Нејмар пред еден месец се врати во Сантос, а во четвртиот меч за клубот во кој ја започна кариерата го постигна првиот гол. Нејмар постигна гол од пенал. Бразилецот погоди по пауза од 502 дена.

Поранешниот играч на Барселона, ПСЖ и Ал Хилал , со гол и асистенција го предводеше Сантос до победата над Агуа Санта (3-1).

Англискиот фудбалски интернационалец, Хари Кејн, кој заработи повреда на викенд -дербито со Баер Леверкузен, веројатно ќе се појави на теренот на денешниот реванш меч со Селтик во елиминациите во Лигата на шампионите.

Тој иако беше ослободен од вчерашниот тренинг, сепак се очекува да го предводи нападот на Баварците на денешниот меч во Германија.

Неговиот тим со едната нога е во осминафиналето откако на првиот дуел во Шкотска победи со 2-1.

Корпулентниот голгетер, Александар Исак, ќе го напушти Њукасл во летниот трансфер период доколку англискиот состав не обезбеди место во Лигата на фудбалските шампиони за наредната сезона.

Тој добил дозвола од челниците на тимот да ја промени средината доколку „враните“ не успеат да се пласираат во елитната конкуренција во Европа.

За одличниот напаѓач се заинтерсирани екипите на Ливерпул и Челзи а неговата трансферна вредност е околу 100 милиони евра.

Искусниот играч за врска, Бразилецот Касемиро, по долго размислување реши да остане во Англија.

„Го почитувам Манчестер и многу сум благодарен што сум тука. Имам уште една и пол година од договорот и би сакал да го дочекам до крај во клубот. Јас и моето семејство сме среќни во Манчестер, зборуваме англиски, целосно се адаптиравме. Благодарен сум и на навивачите на клубот, среќен сум. Не и затоа што сум на клупата, но на мене е да го направам тоа што го правам најдобро. Би сакал да играм повеќе, бидејќи нема играч кој не сака да биде на теренот. Сепак, го почитувам Рубен Аморим и неговите одлуки“, изјави Касемиро во големото интервју за мадридски „АС“.

Откако Рубен Аморим го презеде Јунајтед, Касемиро одигра само четири натпревари во Премиер лигата, вклучувајќи го и синоќешниот натпревар против Тотенхем. Тој беше на теренот и против Лестер во ФА Купот, како и на два натпревари од УЕФА Лига Европа против Плзен и ФЦСБ.

Останува да видиме како ќе се одвиваат работите на крајот од сезоната, бидејќи Касемиро заедно со Кристијан Ериксен е еден од поискусните играчи на кои Аморим не смета за следната сезона.

Поранешниот менаџер на Арсенал, Арсен Венгер не верува особено во шансите на тимот од Северен Лондон оваа сезона да конкурира за шампионската титула во Англија.

Тимот на Микел Артета заостанува 7 бода зад лидерот Ливерпул, а тимот не станал шампион од 2004 година.

-Веќе одигравме 25 натпревари во сезоната, а Ливерпул запиша само еден (пораз од 0-1 од Нотингем Форест во септември). Тие треба да загубат најмалку три од нивните преостанати 13 натпревари пред крајот на сезоната. Засега, ова изгледа многу малку веројатно, освен ако не дозволат целосен колапс. Има еден супер фаворит, а Арсенал треба да направи перфектна серија, победувајќи ги сите натпревари, за да има шанса. Се молам за тоа, но треба да го подобрам квалитетот на моите молитви, изјави францускиот менаџер, кој го водеше тимот 22 години и во моментов е директор за глобален фудбалски развој во ФИФА.

Во календарот на Арне Слот во Премиер лигата, тимот треба да игра со Астон Вила, Манчестер Сити, Њукасл и Фулам пред да му гостува на Арсенал во 36. коло на 10 мај, што се очекува да биде финале на сезоната.

Фудбалската асоцијација на Англија го казни Арсенал со 65.000 фунти поради однесувањето на фудбалерите на лондонскиот клуб на натпреварот против Вулверхемптон во 23. коло од Премиер лигата.

„Топџиите“ беа санкционирани откако играчите го опколија судијата Мајкл Оливер на „Молину“, по одлуката од која не беа задоволни.

Фудбалерите на Арсенал го опколија судијата откако тој донесе одлука, која комисијата ја оцени како неоснована – кога Мајлс Луис-Скели доби директен црвен картон.

Луис-Скели има 18 години и може да игра како лев бек или во средниот ред.

Судијата Мајкл Оливер му покажа директен црвен картон на Луис-Скели за дуелот со Мет Доерти.

Луис-Скели го сопна Доерти на крајот од полувремето и го спречи во контранапад, а 39-годишниот судија не ја промени својата одлука ниту по проверка на ВАР.

Дејвид Мојс се врати на клупата на Евертон и ги врати насмевките на „Гудисон Парк“. Во прилог му одат и бројките.

Шон Дајч доби отказ на клупата на „карамелите“ по лошиот старт во сезоната. Евертон беше блиску до зоната за испаѓање, Мојс дојде на местото на Дајч и го оживеа тимот.

Дејвид Мојс се врати во клубот по 12 години и направи целосен пресврт, оттогаш Евертон е, верувале или не е најдобриот клуб во Премиер лигата.

Од доаѓањето на Мојс, „карамелите“ освоија 13 бода во шест натпревари, најмногу во Премиер лигата, заедно со Ливерпул и Арсенал.

Евертон победи четири пати, еднаш ремизираше, а само еднаш загуби, во првиот меч на Мојс во Премиер лигата по неговото враќање. Оттогаш, Евертон нема пораз на пет натпревари.

Евертон ги победи Тотенхем, Брајтон, Лестер и Кристал Палас и освои бод против Ливерпул.

Ако продолжат вака, Евертон би можел дури и да се вклучи во борбата за горниот дел на табелата до крајот на сезоната. Моментално се на 14. место со 30 бодови, со девет бода помалку од Фулам кој е на осмото место.

Рубен Аморим ќе мора комплетно да го реорганизира тимот во летниот преоден рок. Во планотвите на португалските тренер нема место за Кристијан Ериксен.

Данскиот играч за врска веќе некое време не добива вистинска шанса на натпреварите на Јунајтед, а сега е јасно зошто.

Аморим им порачал на клупските челници дека повеќе не смета на Ериксен и дека Данецот може слободно да бара нов клуб. Неговиот договор истекува на крајот од сезоната и нема да биде продолжен.

Ериксен дојде на „Олд Трафорд“ во 2022 година по одличната сезона во Брентфорд. Данецот претходно беше одличен во Тотенхем, имаше одлична кариера, но по несреќниот случај на Европското првенство во 2021 година кога Ериксен мораше да биде реанимиран, мораше да паузира неколку месеци.

Ериксен поради правилата во Серија А, мораше да го раскине договорот со Интер, ја прифати понудата од Брентфорд каде ја потврди класата.

Ериксен отсега ќе може да бара нов клуб, а од Јунајтед ќе си замине без обештетување. Во својата кариера настапуваше за Ајакс, Тотенхем, Интер, Брентфорд и Манчестер јунајтед.

Тренерот на Манчестер Сити, Пеп Гвардиола, одлучи да се раздели со тројца од главните играчи на тимот на крајот на сезоната. Според информациите, шпанскиот стручњак планира големо преструктуирање во клубот и верува дека продажбата на Кевин Де Брујне, Бернардо Силва и Илкај Гундоган ќе му помогне да се забрза овој процес.

Дури и иднината на Фил Фоден е доведена во прашање, а за него се заинтересирани Реал Мадрид и Баерн Минхен. Понуда од 150 милиони евра би можела да го натера англискиот клуб да се збогува и со него.

Гвардиола неодамна го продолжи договорот со Манчестер Сити и покрај тековната криза во клубот.