Селекторот на Англија, Герет Саутгејт ќе ги одмора играчите на Манчестер Сити против Малта во квалификациите за УЕФА Евро 2024 година во Германија во јуни 2024 година, пренесува „Daily Mail“.

Средбата со Малта ќе се одигра на 16 јуни, шест дена по финалето на Лигата на шампионите, во кое Манчестер Сити ќе игра со Интер. 

Во овој поглед, учеството на дефанзивците Џон Стоунс и Кајл Вокер и играчите од средниот ред Џек Грилиш, Фил Фоуден и Калвин Филипс во натпреварот со Малтежаните речиси и не доаѓа предвид. Во исто време, фудбалерите на Манчестер Сити, повикани од Саутгејт на подготовки, ќе треба да пристигнат на локацијата на репрезентацијата на 13 или 14 јуни и да одлетаат за Малта.

Фудбалерите на Манчестер Сити можат да играат на мечот со Македонија на 19 јуни.

Масимилиано Алегри сака да го засили тимот со играч на Реал Мадрид, пренесуваат италијанските медиуми. Адриен Рабио на лето најверојатно ќе го напушти Јувентус, а Алегри како негова замена го сака Себаљос од Реал Мадрид.

Договорот на Шпанецот со „кралскиот“ клуб истекува во јуни и нема најави за негово продолжување, па „бјанконерите“ сакаат да ја искористат ситуацијата.

Себаљос не добива голема минутажа во Реал, но Алегри верува дека идеално би се вклопил во неговиот тим.

Раководството на „старата дама“ стапило во контакт со агентот на Себаљос и спремни се да му понудат четиригодишен договор.

Маурицио Покетино најверојатно ќе биде нов менаџер на Челзи, а Аргентинецот ќе добие одврзани раце да направи тим по своја мерка.

Англиските медиуми пренесуваат дека најголема желба на Покетино е неговиот сонародник Пауло Дибала, кој има одлична сезона во Рома.

Дибала има договор со Рома до 2025 година, но и клаузула од 12 милиони евра доколку „волчицата“ не игра во Лигата на шампиони.

Дибала вети дека ќе остане во Рома ако клубот обезбеди учество во Лигата на шампиони, а тоа може да се случи само ако „волчицата“ победи во финалето и ја освои Лига Европа.

Фил Џонс по дванаесет години во Манчестер Јунајтед ќе си замине од „Олд Трафорд“.

Договорот на Џонс истекува на лето и во него има опција да го продолжи на уште една, но клубот одлучи да не ја активира таа клазула. Сер Алекс Фергусон во 2011 година го доведе Фил Џонс од редовите на Блекбурн и за него плати 19.3 милиони евра.

Сепак, во последните години Џонс има проблеми со повредите и повеќе е надвор од терените отколку што игра. Со клубот од Манчестер во минатото освои шест трофеи и собра вкупно 229 настапи во кои постигна шест гола и запиша 10 асистенции.

„Размислував како најдобро да ги претставам моите зборови и почувствував дека сакам да допрам до навивачите на Манчестер Јунајтед. Секогаш е тешко да заминете од еден клуб, го направив тоа со Блекбурн, тогаш имав 19 години и не можев да замислам што ќе следи. Моето време во Јунајтед беше неверојатно. Го претставував мојот клуб од детството и живеев вистински сон, бев мотивиран да им покажам на сите што можам“, стои во дел од пораката која Џонс ја остави на социјалните мрежи.

Лучијано Спалети би можел да се раздели и да бара нова средина, иако овој тим стигна до Скудетото по чекање од 33 години.

Наводно Спалети бил лут на раководството на Наполи бидејќи не бил повикан на продолжување на соработката и најавил заминување.

Овие информации секако се изненадувачки бидејќи Спалети му ја донесе на Наполи титулата на која тимот чекаше повеќе од три децении, а освен тоа играше и ¼ финале во Лигата на шампионите.

Во италијанските медиуми веќе се шпекулира за негов наследник и според последните информации, Де Лаурентис разговарал со поранешниот тренер Рафаел Бенитез, а се споменува и Кристоф Галтие.

Ал-Хилал продолжува да прави обиди да го ангажира напаѓачот на Пари Сен Жермен, Лионел Меси, објави „Мундо Депортиво“.

Според истите, клубот ја зголемил понудата на Меси и му нуди 500 милиони евра за една сезона. Претходно беше објавено дека Ал-Хилал е подготвен да му плати на аргентинскиот напаѓач околу 400 милиони евра за една сезона, што може да биде најголемиот договор во историјата на фудбалот.

Друга можна опција за продолжување на кариерата на Меси е враќањето во каталонската Барселона. Меси е во ПСЖ од 2021 година. Договорот на напаѓачот со клубот е до крајот на оваа сезона. Меси оваа сезона настапи на 38 натпревари во сите натпреварувања, постигнувајќи 20 гола и 19 асистенции.

Михаило Мудрик дојде во Челзи како големо засилување во јануари и очекувања беа многу големи.

Мудрик беше на мета на многу европски гиганти, но тој избра кариерата да ја продолжи во Челзи и се вклопи во „сивилото“ на Стенфорд Бриџ.

Тој не покажа ништо од својот потенцијал и не успеа де се вклопи во Премиер лигата, па можно е експресно да го напушти Челзи. Мудрик започна само шест првенствени натпревари како стартер во Челси од јануари и имаше еден настап во Лигата на шампионите, а не постигна ниту еден гол.

„Сините“ за него платија 70 милиони евра во јануари, а сега се спремни да го продадат и да слушнат понуди.

Наполи започнал преговори со плејмејкерот на Удинезе, Лазар Самарџиќ, пренесуваат италијанските медиуми.

21-годишниот офанзивен играч за врска е роден во Германија, но има српски корени и избра да игра за српската репрезентација.

Тој игра одлично во Серија А, па го привлече вниманието на многу клубови, меѓу кои Барселона и Милан. Наполи наводно сака да ја победи конкуренцијата и да го доведе во своите редови, бидејќи се појавија информации дека Елмас сака да ја промени средината.

Самарџиќ е многу сличен фудбалер на македонскиот репрезентативец и во Наполи веруваат дека ќе биде идеална замена.

Преселбата на бразилскиот напаѓач на францускиот ПСЖ, Нејмар во англискиот Њукасл е комплицирана поради барањата на фудбалерот за висината на платата, пренесуваат медиумите во Англија.

Во летниот преоден рок, Њукасл сака да се фокусира на купување играчи кои ќе играат во Лигата на шампионите следната сезона. 

Англискиот клуб веќе стапил во контакт со блиски луѓе на Нејмар за да разговараат за можен трансфер. Ситуацијата со евентуален трансфер се уште е далеку од напредна фаза, но доколку Бразилецот го напушти ПСЖ, тогаш Премиер лигата ќе биде најпогодното место за продолжување на кариерата.

Договорот на 31-годишниот Нејмар со ПСЖ е со важност до 2025 година. Бразилскиот напаѓач има 18 гола и 17 асистенции на 29 натпревари оваа сезона.

Милан е во напредни преговори со играчот за врска на Челзи, Лофтус Чик.

Милан е силно заинтересиран за Рубен Лофтус Чик, кој играше одлично против „росонерите“ во ЛШ и го привлече вниманието на Малдини.

26-годишниот играч за врска не добива голема минутажа во Челзи, па и самиот е спремен да ја промени средината. Челзи на лето ќе прави голема реконструкција, а Луфтус Чик е меѓу фудбалерите ставени на продажба.

„Росонерите“ веќе стапиле во контакт со неговиот агент и двете страни постигнале начелен договор, објави новинарот Фабрицио Романо.