Во Баерн сериозно размислуваат на лето да се разделат со две ѕвезди, Серж Гнабри и Лерој Сане, пренесува доброинформираниот „Билд“.

Раководството на клубот не е задоволно од придонесот на двајцата фудбалери и се спремни да слушнат понуди за нив на лето.

Гнабри минатото лето потпиша нов договор со Баварците, но клубот долго се колебаше дали да ги прифати неговите финансиски услови поради променливите партии. Пред Мундијалот тој имаше 10 гола и 11 асистенции, но после Мундијалот има само еден гол и тоа од пенал.

Од друга страна Сане требаше да биде прва ѕвезда во тимот после неговото доаѓање од Манчестер Сити, но и тој оваа сезона не ги исполнува очекувањата.

Поради тоа Баерн е спремен да ги продаде на лето доколку пристигнат задоволителни понуди за нив.

Дефанзивецот на Јувентус, Данило стави потпис на нов договор и ја продолжи верноста со „старата дама“ до 2025 година.

31-годишниот Бразилец пристигна во Јувентус од Манчестер Сити во 2019 година и од тогаш е стандарден во тимот. Оваа сезона е еден од најдобрите поединци во тимот на Алегри и често ја носи капитенската трака, па клубот му понуди нов договор.

„Дух, воинственост, лудер. Овие три збора го опишуваат фудбалерот Данило, но исто така и човекот Данило. Тој од неговото пристигнување ја покажува приврзаноста кон нашите бои“, стои во соопштението на клубот.

Англискиот премиерлигаш Челзи е заинтересиран за голгетерот на Јувентус, Душан Влаховиќ.

Клубот од „Стенфорд Бриџ“, својата понуда за Србинот ќе ја достави во летниот преоден рок, и тој би можел да биде замена за Ромело Лукаку кој игра на позајмица во Интер, но не е сигурно дека повторно би се вратил во Челзи.

Тренерот на лондончани Греам Потер е во потрага по напаѓач бидејќи Челзи на 24 натпревари во Премиер лигата има постигнато само 23 гола.

Информациите од медиумите во Англија велат дека голема е веројатноста 23-годишниот Влаховиќ веќе следната сезона да го облече дресот на Челзи.

Фудбалерот на Ливерпул и репрезентативец на Холандија, Вирџил ван Дајк, признава дека е во лоша форма поради големиот број на натпревари кои ги одигра оваа сезона.

„Одиграв премногу натпревари, и едноставно моето тело се скрши. Ова е темпо кое не може да се издржи. Пребрзо се вратив на теренот после тешката и комплицирана повреда. Требаше да направам пауза пред Светското првенство во Катар. Не направив пауза затоа што сакам да играм и да му помогнам на мојата екипа најповеќе што можам “, изјави Ван Дајк.

 Холандскиот дефанзивец во Ливерпул пристигна во 2018. година од Саутемптон за 85 милиони евра. Оваа сезона тој се најде под големи критики од фудбалската јавност после лошите резултати на клубот од „Енфилд“.

Тренерот на Реал Мадрид, Карло Анчелоти, во изјава после поразот на неговиот тим од Барселона со 1:0 во првиот полуфинален натпревар од Купот на кралот, вели дека каталонците среќно стигнале до победата.

„Охрабрува како го одигравме натпреварот. Секако дека не сме задоволни од резултатот, но ако и во реваншот играме вака тогаш мислам дека ќе се пласираме во финалето. Овај резултат не е реален. Барса не направи ништо пред нашиот гол, и имаше среќа при погодокот. Игравме одлично, но тешко беше да се најде простор за напад бидејќи дефанзивата на Барселона беше цврста“, изјави Анчелоти.

Реванш помеѓу двата големи ривали се игра на 5. април во Барселона.

Жоао Мендеш, 18-годишниот син на поранешниот легендарен фудбалер на Барселона, Роналдињо, потпиша договор со каталонскиот клуб.

Тој игра на позицијата напаѓач,а беше член на академијата на бразилскиот клуб Крузеиро, меѓутоа минатата година го раскина договорот.  

Мендеш потпиша договор со Барселона, 15 години откако неговиот татко го напушти овај легендарен клуб.

Роналдињо со Барселона има освоено две титули првак на Шпанија и Лига на шампиони во 2006.година.

Матео Ковачиќ на лето може да го напушти Челзи, но да остане во Премиер лигата.

Според најавите „сините“ се спремни да го пуштат 28 годишниот Ковачиќ на кого договорот му истекува следното лето доколку пристигне понуда од 35 милиони евра.

Челзи го купи Енцо Фернандез во јануари, па јасно е дека минутажата на Ковачиќ додатно ќе се намали, па и тој е спремен да ја промени средината. Најсилен интерес за Хрватот покажува Манчестер Сити, бидејќи Гвардиола е голем симпатизер на неговите квалитети.

„Граѓаните“ сакаат да ја искористат ситуацијата и веќе стапиле во контакт со неговиот агент и веќе работат на трансферот.

Атлетико Мадрид е силно заинтересиран за крилниот напаѓач на Вулверхемптон, Адама Траоре, пренесуваат шпанските  медиуми.

„Јорганџиите“ веќе започнале преговори со неговиот агент и сакаат на лето да го доведат Траоре, кој е продукт на школата на Барселона. Договорот на 27-годишниот Траоре истекува на крајот на сезоната, па тој како слободен агент може да пристигне на „Ванда Метроплитано“.

Траоре минатата сезона играше на позајмица во Барселона, каде на почетокот покажа неколку добри партии, но Каталонците не ја искористија опцијата за откуп, па Шпанецот се врати во Вулверхемптон.

Сега ќе има можност повторно да се врати во Примера, а Атлетико му нуди тригодишен договор.

Бернардо Силва, наводно, би можел да го напушти Манчестер Сити на лето поради прифатлива понуда од некој друг европски гигант.

Се чини дека Барселона ќе има убава шанса ова лето да тргне по потписот на Португалецот, со оглед на интересот кој го има кон него подолг период.

Играчот од средниот ред на Манчестер Сити е високо ценет од челниците на Барселона и тие се многу заинтересирани да го ангажираат ова лето. Според весникот Спорт, Пеп Гвардиола е подготвен да го продаде Силва ова лето, под услов да се добие прифатлива понуда.

Португалецот има уште две години од актуелниот договор со шампионот во Премиер лигата, па тие не се под притисок да го продадат уште ова лето доколку не добијат екстра-понуда, што може да биде проблем плус за Барса.

Јувентус е незадоволен од настапот на аргентинскиот играч за врска Леандро Паредес. Според новинарот Николо Шира, торинскиот клуб нема да го откупи договорот на играчот на ПСЖ и ќе го рати во Париз по завршувањето на сезоната.

Една од главните причини за завршувањето на неговиот престој во Италија е и неговата висока плата од 7 милиони евра годишно. На крајот од сезоната, аргентинскиот играч за врска ќе мора да се бори за место во ПСЖ или да бара нов клуб.

28-годишниот Паредес оваа сезона забележа 28 настапи за Јувентус во сите натпреварувања.