Тренерот на фудбалерите на Баерн Минхен, Јулијан Нагелсман, жали што германскиот дефанзивец, Никлас Зуле, ќе го напушти клубот.

„Би сакал да остане со нас. Затоа игра толку многу. Се уште гледам многу квалитети во него”, изјави Нагелсман пред денешниот натпревар против РБ Лајпциг во 21. коло на Бундеслигата.

Ќе потсетиме дека 26-годишниот фудбалер по четири сезони не го продолжи договорот и во текот на летото ќе си замине од Минхен.

Никлас Бендтнер, иако никогаш не беше помеѓу најдобрите фудбалери во светот е играч кој привлекувал големо внимание. Така сега за медиумите зборуваше за адреналинот кој му го давало коцкањето. Данецот откри дека во една вечер изгубл 400.000 фунти за само час ипол на рулет.

„Имав многу проблеми со повредите. Не можев да ја најдам возбудата која ја имав кога играв пред 60.000 навивачи. Ништо не можеше да се замени со такво искуство. Нешто што ми беше најблиску е кога влегував во казино. Колку влоговите беа повисоки, толку беше поголем адреналинот“.

„Изгубив 400.000 фунти на рулет за 90 минути, до крајот на вечерта успеав да вратам голем дел од парите и си заминав со минус од 20.000 фунти. Таа вечер кога се вратив во хотелот добро размислив што моежеше да се случи и се откажав од таа лоша навика“, раскажа Бендтнер.

Арсенал нема намера да му понуди нов договор на напаѓачот Александре Лаказет. Актуелниот договор на Французинот е до летото, кога ќе може да си замине како слободен играч од „Емирати“. Се чини дека токму тоа ќе се случи.

Арсенал моментално има само двајца типични напаѓачи во форма на Лаказет и Еди Нкетија, откако клубот се раздели со Пјер-Емерик Обамејанг за време на зимската пауза. Сепак, се чини дека на Емирати на лето подготвуваат сериозно обновување на составот и за таа цел мора прво да се разделат со некои од нивните сегашни играчи и Лаказет е еден од луѓето кои се очекува да си заминат.

Не недостига интерес за 30-годишниот голгетер, бидејќи претседателот на Лион неодамна призна дека ќе направи се за да го привлече на лето. Французинот пред извесно време се поврзуваше и со Атлетико Мадрид и Јувентус.

Шпанскиот гигант Барселона е блиску до договор со нов моќен спонзор. Станува збор за шведската стриминг платформа „Спотифај“. 

Според информациите од Шпанија, логото на спонзорот ќе стои на дресовите на екипата, а компанијата ќе добие права и за името на стадионот „Камп Ноу“.

Иако официјалната информација за спонзорството се очекува следната недела, веќе се споменува дека Барселона со новиот договор ќе заработува 57 милиони евра годишно.

Продолжуваат шпекулациите околу иднината за централниот дефанзивец на Лацио, Луис Фелипе. Според италијанските медиуми, тој нема да го продолжи договорот со клубот од Рим, туку се очекува да прејде во Интер како слободен играч. 

Информациите говорат дека дека тој веќе постигнал договор со Нероазурите, кои му понудиле петгодишен договор со плата од 2,7 милиони евра по сезона.

Преговорите меѓу Челзи и Антонио Рудигер продолжуваат, но двете страни се уште се далеку од договор. 

Клубот од Лондон сака да го задржи дефанзивецот, но Рудигер за продолжување на соработката бара повисока плата од досегашната.

Моменталната плата на Рудигер изнесува 100 илјади фунти неделно, па сега претставниците на Челзи излегле со понуда од 200 илјади фунти, но по се изгледа дека и оваа понуда не била доволна за да го убеди играчот да остане на Стенфорд Бриџ. 

Договорот на Германецот со екипата на Челзи истекува ова лето и тој сега може да преговара и со други клубови.

Новото засилување на Ливерпул, Колумбиецот Луиз Дијаз пристигна во клубот и веќе го одржа првиот индивидуален тренинг.

Тој во тренинг базата на Ливерпул имаше прва средба со тренерот Јирген Клоп како и со некои од новите соиграчи.

Дијаз за популарните „црвени“ договор потпиша во последните денови од зимскиот преоден рок,а пристигна од екипата на Порто.

Стефано Пиоли потврди дека Златан Ибрахомовиќ и Анте Ребиќ ќе го пропуштат денешното дерби со Интер. Сепак, Фикајо Томори ќе биде достапен.

„Мораме да ги земеме предвид карактеристиките на противникот. Важно е, но никогаш нема да го промениме начинот на игра и утре тоа нема да биде исклучок. Се бориме, дали за титулата или за Лигата на шампионите, ние сме во борба. Одигравме одличен натпревар против Јувентус, но ни недостасуваше квалитет во завршната фаза. Тоа ни треба утре. Ова е исклучително важен натпревар и сакаме да победиме. Златан и Ребиќ нема да бидат на располагање. Томори заврши одлична работа и мислам дека ќе биде со тимот, иако најверојатно нема да го започне натпреварот. Оливие Жиру е важен играч и тој е подготвен. Жал ни е што Ибра нема да биде со нас Многу се подобривме благодарение на него, но сега треба да покажеме дека сме силни и без него“, додаде тренерот.

Од Реал Мадрид сериозно ја разгледуваат можноста за враќање на нивниот поранешен дефанзивец Серхио Регилон кој сега настапува за тимот на Тотенхем.

Неговите одлични игри во екипата од Лондон, се забележани од управата на Реал, и можно е „кралскиот клуб“ да ја активира клаузулата во договорот според која тие можат да го откупат играчот за одредена сума.

 Регилон е еден од главните играчи во составот на Антонио Конте. Од почетокот на сезоната тој забележа 22 настапи и успеа да постигне 1 гол. Тотенхем со сигурност нема намера да се раздели со него, но самиот играч повеќе пати има изјавено дека сака повторно да се докаже играјќи на Сантијаго Бернабеу.

Реал Мадрид ќе мора да одлучи дали ќе го врати 25-годишниот играч на лето и ќе му даде нова шанса за докажување во тимот.

Тотенхем следното лето ќе понуди 70 милиони фунти за напаѓачот на Наполи, Виктор Осимен. Тотенхем и нивниот ривал од Лондон, Арсенал беа поврзувани со Нигериецот минатиот месец, но тогаш Наполи ги отфрлија сите понуди за нивниот голгетер.

Антонио Конте секако сака да привлече уште еден напаѓач во својот тим и се фокусираше на 23-годишниот Виктор Осимен.

Оваа сезона Осимен има девет гола и две асистенции на 16 натпревари за Наполи во сите натпреварувања. Сепак, поранешниот играч на Волфсбург и Лил пропушти многу натпревари поради повреда, а коронавирусот го спречи да игра за националниот тим на Африканскиот куп на нации.