Клаудио Раниери и официјално е нов предводник на италијанскиот гигант, Рома.

Раниери ја прифати понудата и се враќа од пензија за да му помогне на тимот кој е во незавидна ситуација и во моментов е на дванаесеттата позиција во Серија А.

Славниот фудбалски стрчњак минатата сезона реши да престане со тренерската работа откако му завршија обврските во Каљари, но не можеше да одолее на повикот од неговата „стара љубов“ – Рома, каде веднаш беше пречекан со воодушевување од бројките навивачи. За Раниери ова ќе биде трета етапа на клупата на „волчицата“.

Рома се раздели со Иван Јуриќ, а со Раниери на клупата управата се надева дека екипата ќе може конечно да заигра подобро и да се вратат во трката за местата кои водат во еврокуповите.

Според извештаите од Шпанија, Чаби Алонсо ќе го напушти Баер Леверкузен на крајот од сезоната 2024/25. Поранешниот играч од средниот ред на Ливерпул и Реал Мадрид е еден од најпочитуваните млади тренери откако минатата година ја предводеше германската екипа до сезона без пораз во домашното првенство.

Актуелниот договор на шпанската легенда со шампионот во Бундеслигата истекува во летото 2026 година, но според Еуроспорт Шпанија, тој всушност ќе замине една година порано. Алонсо минатата сезона беше поврзуван и со Ливерпул и со Реал Мадрид по неговата извонредна работа со Баер Леверкузен, кој ја загуби шансата за невидена сезона без пораз во сите натпреварувања по поразот од Аталанта во финалето на Лига Европа, а тоа беше последен натпревар од сезоната.

Сепак, Еуроспорт го поврзува Алонсо со работата во Реал Мадрид која моментално ја има Карло Анчелоти. Договорот на италијанскиот стручњак на „Сантијаго Бернабеу“ исто така истекува во 2026 година, оставајќи нејасно дали Алонсо навистина ќе се врати во својот поранешен клуб.

Се верува дека Алонсо се уште нема јасен план за следната сезона и дека не го таргетирал Реал Мадрид како причина за заминување од Леверкузен, каде остави силен впечаток.

Селекторот на белгиската фудбалска репрезентација, Доменико Тедеско зборуваше за напаѓачите на тимот Ромелу Лукаку и Лоис Опенда пред натпреварот од 5. коло во Лигата на нации со репрезентацијата на Италија.

Лукаку и Опенда во нападот одеднаш? Постојат многу опции. Лоис очигледно е еден од нашите најважни напаѓачи. Лукаку е вистински лидер, неговото присуство на теренот дава енергија, ги инспирира сите, изјави Тедеско за сајтот на УЕФА.

Триесет и едногодишниот Лукаку за репрезентацијата на Белгија одигра 113 натпревари, постигна 92 гола и 14 асистенции.

Дваесет и четиригодишниот Опенда на 24 натпревари за Белгија има три гола и една асистенција.

Белгијците и Италијанците ќе се сретнат на стадионот „Крал Бодуен“ во Брисел вечер со почеток во 20:45 часот.

Овој натпревар е од А Лигата на нации, петто коло во втората група. Италија е лидер по четири кола со 10 бода, Франција има 9, Белгија 4, Израел е без освоен бод.

Младата репрезентација на Македонија до 21 година загуби со 1-3 на домашен терен од соодветната селекција на Косово во рамките на првата контролна пресметка помеѓу овие две селекции.

Избраниците на селекторот Драги Канатларовски одлично го започнаа мечот и сосема заслужено рано во 16. минута поведоа со 1-0. Стрелец на погодокот беше Никола Величковски. Во 29. минута, Арјанит Фазлија стрелаше за изедначување на резултатот.

Во 66. минута, Косово преку Куртиши прави комплетен пресврт и доаѓа до предност од 1-2. Куканај ги поставува конечните 1-3.

Македонија и Косово ќе одиграат уште еден контролен натпреваро во Скопје, на 17 ноември.

Младата репрезентација на Македонија до 18 години (фудбалери родени 2007 година) ќе одработи тренинг камп во Кичево.

Тренинг кампот во Кичево ќе се одржи во периодот од 13 до 18 ноември.

Во склоп на самиот тренинг камп, ќе биде одигран и еден контролен тест меч против тимот на Арсими.

Селекеторот на младата репрезентација на Македонија до 18 години, Ерхан Селими за претстојниот тренинг камп, се одлучи да ги повика следните фудбалери:

Давид Илоски-Брера
Онур Бешир- Шкендија
Павел Трајковски -Македонија ЃП
Андреј Наумовски – Гостивар
Златко Радевски – Вардар
Мустафа Зекировски – Нирнберг
Абдула Аслани – Лингби
Мичо Поповски – Вардар
Давид Стојаноски – Браво
Лука Атанасовски – Вардар
Назиф Цека – Шкендија
Емир Шаботиќ – Вардар
Каменчо Андоновски – Брера
Марко Киш – Њу Старс
Албион Муслиу – Шкендија
Ариф Локи – Кобе
Алмир Јакупи – Арау
Јасин Рушати – Хамбург
Аритон Мемети – Шкупи
Лука Гавровски – Шкендија
Бојан Ристовски – Шкендија
Адмир Латифи – Беса
Стефан Младеновски – Црвена Ѕвезда
Хисар Али – Беса

Андрес Иниеста објави дека тој и неговата компанија „Никогаш не кажувај никогаш“ (NSN) го купиле данскиот фудбалски клуб Хелсингер.

Клубот е основан во 2005 година. Екипата своите домашни натпревари ги игра на „Хелсингер Стадион“ со вкупен капацитет од повеќе од 4.000 гледачи.

Во моментов Хелсингер игра во третата по квалитет лига во Данска. Во сезоната 2017/18 учествуваше во данската Супер лига.

-Фудбалот и спортот воопшто се она што ни се допаѓа. Тоа што го кажуваат е многу позитивно. Уверен сум дека можам да му се приклучам на клубот и да се обидам да го донесам целото наше искуство стекнато во различни услови и да се обидам да го развивам и подобрувам клубот, изјави Иниеста за „Sport TV2“.

Иниеста се повлече од играњето во октомври оваа година на 40-годишна возраст. Неговиот последен клуб беше Емирати од ОАЕ.

Како дел од Барселона, Шпанецот девет пати стана шампион на Шпанија, шест пати го освои Купот на Шпанија и четири пати ја освои Лигата на шампионите. Тој е и светски шампион и двократен европски шампион.

Главниот советник на сопствениците на Милан Златан Ибрахимовиќ даде интервју за официјалниот магазин на Лигата на шампионите во кое зборуваше за амбициите на седумкратниот шампион на турнирот. Легендарниот напаѓач истакна дека миланскиот гигант сака да се врати во своето славно минато во Европа, но и прецизираше дека е потребно време за тоа да се случи.

-Милан е дел од фудбалската историја, а ние сме само уште една генерација која ќе замине. Минатото го внесуваме во сегашноста и ги комбинираме. Ова е она што го прави Милан. Сакам да ја искористам оваа прилика да им се заблагодарам на Силвио Берлускони и Адријано Галијани, бидејќи ние сме тука благодарение на нив. Верувам во овој проект и во она за што се залага Милан, вели Ибрахимовиќ за „УЕФА Чемпионс лиг Магазин“.

Вели дека ја дели истата визија со луѓето кои работат во тимот, кои сакаат да постигнат извонредни работи и да испишуваат историја.

-Кога зборуваме за победи, тоа ме прави да се чувствувам жив. Од позицијата на која сум во моментов, не можам да му помогнам на тимот да победи, но имам уште многу да научам и тоа го правам со понизност. Се чувствувам поврзан со Милан на посебен начин и по завршувањето на мојата кариера и сакам да направам големи работи со овој тим. Сум играл во многу клубови, исклучителни, но тој што ми даде најмногу во кариерата е Милан. Поминав два приоди како фудбалер овде и го ценам она за што се залага овој клуб. Првиот пат ја почувствував радоста на играта, а вториот пат ја почувствував љубовта. Сега сакам да вратам нешто. Горд сум, среќен и амбициозен што помагам и враќам, додаде популарниот Ибра.

Фудбалерите на Шпанија ги очекуваат последните два меча во Лигата на нации. „Фуријата“ ќе игра со Данска и Швајцарија а нејзиниот селектор, Луис де ла Фуенте, верува дека ќе бидат остварени две победи.

„Реков дека натпреварување е тешко, нема групна фаза, ние сме меѓу шеснаесетте најдобри селекции во Европа. Сите мечеви во плеј-оф се многу тешки. Имаме одлична генерација и максимално се обидуваме да го искористиме квалитетот“, рече Фуенте.

Поранешниот голман на Баерн Минхен и германската фудбалска репрезентација, Оливер Кан, го предупреди актуелниот чувар на мрежата на Баварците, Мануел Нојер да не го пропушта вистинскиот момент за пензионирање, пишуваат германските медиуми.

„Никој не сака да биде исвиркуван на стадионот на крајот од кариерата“, изјави Кан.

Поранешниот репрезентативец додаде дека „совршениот тајминг“ би бил на крајот од оваа сезона доколку Баерн може да ја освои титулата во Лигата на шампионите на својот стадион.

Кан, исто така, го предупреди Нојер дека неговата форма може драстично да падне по неговото повлекување од националниот тим.

„Не ме чуди што на некои од натпреварите оваа година не ја гледаме формата на Мануел од претходните сезони“, додаде Кан.

Селекторот на Италија, Лучијано Спалети очекува победа во натпреварот од Лигата на нации против Белгија.

„Одиме во Белгија за да победиме, нема да се задоволиме со еден бод. Треба да имаме правилен начин на размислување и да не земаме ништо здраво за готово“, изјави Спалети.

Натпреварот Белгија – Италија ќе се одигра утре (14 ноември) со почеток во 20:45 часот.