Менаџерот на Тотенхем, Антонио Конте одлучи да остави четворица играчи надвор од тимот за претсезонската турнеја во Јужна Кореја.

Хари Винкс, Серхио Регилон, Џовани Ло Селсо и Танги Ндомбеле ќе останат во Лондон и ќе продолжат да тренираат со резервите на Спарс.

Четворицата не спаѓаат во плановите на Италијанецот за следната кампања и ќе се бара опција за разделба со нив. Ло Селсо во вториот дел од минатата сезона мина позајмица во Виљареал, но „жолтата подморница“ засега не брза да ги откупи неговите права, иако е сакан од Унаи Емери.

Останатите играчи беа во составот и минатата година, но не успеаја да го импресионираат Конте. Тимот од северен Лондон беше исклучително активен на трансфер пазарот и веќе ги ангажираше Ричарлисон од Евертон, Иван Перишиќ од Интер, Ив Бисума од Брајтон и Фрејзер Фостер од Саутемптон.

Уште едно ново засилување во тимот, Клемент Ленгле исто така нема да биде дел од патувањето во Кореја бидејќи сè уште има документи околу неговиот трансфер што треба да се комплетираат.

После поминати шест години во Манчестер Јунајтед, францускиот репрезентативец Пол Погба од денес и официјално се врати во Јувентус, соопштуваат од италијанскиот клуб.

Погба во Торино пристигна како слободен играч откако му истече договорот со клубот од Олд Трафорд. Тој потпиша договор во траење од четири години и во тимот на старата дама ќе го носи дресот со број 10.

29-годишниот Погба за шест години во Јунајтед одигра 226 натпревари и постигна 39 гола. Со клубот беше освојувач на Лига Европа и англиски Лига Куп.

Англиските медиуми пренесуваат дека главните спонзори на Манчестер Јунајтед  не сакаат Кристијано Роналдо да го напушти клубот од Олд Трафорд.

Информациите велат дека на спонзорите не им се допаѓа идејата маркетиншки најисплатливиот фудбалер да го напушти клубот и дека челниците на Јунајтед се под голем притисок да го задржат Роналдо.

Португалскиот фудбалер не се појави на подготовките на Манчестер Јунајтед и не замина на турнејата со својот клуб во Азија, наводно поради семејни причини.

Роналдо е разочаран од неактивноста на Манчестер Јунајтед во преодниот рок, а воедно сака и во наредната сезона да настапува во Лигата на шампиони.

Роналдо на Олд Трафорд пристигна минатата сезона, а има договор со клубот до јуни наредната година.

Менаџерот на Манчестер Сити, Пеп Гвардиола во новата сезона ќе се потпира на поинаков напад, но едно име останува константа – Фил Фоден. Репрезентативецот на Англија, како и неговиот тимски колега Родри, добија понуди за нов договор.

Клубот веќе има усмен договор со Фоден за новиот договор, според кој неговата плата ќе се зголеми за три пати.

Според „The Sun“, тој ќе добива 200.000 фунти неделно. Надоместокот е колку за неговиот развој, толку и за поголемата улога што ќе ја има во новата сезона.

„Граѓаните“ веќе го продадоа Габриел Жесус на Арсенал, а се очекува да се разделат и со Рахим Стерлинг кој ќе се пресели во Челси.

Арсенал размислува за шокантна понуда за еден од најважните играчи на Челзи во последните години – Н’Голо Канте. Неуморниот Французин е под договор со својот сегашен клуб уште само 12 месеци и тоа им дава надеж на „топџиите“ кои бараат квалитетен дефанзивен играч за врска.

31-годишниот Канте минатата сезона имаше вкупно 42 настапи во сите натпреварувања, но исто така помина многу минути на клупата бидејќи проблемите со повредата на коленото го спречија да ги покаже своите несомнени квалитети во поголемиот дел од сезоната. Пред извесно време се тврдеше дека за овој Французин е заинтересиран и Манчестер Јунајтед.

Претходно денеска, Челзи објави дека Н’Голо Канте и Рубен Лофтус-Чик ќе ја пропуштат турнејата на тимот низ САД бидејќи не го завршиле целосниот циклус на вакцинација потребен за влез во земјата.

Манчестер Јунајтед е заинтересиран за потписот на играчот од средниот ред на Пари Сен Жермен, Леандро Паредес, но цената која за него во моментов ја бара францускиот шампион е превисока.

Англиски извори тврдат дека Јунајтед е подготвен да плати максимум 28 до 30 милиони евра за Паредес, додека ПСЖ веќе ја утврди неговата цена на 35 милиони евра.

Преговорите меѓу двете страни треба да продолжат, но прашање е дали наскоро ќе има некаков напредок.

Атлетико Мадрид ги започна претсезонските тренинзи за новата сезона. Фудбалерите се собраа во Мадрид, но утре заминуваат во Сеговија на двонеделен камп.

Првата контрола на екипата ќе биде на 27 јули против Нумансија. Три дена подоцна избраниците на Диего Симеоне во Осло ќе ги одмерат силите со Манчестер Јунајтед, а на 4 август ќе играат со Кадиз.

На почетокот на подготовките се собраа 29 играчи, меѓу нив и Алваро Мората и Саул Нигез кои се вратија од позајмица. Се појавија и новите засилувања Аксел Витсел и Самуел Лино. Во оваа фаза нема поголеми промени во составот, единствена посериозна е заминувањето на Луис Суарез кому му истече договорот.

Шпанскиот весник Спорт пренесува дека холандскиот репрезентативец Френки де Јонг одбил да ја продолжи својата кариера во Манчестер Јунајтед.

Новиот тренер на Јунајтед Ерик тен Хаг инсистираше на ангажман на Де Јонг, но шпанските медиуми наведуваат дека холандскиот фудбалер од лични и спортски причини одлучил да остане во Барселона.

Според информациите челниците на Манчестер Јунајтед сега ќе пробаат да го ангажираат дефанзивецот на Ајакс Лисандро Мартинез, играчот на ПСЖ Леандро Паредес и фудбалерот на Волвс Рубен Невес.

Досегашниот фудбалер на Баерн од Минхен Омар Ричардс потпиша четиригодишен договор со новиот премиерлигаш Нотингем Форест.

Ричардс минатата сезона воглавно ја мина на клупата на Баерн каде пристигна во 2021 година од англискиот Ридинг. Тој одигра 12 натпревари во шампионската сезона на тимот од Минхен, но само на еден натпревар ги одигра сите 90 минути.

Нотингем Форест мора да ја засили екипата бидејќи оваа сезона повторно ќе игра во Премиер лигата, прв пат после 1999 година.

Капитенот на Интер, голманот Самир Хандановиќ го продолжи договорот со клубот до летото 2023 година. 

Искусниот Словенец изјави дека е среќен што ќе остане со нероазурите уште една година.

„Пристигнав во врвен клуб пред десет години, и сеуште сум во врвен клуб. Многу сум среќен и горд што сум капитен на овај тим и привилегија е да продолжам да играм за Интер“, изјави Хандановиќ.

Словенецот својата кариера ја започна во Домжале, а во 2004 година прејде во Удинезе од каде подоцна стигна во Интер.

За репрезентацијата на Словенија одигра вкупно 81 натпревар.