, Гостивар и Вардар на четвртата позиција. Неодамна на кормилото на битолскиот клуб пристигна искусниот стратег Влатко Костов.

Иднината на Илкај Гудоган е главна тема во спортските медиуми бидејќи неговиот договор со Манчестер Сити истекува на крајот на овој месец.

Гундоган се уште не го продолжил договорот со „граѓаните“ и се поврзува со многу европски гиганти. Германецот се огласи и потврди дека се уште не донел одлука каде ќе ја продолжи кариерата, но сигурно нема да се врати во Бундеслигата.

„Уште не сум донел одлука за иднината, се уште размислувам. Имаше контакти со Борусија Дортмунд, но не сериозни, враќањето во Бундеслигата не е дел од моите планови“, изјави Гундоган.

Најсериозен интерес за Гундоган покажуваат Барселона и Арсенал.

Интер и Милан се силно заинтересирани за младиот дефанзивец на Челзи, Тревор Чалоба, пренесуваат италијанските медиуми.

Примарна цел на Интер во летниот преоден рок ќе биде доведување на дефанзивец кој ќе го замени Милан Скриниар. „Нероаѕурите“ веќе ја почнаа потрагата, а најново име на списокот е дефанзивецот на Челзи, Тревор Чалоба.

Чалоба е младински репрезентативец на Англија, може да игра на повеќе позиции во одбраната и поради тоа е голема желба на миланските гиганти.

Цената на Чалоба во моментов изнесува помеѓу 20 и 25 милиони евра, а и тој самиот потврди дека е заинтересиран за преселба во Серија А.