Македонскиот првак во футсал, Шкупи, новата сезона во Лигата на шампиони ќе ја стартува од главната фаза. Чаирчани како домаќин ќе ги дочекаат квалификациите закажани за октомври годинава.

Во конкуренција на 56 екипи од 52 европски земји, Шкупи е рангиран на 21 место, што му донесе привилегија да ја прескокне прелиминарната фаза. Ждрепката за составот на групите е закажана за седми јули во седиштето на УЕФА во Нион.

Од Атлетико Мадрид соопштуваат дека хрватскиот фудбалер Шиме Врсаљко го напушти клубот откако на 30.јуни му истече договорот.

Врсаљко го чекаат нови професионални предизвици откако одигра 100 официјални натпревари во дресот на Атлетико Мадрид каде пристигна во 2016 година од италијанскиот Сасуоло.

Хрватот во 2018 година со Атлетико ја освои Лига Европа, а во 2021 година беше шампион во шпанската Примера. Последниве денови се шпекулира дека Врсаљко својата кариера ќе ја продолжи во Олимпијакос.

Италијанскиот весник Република пренесува дека Наполи е сериозно заинтересиран за голманот на ПСЖ Кејлор Навас.

Во Наполи на 35-годишниот Навас гледаат како на стартер во екипата, што не е случај во Париз Сен Жермен каде тој ја дели минутажата на голот со Донарума.

Навас има договор со клубот од Париз до 2024.година, а неговата пазарна вредност изнесува 8 милиони евра.

Најмладиот син на тренерот на Атлетико Мадрид, Диего Симеоне, Џулијано Симеоне, прејде во редовите на Сарагоса како позајмен фудбалер, јавија денеска шпанските медиуми.  Џулијано Симеоне минатата сезона настапуваше за Б тимот на Атлетико Мадрид и во третата шпанска лига постигна 25 голови.  

Сарагоса идната сезона ќе се натпреварува во Втората шпанска лига.   Највозрасниот син на Симеоне, Џовани, минатата сезона настапуваше за италијанскиот прволигаш Верона како позајмен од Каљари, а кон средината на овој месец потпиша перманентен договор со Верона до 2026 година.  

Покрај Џулијано и Џовани, и третиот син на Симеоне, Џанлука, е фудбалер и настапува за шпанскиот четвртолигаш Ибица.

Откако сосема неочекувано францускиот вицешампион Олимпик Марсеј остана без тренерот Сампаоли кој реши да си замине од екипата, челниците на клубот веднаш реагираа и најдоа решение за тренерската позиција.

Француските медиуми пренесуваат дека за нов тренер на Олимпик Марсеј ќе биде назначен хрватскиот стручњак Игор Тудор, кој ќе потпише двегодишен договор.

Тудор во минатото има работено како тренер во екипите на Хајдук, Удинезе, Галатасарај, ПАОК, а беше и селектор на хрватската репрезентација.

Meдиумите во Италија пренесуваат дека работата е завршена и газдите на Манчестер Сити сега се сопственици и на италијанскиот Палермо.

Според информациите попладнево биле потпишани документите за зделката вредна 13 милиони евра. Со ова Палермо ќе биде 11-тиот клуб на шеикот Мансур и „Сити Фудбал Груп“.

За споменатите 13 милиони евра „Сити Фудбал Груп“ ќе добие околу 80% од Палермо, а останатите 20 ќе ги задржи сегашниот сопственик Дарио Мири, тој и ќе продолжи да биде претседател.

Големите финансиски проблеми во Палермо започнаа во 2019 година, клубот тогаш банкротираше и беше исфрлен во четврта лига, а сезонава успеа да избори промоција во Серија Б.

Претседателот на Барселона Жоан Лапорта потврди дека клубот ги заврши трансферите на Франк Кеси и Андреас Кристенсен.

Промоцијата на двајцата нови фудбалери се очекува да се случи следната недела.

Лапорта за медиумите потврди дека играчите ги завршиле медицинските тестови и дека ги потпишаа договорите со клубот. 

Кеси во Барса пристигна како слободен играч од Милан, додека Кристенсен дојде од Челзи.

Мауро Икарди е пред враќање во Серија А после неуспешната епизода во ПСЖ каде што не доби преголема минутажа. Италијанските медиуми пренесуваат дека Икарди би можел да биде ново засилување за новиот калчолигаш Монца.

„Спорт Медијасет“, медиум кој е во сопственост на Берлускони како и Монца објави дека Икарди има прималива понуда. Сопртугата на Икарди, Ванда Нара наводно инсистира на враќање во Италија.

Освен тоа и ПСЖ сака да се ослободи од Икарди кој е „вишок“. Клубот од Париз би можел да го пушти Икарди со опција за позајмица со откуп по завршувањето на сезоната.

Икарди во Серија А покрај Интер го носеше и дресот на Сампдорија каде што играше одличен фудбал.

Англискиот премиерлигаш Евертон соопшти дека потпиша договор со искусниот дефанзивец од екипата на Барнли, Џејмс Тарковски.

Тарковски во Евертон доаѓа како слободен играч без обештетување бидејќи не 30.јуни истече неговиот договор со Барнли.

Повремениот англиски репрезентативец со Евертон потпиша договор на четири години.

Вардар објави дека Мухамед Туркмен е избран за нов претседател за фудбалски развој во ФК Вардар на кој што му се доверуваат идните стратегиски планови додека останатата структура во клубот останува непроменета.

Мухамед Туркмен е роден во 1986 година во Орду и студиите ги завршува на Факултетот за спортски науки на Универзитетот Мармара со значителен успех. Во својата кариера има настапувано за Фенербахче и Анкарачугу и уште неколку тимови во Турција како и за сите младински категории на Турција. По завршувањето на активната кариера започнува како помошник тренер на Јилмаз Вурал, а подоцна како аналитичар и скаут со УЕФА А лиценца со која што се стекнува со големо искуство во развојот на фудбалот.

Како што најавивме клубот има план да ги оствари зацртаните идни цели за кои што мора да има финансиски стабилна конструкција и стратегија за одржлив развој на нашиот клуб. Поради оваа причина, новиот претседател најавува дека сите финансиски планови и зацртани цели за стабилност на клубот кои се подготвени и предвидени ќе стапат на сила со новиот стил на управување на клубот кој што го најавивме во изминатиот период.

Плановите за наредната сезона се враќање во првата лига и борба за трофејот во Купот на Македонија додека на среден рок плановите се освојување на титулата и излез на европската сцена.