Бразилецот Габриел Жезус истакнува дека е воодушевен што повторно игра како централен напаѓач во неговиот нов клуб Арсенал, откако пристигна од Манчестер Сити.

Жезус пристигна во Арсенал во летен трансфер вреден 45 милиони фунти. Тренерот на Арсенал, Микел Артета, на Бразилецот му ја додели позицијата централен напаѓач која му е омилена на фудбалерот и тој не го крие задоволството од неговите настапи.

„Конечно завршив со играњето на крилна позиција како во Сити и бразилската репрезентација. Ја променив мојата игра и добив поголема самодоверба. Знам дека е благослов да играм на повеќе позиции, но јас преферирам да играм како деветка.Сега повторно имам шанса да играм како централен напаѓач и повторно се смеам додека играм фудбал“, изјавува Жезус.

Англиските медиуми ја пренесуваат веста дека Манчестер Јунајтед постигнал договор со Реал Мадрид околу купувањето на бразилскиот фудбалер Касемиро.

Според деталите, Јунајтед за 30-годишниот играч од средината на теренот ќе плати 70 милиони евра, а Касемиро ќе потпише четиригодишен договор со плата од 18 милиони евра по сезона.

Големи се шансите Касемиро своето деби во новиот клуб да го има веќе во понеделник во дербито со Ливерпул на Олд Трафорд.

Шпанскиот спортски весник „Ас“пренесува дека уругвајскиот фудбалски репрезентативец Едисон Кавани, најверојатно својата кариера ќе ја продолжи во Виљареал.

35-годишниот Кавани во моментот е без ангажман бидејќи пред неколку месеци му истече договорот со Манчестер Јунајтед.

Според информациите, менаџерите на уругвајскиот фудбалер стапиле во контакт со претставници на Виљареал околу дефинирање на можниот трансфер. 

Кавани пред Манчестер Јунајтед има настапувано за ПСЖ, Наполи, Палермо.

Повратникот во англиската Премиер лига, Нотингем Форест, му плати 50 милиони евра на Вулверхемптон за ангажман на офанзивниот фудбалер Морган Гибс-Вајт.

Некогашниот двократен европски првак досега на засилувања потроши над 168 милиони евра, а заклучно со Гибс-Вајт во клубот ова лето стигнаа 16 нови фудбалери.

Повеќе пари од Нотингем Форест за засилувања во Премиер лигата има потрошено само Челзи кој ова лето издвои над 186 милиони евра.

Напаѓачот Џовани Симеоне се пресели од Верона во Наполи со позајмица. Клубот на Неапол ова го пренесе на својата официјална страница на социјалните мрежи.

Според извори, Наполи ќе и плати на Верона околу 3 милиони евра за позајмицата.Исто така, договорот меѓу клубовите содржи задолжителна опција за откуп во износ од 12 милиони евра. Договорот на Симеоне со наполитанците ќе важи до 2027 година, а неговата годишна плата ќе биде 1,7 милиони евра

Минатата сезона Џовани Симеоне, кој е син на тренерот на Атлетико Мадрид, Диего Симеоне, одигра 35 средби во италијанската Серија А. Фудбалерот постигна 17 гола и пет асистенции. Порталот Трансфермаркт го проценува напаѓачот на 17 милиони евра.

Португалскиот репрезентативец Матеус Нунес е нов фудбалер на Вулверхемптон, потврди клубот.

Нунес во редовите на англискиот премиерлигаш пристигнува во трансфер вреден 45 милиони евра, плус пет милиони евра како потенцијален бонус што е нов рекорд кога е еден трансфер на Вулвс во прашање.

Претходниот рекорд го држеше уште еден Португалец, Фабио Силва кој пред две години пристигна од Порто за 41 милион евра.

Милан е силно заинтересиран за белгискиот играч за врска, Самби Локонга, кој минатото лето се пресели во Арсенал.

Локонга во првите неколку месеци играше редовно, но подоцна го загуби местото во првиот тим кај Артета.

22-годишниот играч за врска може да игра на сите позиции во средниот ред и веќе дебитираше за белгиската репрезентација.

Сега силен интерес за него покажува италијанскиот шампион Милан, кој во Локонга гледа идеална замена за Кеси.

Малдини веќе стапил во контакт со агентите на Белгиецот, кој е отворен за трансфер на „Сан Сиро“. „Росонерите“ наскоро ќе испратат и официјална понуда, а го сакаат Локонга на позајмица со право на откуп.

Откако се прошири веста дека моменталните сопственици на Манчестер Јунајтед, семејството Глејзер од САД, размислуваат за продажба на клубот за шест милијарди фунти, веднаш се појави и потенцијален купувач во името на Сер Џим Ратклиф.

Ратклиф е британски милијардер, сопственик на хемиската групација „Инеос“, како и сопственик на фудбалските клубови Ница и Лозана. Името на Ратклиф неодамна се поврзуваше и со купување на Челзи но тој не успеа во таа намера иако имаше понуда од 4,25 милиони фунти, па сега сака повторно да ја искористи шансата за купување на клуб од Премиер лигата.

Останува да се види дали семејството Глејзер ќе се одлучи за дефинитивна продажба на Манчестер Јунајтед.

Напаѓачот на Севиља, Мунир Ел Хадади е блиску до заминување од тимот. Според шпанското издание на „Мундо Депортиво“, играчот наскоро ќе се пресели во Хетафе.

Главната причина за заминувањето на играчот од Севиља е фактот што тој не се вклопува во шемата за игра што ја користи главниот тренер на тимот Хулен Лопетеги. Токму поради оваа причина, фудбалерот беше надвор од составот за натпреварот од 1. коло на шпанската Примера со Осасуна. Исто така еден од претендентите за ангажирање на Мунир Ел Хадади е турски Трабзонспор.

Мунир потекнува од школата на Барселона. Фудбалерот се пресели од каталонскиот тим во Севиља во јануари 2018 година за сума од околу еден милион евра. Минатата сезона, мароканскиот напаѓач одигра 16 средби, на кои постигна два гола. Порталот Трансфермаркт го проценува играчот на осум милиони евра.

Медиумите од Англија пренесуваат дека фудбалерот на Манчестер Сити, Бернардо Силва, се откажал од заминување во Барселона.

Според информациите постојат многу мали шанси португалскиот репрезентативец да се пресели на Камп Ноу поради што Силва се одлучил да се посвети на својата иднина во англискиот клуб.

Тренерот на Сити, Пеп Гвардиола повтори дека Силва може да го напушти клубот само со обештетување од 100 милиони евра, пари кои Барселона поради лошите финансиски проблеми не е во можност да ги издвои.

Заклучокот е дека многу извесно Силва ќе остане во Манчестер и повторно ќе биде еден од главните фудбалери во тимот.