Ентони Марсијал постигна еден од двата гола при победата на неговата екипа над Нотингем Форест со 2:0 во реваншот од четвртфиналето на Карабао Купот.

На овој начин Французинот му помогна на својот тим да стигне до финалето на турнирот. Тоа беше негов 85. гол за Манчестер Јунајтед во неговиот 282. натпревар во сите натпреварувања.

Така тој се израмни со Дејвид Бекам во рангирањето за фудбалери со најмногу голови во историјата на „црвените ѓаволи“. Тие двајца сега ја делат 25-та позиција на вечната ранг-листа. Сепак, Марсијал и понатаму е далеку од лидерите на оваа ранг листа, на која на чело е Вејн Руни со 253 гола, пред Боби Чарлтон со 249 и Денис Лоу со 237.

Челзи ја имаше една од најпрометните зимски трансфер периоди во својата историја. Од Челзи потрошија околу 329,5 милиони евра за јануарски засилувања, без бонуси, повеќе од сите клубови во германската Бундес лига, италијанската Серија А, Француската Лига 1 и шпанската Ла Лига заедно.

Да потсетиме дека во зимскиот преоден рок, Челзи потпиша со Енцо Фернандез (121 милиони евра), Михаило Мудрик (70 милиони евра), Беноа Бадијашиле (38 милиони евра), Нони Мадуке (35 милиони евра), Мало Густо (30 милиони евра), Андреј Сантос (12,5 милиони евра), Давид Датро Фофана (12 милиони евра) и Жоао Феликс (позајмица за 11 милиони евра).

Челзи се наоѓа на 10. место на табелата во Премиер лигата. Избраниците на Греам Потер имаат осум победи и освоени 29 поени. Следниот натпревар лондонскиот тим го игра против Фулам на 3 февруари на домашен терен.

Весникот „Лекип“ објавува дека фудбалерот на Париз Сен Жермен, Килијан Мбапе, поради повреда најверојатно ќе го пропушти првиот натпревар од осмина-финалето во Лигата на шампиони против Баерн Минхен.

Мбапе се повреди на првенствениот натпревар против Монпеље и беше приморан да го напушти натпреварот во 21.минута. После најновите прегледи од лекарскиот тим на ПСЖ, е утврдено дека тој ќе треба да отсуствува од фудбалските терени најмалку три недели.

Натпреварот помеѓу Париз Сен Жермен и Баерн ќе се одигра на 14.февруари во Париз.

Фудбалерот на Челзи, Михајло Мудрик,  ќе биде под истрага на ФА поради клипот од јули 2022 година во кој ги цитира стиховите на песната „Слободен стил“ во кои го има зборот – „црнец“, кој ФА го оквалификува како неприфатлив.

Споменатиот клип на Мудрик беше прегледан 214.000 пати пред да го симне. Поранешниот играч на Шахтјор (Доњецк) дури се извини што го употребил дотичниот збор.

Украинецот беше критикуван и од групата – „Kick It Out“ која се бори против расизмот во фудбалот.

Францускиот весник „Ле Паризиен“, објавува дека францускиот репрезентативец Рафаел Варан ќе објави крај на настапите во националниот дрес.

Според информациите од весникот, фудбалерот решил да стави крај на репрезентативниот фудбал поради чувството на физичка и психичка преоптовареност. Освен тоа, Варан би сакал да му посвети повеќе време на своето семејство.

29-годишниот Варан кој настапува за екипата на Манчестер Јунајтед, е светски шампион со Франција од 2018.година, и освојувач на Лигата на нации во 2021.година.

Раководството на фудбалскиот клуб Милан ги демантира информациите дека се прекинати преговорите со португалскиот напаѓач Рафаел Леао, околу продолжување на неговиот договор.

Оваа шпекулација ја негира и адвокатот на Леао, Тед Димвула, кој изјави дека неговиот клиент сака и во иднина да остане во Милан.

„Имаше многу полувистини и лажни информации низ италијанските медиуми, кои за цел имаа да ги саботираат преговорите на двете страни околу продолжување на соработката. Приоритетот на Леао не е променет и тој сака да остане во Милан каде и понатаму ќе се развива како играч“, изјави адвокатот на фудбалерот.

Рафаел Леао игра за росонерите од 2019. година, каде пристигна од француски Лил, а претходно тој настапуваше за Спортинг од Лисабон.

Англискиот фудбалски клуб Челзи, официјално го претстави своето ново засилување, Аргентинецот Енцо Фернандез.

Фернандез стана нов играч на лондонскиот премиерлигаш во последниот ден од јануарскиот преоден рок, кога за рекордни 121 милиони евра пристигна од Бенфика. Неговиот договор со Челзи е потпишан на осум и пол години, и тој ќе го носи дресот со број 5.

„Му благодарам на Челзи и на сопствениците на клубот, кои направија се што е возможно за да бидам дел од овој проект, и да настапувам во Премиер лигата. Со нетрпение чекам да заиграм пред нашите фанови и да им помогнам на моите соиграчи на теренот“, порача Фернандез.

Фудбалерот на Брајтон, Мојсес Каиседо, повторно тренира со првиот тим, откако во преодниот рок беше блиску до трансфер во Арсенал.

Челниците на Брајтон ја одбија понудата од Арсенал вредна 70 милиони фунти за 21 годишниот Еквадорец, останувајќи на ставот дека играчот не е на продажба, и покрај неговата желба да ја напушти екипата.

Зимскиот преоден рок во Англија беше завршен во вторникот навечер.

Шпанските медиуми објавија „бомбастична“ вест дека Марско Асенсио е пред трансфер во ПСЖ. Повредата на Нејмар го натера ПСЖ итно да реагира на трансфер пазарот и сакаше да го доведе Асенсио во Париз.

Шпанецот е во последната година од договорот со Реал Мадрид, па ПСЖ испратил понуда за неговиот потпис.

„АС“ открива дека Реал ја одбил понудата и не сака да се раздели со Асесио на средината од сезоната, иако играчот на лето може да замине без обештетување.

Самиот Асенсио не инсистирал на трансфер и потврдил дека сака да остане во Мадрид до крајот на сезоната.

Барселона оваа зима нема да потпише со дефанзивецот на Баерн Бенџамин Павар. 

На Каталонците многу им се допаѓа дефанзивецот на Баерн, но клубот размислува да го ангажира за следната сезона, што значи дека преговорите треба да се водат на лето, а не сега. 26-годишниот репрезентативец на Франција е заинтересиран за преселба во Барселона.

Павар оваа сезона за Баерн имаше 23 настапи во сите натпреварувања и постигна четири гола. Баерн се наоѓа на првата позиција  во германското првенство, пред Унион Берлин со еден бод предност.