Англиската Федерација покрена истрага против фудбалерот, Иван Тони, за прекршување на правилото за обложување.

Тој се обложил точно 262 пати пред да пристигне во Премиер лигата во периодот од 2017-та до 2021-ва година а казната ќе стапи на сила при донесувањето на конечната одлука на ФА.

Напаѓачот на Брентфорд е трет најдобар стрелец во Премиер лигата со 14 постигнати голови колку што има и играчот на Манчестер Јунајтед, Маркус Рашфорд.

Жозе Мурињо доби два натпревари суспензија и парична казна од 10.000 евра поради испадот во натпреварот против Кремонезе.

Рома на дуелот со Кремонезе беше поразена со 2-1 и тоа беше прва победа за овој тим во првенството сезонава. Мурињо беше исклучен на почетокот на второто полувреме по расправија со четвртиот судија. Португалецот беше исклучително бесен на Марко Сера (четвртиот судија). По нивната расправија главниот судија го испрати Португалецот на трибините.

Мурињо по натпреварот тврдеше дека бил жестоко навреден како никогаш претходно на еден натпревар, но не откри што точно му кажал Сера. Најави Жозе и судска постапка, но секако суспензијата ќе мора да ја испочитува, секако и паричната казна.

После одржаната жребка, Манчестер Јунајтед во четвртфиналето на ФА купот како домаќин ќе игра против тимот на Фулам.

Фудбалерите на Манчестер Сити на свој терен ќе се сретнат со второлигашот Барнли, четвртолигашот Гримзби како гостин ќе патува на дуел со Брајтон, додека Шефилд Јунајтед ќе игра против Блекбурн.

Четвртфиналните натпревари се закажани за 18.март.

Шпанските медиуми пренесуваат дека поранешниот селектор на Шпанија, Луис Енрике, би можел да биде нов тренер на Атлетико Мадрид.

Енрике е без ангажман откако поднесе оставка на местото селектор на Шпанија после неуспехот на Мундијалот во Катар.

Информациите од медиумите велат дека на Енрике му е понудено да го преземе Атлетико, доколку Диего Симеоне на крајот од сезоната го напушти клубот од Мадрид.

Луис Енрике претходно ги има водено екипите на Барселона, Селта и Рома.

Првиот човек на фудбалскиот состав Монца, Силвио Берлускони, сака да продаде дел од акциите за да донесе „свеж“ капитал и да ги покрие зголемените трошоци со играњето во Серија А.

Тој бара инвеститори кои ќе му помогнат на семејниот холдинг –  „Фининвест“ во покривање на растечките трошоци потребни за поддршка на Монца.

Поранешниот италијански премиер го презеде клубот 2018 година кога играше во третолигашката конкуренција.

Реал Мадрид е силно заинтересиран за играчот на Њукасл и бразилски репрезентативец, Бруно Гимараеш.

25-годишниот играч за врска игра фантастично и го привлече вниманието  на многу европски гиганти. После заминувањето на Каземиро, Анчелоти верува дека неговиот сонародник ќе биде идеална замена и сака да го донесе на „Сантиаго Бернабеу“.

Реал е во потрага по квалитетен играч за врска, а со оглед на фактот дека Белингам е премногу скап, „кралевите“ сега ќе се насочат кон Бруно Гимараеш.

Јувентус покажува дека е заинтересиран за 20-годишниот дански фудбалер Расмус Хојлунд кој во сезонава постигна 13 гола во дресот на Аталанта.

Станува збор за одличен напаѓач за кого се заинтересирани и луѓето од Милан и Рома.

„Старата дама“  го гледа младиот играч како евентуална замена за Душан Влаховиќ, кој веројатно во текот на летото ќе замине во друг состав.

Фудбалерот на Наполи, Квиша Кварацхелија, кој има блескава сезона, влегува во радарот на англиските состави Манчестер Сити и Њукасл, објави новинарот на „CBS Sports“ – Бен Џејкобс, во неговата последна колумна.

Интернационалецот од Грузија се уште не размислува да ја промени средината иако дел од гигантите сакаат да дојдат до неговиот потпис. Се очeкува италијанскиот тим за слободата на Кварацхелија да бара повеќе од 100 милиони евра.

„Нема сомневање дека ќе има многу опции на лето. Но, Наполи е совршен клуб за Кварацелија во моментов“, напиша Џејкобс.

Англискиот Би-Би-Си пренесува дека голманот на Вест Хем Јунајтед, Лукаш Фабијански, се здоби со скршеница на јагодичната коска и можеби е потребна да оди на операција.

Полскиот репрезентативен голман повредата ја доби на саботниот дуел во Премиер лигата против екипата на Нотингем Форест. Тренерот на популарните „чекани“, Дејвид Мојес изјави дека не знае со сигурност колкав период Фабијански ќе биде надвор од теренот.

Голот на Вест Хем во наредниот период ќе го брани вториот голман во тимот, Алфонс Ареола. Во следното коло клубот од Лондон му гостува на Брајтон.

Тренерот на Манчестер Јунајтед, Ерик тен Хаг, сака да ги доведе на Олд Трафорд Виктор Осимен и Мохамед Кудус.

После пристигнувањето на 53-годишниот тренер на клупата на Јунајтед, екипата забележува одлични резултати и конечно после подолг период освои трофеј после победата во англискиот Лига Куп. Тимот останува да се натпреварува на три фронта, и челниците на клубот сакаат да му овозможат на тренерот дополнителни засилувања за наредната сезона.

Според информациите од англиските медиуми, Тен Хаг и клубот се заинтересирани за доведување на двајца африкански фудбалери, Виктор Осимен од Наполи и Мохамед Кудус од Ајакс.

Осимен игра во извонредна форма во дресот на Наполи каде сезонава има постигнато 24 гола, додека Кудус за Ајакс има постигнато 6 гола на 32 натпревари.