Давид Алаба кој постигна гол на вчерашниот меч против Осасуна и мораше принудно да остане во соблекувалната на полувремето, нема посериозна повреда, изјави тренерот на Реал Мадрид, Карло Анчелоти.

„Оптимисти сме со Алаба, не изгледа дека е сериозно. Го болеше кај препоните и одлучивме да не ризикуваме“ , изјави тренерот на „белите“.

Реал Мадрид кој е на чекор да ја освои титулата во Примера Дивизион, наредната работна недела го очекува првата пресметка со Манчестер Сити во полуфиналето во Лигата на шампионите.

Серхио Агуеро, Дидие Дрогба, Винсент Компани, Питер Шмајхел, Пол Сколс и Јан Рајт ќе бидат нови членови на Куќата на славните во Премиер лигата. 

Тие ќе им се придружат на Вејн Руни и Патрик Виеира, кои претходно оваа година станаа дел од престижното друштво.

Првите играчи кои беа примени во Куќата на славните на Премиер лигата беа Тиери Анри, Алан Ширер, Дејвид Бекам, Денис Бергкамп, Ерик Кантона, Стивен Џерард, Рој Кин и Френк Лампард.

Играчот од средниот ред на Манчестер Јунајтед, Пол Погба, ги договорил личните услови со Париз Сен Жермен, околу негов трансфер во летниот период.

Според информациите од Франција, двете страни ќе потпишат четиригодишен договор, а 29-годишниот Французин во ПСЖ ќе пристигне како слободен играч од Манчестер Јунајтед.

Погба оваа сезона постигна еден гол и има девет асистенции на 25 натпревари за „црвените ѓаволи“. Неговиот договор со клубот е до 30 јуни оваа година.

Ѕвездата на Париз Сен Жермен, Лионел Меси веќе донел одлука за својата иднина. „Мундо Депортиво“ пренесува дека Аргентинецот планира да го исполни договорот и ќе остане во тимот на ПСЖ и следната сезона. Меси е подготвен наредната година да му помогне на екипата да го подигне пехарот во Лигата на шампионите.

Парижаните се на добар пат да ја освојат титулата во француското првенство оваа сезона. Меѓутоа ПСЖ повторно потфрли во Лигата на шампионите, каде во осминафиналето беше елиминиран од Реал Мадрид. 

Португалскиот гигант Бенфика посакува ова лето да го донесе во своите редови играчот на ПСЖ, Анхел Ди Марија.

Според извори блиски до Бенфика, 34-годишниот фудбалер може да се врати во португалскиот клуб како слободен играч. Сепак, Ди Марија ќе мора да прифати помала плата од сегашните 13 милиони евра годишно.

Ди Марија беше член на Бенфика од 2007 до 2010 година. Крилниот напаѓач дојде во ПСЖ од Манчестер Јунајтед во 2015. Актуелниот договор на играчот е до крајот на оваа сезона.

Аргентинецот сезонава запиша 25 натпревари за ПСЖ, постигнувајќи три гола и пет асистенции.

Дефанзивецот на Челзи и германската репрезентација, Антонио Рудигер би можел да му се приклучи на Реал Мадрид ова лето, објавува Марка.

Од Шпанскиот гигант се надеваат дека доведувањето на Рудигер  ќе ги реши проблемите во одбраната на тимот.

Раководството на Реал Мадрид е подготвено да ги засили преговорите со менаџерите на 29-годишниот фудбалер, и се надеваат дека тие ќе ги намалат финансиските барања за својот фудбалер со цел побрза реализација на трансферот.

Рудигер му се приклучи на Челзи од Рома во 2017 година. Тој забележа 28 натпревари во Премиер лигата оваа сезона и постигна 3 гола.

Англискиот „Мирор“ пишува дека челниците на Манчестер Јунајтед за својот иден тренер Ерик тен Хаг подготвиле околу 200 милиони фунти за летни трансфери на играчи. Според информациите, клубот ќе се обиде да го насочи вниманието кон иднината и наредната сезона, а не кон сегашните резултати на тимот.

Во екипата на Јунајтед летово се очекуваат големи промени. Играчи кои веќе со сигурност ќе заминат од клубот се Пол Погба, Немања Матиќ, Џеси Лингард, Едисон Кавани и Хуан Мата.

Серхио Рамос направи грешка што го напушти Реал Мадрид во Пари Сен Жермен и тој самиот го знае тоа, според поранешниот играч од средниот ред на „белиот балет“, Хозе Марија Гутиерез-Гути.

„Рамос знае дека направи грешка што отиде предалеку во преговорите за нов договор со Реал. Мислеше дека со оглед на неговата кариера и достигнувања, Флорентино Перез ќе го направи она што го сака играчот. Но, тој не знае дека за претседателот, клубот е пред се. Во принцип, кога ќе се достигне одредена возраст, договорите на сите играчи таму се продолжуваат за една година, но Серхио не го сакаше тоа. Тој навистина е легенда на Реал и веројатно има право да се однесува така. Можеше да ја заврши кариерата во Реал, но не ја искористи шансата. И излезе од задната врата“, му рекол Гути на Ел Чирингито.

Дефанзивецот минатото лето го напушти „Бернабеу“ како слободен играч и се пресели во Пари Сен Жермен, но неговата игра се уште е многу ограничена поради повреди. Неговиот договор е до летото 2023 година.

Милан би можел да биде продаден на инвестициската компанија Инвесткорп со седиште во Бахреин. Во овој случај, во летниот преоден рок, составот на италијанскиот клуб може значително да се засили, објави „Газета Дело Спорт“.

Според изворот, доколку клубот биде продаден на лето, Милан ќе се обиде да го ангажира играчот за врска на Манчестер Сити, Рахим Стерлинг, како и крилото Марко Асенсио и офанзивниот играч за врска Иско, кои играат за Реал Мадрид. Договорот на Рахим Стерлинг со Манчестер Сити истекува во летото 2023 година. Иско на крајот од сезоната би можел бесплатно да го напушти Реал Мадрид.

Претходно имаше информации и за интерес на Милан за Марко Асенсио. Според изворот, Милан би можел да добие околу 300 милиони евра за трансфери од новиот сопственик.

Раководството на Манчестер Сити планира во договорот со Ерлинг Холанд да вклучи и посебна клаузула која ќе му овозможи да замине кога ќе посака во Реал Мадрид.

Клубот од Етихад верува дека за неколку дена ќе го договори трансферот на норвешкиот напаѓач. Тој биде најскапиот играч во Премиер лигата со плата од 500.000 фунти неделно.

Англискиот состав ќе и плати 64 милиони фунти на Борусија Дортмунд плус уште 40 милиони за провизии на агентот за трансфери, Мино Раиола и таткото на Халанд.