Паоло Дибала кој го постигна водечкиот гол за Рома на вчерашниот меч со Хелсинки во Лигата на Европа, доби пофалба од тренерот на „волчицата“, Жозе Мурињо.

Аргентинецот влезе во игра на стартот на вториот дел и веднаш во 47 минута успеа да ги израдува домашните навивачи.

„Дибала го постигна првиот гол и тоа го смени ставот на целиот тим. Бевме премногу пасивни но, Дибала веднаш ја промени играта“, потенцираше Португалецот по победата од 3-0.

Селекторот на фудбалската репрезентација на Англија, Герет Саутгејт, го објави составот на кој ќе се потпре за претстојните натпревари во Лигата на нации со Италија и Германија.

Напаѓачот на Брентфорд, Иван Тони, влезе во конкуренција. 26-годишниот играч за прв пат е повикан во националниот тим.

Капитенот на Манчестер Јунајтед, Хари Мегваер и соиграчот Лук Шо се вклучени во тимот и покрај тоа што не настапуваа редовно во последните натпревари. На списокот ги нема Маркус Рашфорд и Џејден Санчо.

Челниците на Ливерпул може да испратат понуда за младиот талент на Фламенго, Жоао Гомез, кој постепено се етаблираше како значаен фудбалер во тимот.

Тој има договор до 2025 година а сопствениците на бразилскиот гигант размислуваат да му понудат нов со огромна откупна клаузула само за да го задржат.

21-годишниот фудбалер кој проценува на 10 милиони евра, има 49 настапи и 2 асистенции во  шампионатот на Бразил.

Тренерот на Лидс Јунајтед, Џеси Марш, од страна на англискиот фудбалски сојуз доби забрана за водење на својот тим на еден натпревар од првенството.

Марш забраната ја доби поради своето однесување и протестите кон главниот судија на премиерлигашкиот натпревар со Брентфорд кој неговиот тим го загуби со 5:2. Тренерот на Лидс покрај суспензијата ќе мора да плати и 10 илјади фунти парична казна.

Следниот натпревар на Лидс Јунајтед во Премиер лигата е на 2.октомври против Астон Вила.

Тренерот на Манчестер Сити, Пеп Гвардиола, бил импресиониран од игрите на фудбалерот на Милан, Рафаел Леао, и сака да го доведе во редовите на англискиот шампион.

Гвардиола наводно им наложил на управата на клубот да започне преговори со Милан и со португалскиот фудбалер, со цел трансферот да се реализира во зимскиот преоден рок.

Манчестер Сити е подготвен да понуди сума од 100 милиони евра, и да направи феноменален тандем, Халанд-Леао.

Рафаел Леао има актуелен договор со шампионот на Серија А, Милан , до 2024 година.

Натпреварот од второто коло во фудбалската Лига Европа меѓу лондонски Арсенал и ПСВ од Ајндховен, кој беше закажан за 15 септември, но одложен поради смртта на британската кралица Елизабета Втора, ќе се одигра на 20 октомври, објави денеска УЕФА.     

Натпреварот во Лондон беше одложен поради „сериозни ограничувања на полициските ресурси и организациски прашања“ поврзани со смртта на британската кралица. 

УЕФА го утврди новиот термин откако претходно Премиер лигата го одложи првенствениот натпревар на Арсенал против Манчестер сити, кој требаше да се игра на 19 октомври. 

„УЕФА изразува благодарност до Премиер лигата и клубовите за соработката и флексибилноста со цел овој натпревар од Лига Европа да може да се вметне во календарот“, соопшти УЕФА.

Медиумите од Шпанија ја пренесуваат веста дека голгетерот на Реал Мадрид, Карим Бензема, нема да биде подготвен за настап на градскиот дерби натпревар против Атлетико Мадрид, претстојниот викенд.

Францускиот напаѓач се повреди минатата недела на гостувањето кај Селтик во Лигата на шампионите. Бензема добил препорака од медицинскиот тим на Реал Мадрид да се одмори до крајот на репрзентативната пауза, па така неговото враќање во тимот се очекува на почетокот од октомври.

Братот на францускиот фудбалер Пол Погба ги негираше обвинувањата дека се обидел да го ограби неговиот брат и од него да изнуди милион евра, но вечерва медиумите објавија дека тој е приведен како еден од осомничените.

Адвокатот на Матијас Погба, Ричард Арбиб во соопштението на својот клиент наведува дека ништо не знае за било каков обид за изнуда од неговиот брат Пол.

Обвинителството во Париз минатиот месец отвори истрага после информациите дека наводно Матијас и негов другар се обиделе од Погба да изнудат 13 милиони евра. Случајот стигна до јавноста затоа што Матијас на социјалните мрежи објави дека ќе открие многу работи за својот брат, се споменуваше и фрлање на „црна магија“ на Килијан Мбапе.

За целиот случај се огласи и Мбапе кој јасно порача дека тој му верува на својот соиграч од репрезентацијата со кој го освои Светското првенство во 2018. Нема и причин да не биде така зато што досега во кариерата Мбапе за среќа не се соочил со посериоза повреда.

Последните информации се дека Матијас би можел да му биде одредена мерка пpитвоp додека трае истрагата.

Фудбалерот на Баерн Минхен, Лукас Хернандез, ќе биде надвор од фудбалските терени неколку недели поради повредата на бутниот мускул, соопштуваат од баварскиот клуб.

Францускиот дефанзивец се повреди на натпреварот во Лигата на шампионите со Барселона кој Баварците го добија со 2:0. Хернандез беше стрелец на водечкиот гола за Баерн.

Италијанскиот гигант Јувентус има доста проблеми на почетокот од новата сезона како во Серија А така и во Лигата на шампионите каде по две одиграни кола има два порази, од ПСЖ и Бенфика.

Вчерашниот пораз од Бенфика на домашен терен го вклучи алармот кај навивачите кои веќе започнаа со барање на одговорност за честите порази. Дел од нив побараа и оставка од тренерот Алегри, но тој изјавува дека не размислува за оставка.

„Мора да најдам решение, и се чувствувам како дел од решението. Не мислев дека ќе имаме два порази по ред. Важно е да се подобриме и да останеме во Лигата на шампионите. Никогаш претходно не сум загубил два натпревари во групите од ЛШ, но за се постои прв пат. Во моментов не размислувам за оставка“, изјавува Масимилијано Алегри.