Aнхел Ди Марија на крајот на сезоната би можел да го напушти Јувентус по истекот на договорот.

Аргентинскиот офанзивец неколку недели наназад изјавуваше дека нема проблем да остане во Торино и дека му е убаво во Јувентус, но со Италијанците тврдат дека ситуацијата се променила со елиминацијата од Севиља во полуфиналето од Лигата на Европа.

Наводно, во Јувентус не се задоволни од играта на Ди Марија и покрај тоа што во текот на сезоната токму тој беше еден од најдобрите фудбалери на тимот. Ди Марија во Јувентус пристигна бесплатно од ПСЖ, а оваа сезона одигра 37 натпревари и оствари учинок од осум голови и седум асистенции во сите натпреварување.

Сепак според последните информации кои ги објави Фабрицио Романо заминувањето на Ди Марија изгледа како реална опција во овој момент.

Тренерот на фудбалерите на Баерн Минхен, Томас Тухел, најави дека ќе остане на кормилото на Баварците без разлика дали ќе ја освои титулата во Бундес-лигата икао шансите за тоа се речиси еднакви на нула.

Неговиот тим во текот на викендот загуби дома од РБ Лајпциг додека Борусија Дортмунд славеше на теренот на Аугсбург и го презеде челното место на табелата со два бода предност. Во последното коло „милионерите“ ќе играат дома со Мајнц додека четата на Тухел ќе гостува кај Келн.

„Не бегам од одговорност. Раководството ми даде до знаење дека ќе продолжиме да работиме заедно“, искоментира Тухел.

Џани Инфантино, претседателот на Меѓународната фудбалска организација (ФИФА), го поддржа играчот на Реал Мадрид, Винициус Жуниор и го осуди новиот чин на расизам против овој бразилски репрезентативец.

„Изразувам целосна солидарност со Винициус. Нема место за расизам ниту во фудбалот, ниту во општеството, а ФИФА цврсто стои на страната на сите играчи кои ќе се најдат во таква ситуација“, изјави Инфантино.

Винициус се соочи со дополнителни расистички напади за време на гостувањето на Реал Мадрид кај Валенсија викендов, што беше само продолжение на срамните ситуации во кои често се наоѓа Бразилецот во текот на актуелната сезона. Неколку хулигани од други шпански прволигаши исто така расистички го нападнаа Винисиус Јуниор претходно.

„Би сакал во тие моменти да се почитува протоколот на ФИФА. Прво прекинете го натпреварот. Потоа фудбалерите го напуштаат теренот и главниот најавувач на стадионот најавува дека натпреварот ќе биде прекинат доколку продолжат расистичките напади. Потоа натпреварот продолжува и доколку се повторат нападите, судијата дефинитивно го прекинува натпреварот, а три бода добива противничкиот тим“, додаде Инфантино.

Лучијано Спалети кој по цели 33 години го однесе Наполи до титулата во Серија „А“, на крајот на сезоната ќе си замине бидејќи не е задоволен од односот на првиот човек на клубот, Аурелио де Лаурентис.

Искусниот тренер проценил дека не може да има добра релација со челниците и дека тоа може да влијае врз фудбалерите.Затоа донел одлука да си замине од Неапол.

„Треба да размислувате вистински и да донесете одлука. Работата е завршена. Тоа не е одлука која падна од небо“, рече Спалети по вчерашниот триумф во дербито со Интер.

Обвинителството за фудбал во Италија побара Јувентус да биде казнет со одземање на 11 бода во Серија А, после најновото сослушување околу нерегуларностите во клубот од Торино.

Најновото барање на обвинителството доаѓа после претходната одлука за одземање на 15 бодови на Јувентус во јануари, која потоа беше отфрлена од највисокото спортско тело во Италија кое побара ново сослушување.

Одлуката на судот се очекува да биде изречена во текот на денот. После објавата за можното ново одземање на бодовите, акциите на „бјанконерите“ на миланската берза доживеаа пад од речиси 4.9%.

Во првенството на Италија, на Јувентус до крајот за одигрување му остануваат уште три натпревари, а во моментот екипата е на втората позиција со 69 бода.

Приоритет на Милан на крајот на сезоната ќе биде доведување на врвен напаѓач, пренесуваат италијанските медиуми.

Жиру е во поодминати години, Ориги не го оправда очекувањата, па Малдини сака да доведе млад и перскептивен напаѓач. Главна цел е младиот напаѓач на Салцбург, Ноа Окафор, кој го привлече вниманието на многу европски гиганти. Швајцарскиот репрезентативец на лето ќе влезе во последната сезона од договорот, па Салцбург е спремен да го пушти за 20 милиони евра.

Милан сака да ја победи конкуренцијата и веќе започнал преговори со неговиот агент.

Вчера Малага беше поразена со 2-1 на гостувањето кај Алавес во 41. коло од шпанската Сегунда и со тоа и официјално го потврди испаѓањето во третата лига на шпанскиот фудбал.

Алавес поведе во 46. минута со голот на Асиер Вилалибре, а Луис Муњоз израмни за Малага во 77. минута. Конечните 2:1 ги постави Тони Моја во 87. минута. Малага со овој пораз остана 19-та во првенствениот поредок со 43 освоени бодови, а пред крајот на првенството има седум бода помалку од Б тимот на Виљареал и Спортинг Хихон, па веќе немаат шанси да стигнат до место што гарантира спасение. Освен Малага, лигата ја напуштаат Луго, УД Ибица и Понферадина

Неизвесно е и на врвот, каде продолжува грчевитата борба за влез во Ла Лига. Гранада со 72 бода, Лас Палмас со 71, Алавес со 70 и Леванте со 69 ќе бараат клучни победи во последното коло за директен пласман во првата лига, а двете екипи кои нема да стигнат ќе одат во баражот.

Масимилиано Алегри проговори за својата иднина на кормилото на „бјанконерите“.

Јувентус има турбулентна сезона, не освои ниту еден трофеј, а сега ја чека казната и може да остане без пласман во Лигата на шампиони.

Веќе подолго време се шпекулира дека Алегри може да биде заменет на крајот на сезоната, а сега тој потврди дека сака да остане. „Имам уште две години од договорот со клубот и 100% останувам ако се прашувам јас. Но, јас одлучувам за себе, не можам да носам одлуки за други, менаџментот ќе одлучи на крајот“, изјави Алегри.

„Не можам да знам што мислат другите, јас го знам само мојот избор. Факт е дека наша задача на теренот е да обезбедиме пласман во Топ 4, а со победа против Емполи тоа и теоретски ќе биде потврдено“, додаде Алегри.

Брахим Дијаз, кој игра во Милан како позајмен фудбалер на Реал Мадрид, сака да остане во италијанскиот гигант.

Синоќа против Сампдорија Дијаз одигра одлично, запиша две асаистенции и постигна гол, а потоа појде пред навивачите и го бакна логото на клубот.

„Го бакнав логото бидејќи во тој момент го почувствував тоа. Среќен сум тука во Милан, се чувствувам многу добро во овој клуб, не знам што ќе се случи со Реал Мадрид“, изјави Брахим Дијаз. Двата клуба наскоро ќе седнат на преговарачка маса, бидејќи и Милан исто така сака да го задржи Шпанецот.

Иднината на Адриен Рабио во Јувентус е неизвесна бидејќи неговиот договор со „старата дама“ истекува на крајот на сезоната. Французинот има договор со Јувентус до крајот на сезоната, па многу е веројатно дека ќе замине како слободен агент.

Со оглед на фактот дека Французинот игра одлична сезона, за него постои интерес од многу клубови ширум Европа. Најсилен интерес за него покажуваат Ливерпул и Манчестер Јунајтед, кои веќе ја започнале битката за неговиот потпис.

„Црвените“ се во потрага по квалитетен играч за врска и сакаат да ја искористат ситуацијата да го доведат Рабио без обештетување.

Меѓутоа, Манчестер Јунајтед уште минатото лето го сакаше Французинот и Тен Хаг го убедува да се пресели на „Олд Трафорд“.