Изминатиот викенд, суровата реалност на личната болка се судри со гламурот на Светското првенство. Ноа ван дер Биј, долгогодишната партнерка на холандскиот репрезентативец и офанзивец на Ливерпул, Коди Гакпо, ја сподели претажната вест дека нивното неродено второ дете, синчето Елајџа Рафаел Гакпо, починало за време на бременоста. Ваквата болна објава на социјалните мрежи веднаш го пренасочи вниманието на јавноста надвор од фудбалот, носејќи мрачен засен над холандскиот табор, каде што соиграчите, стручниот штаб и навивачите веднаш застанаа во поддршка на скршеното семејство.

Емотивниот удар е огромен за Ноа, Коди, нивниот прв син Самуел, како и за нивните најблиски. Трагедијата дојде само еден месец откако двојката со голема радост објави дека очекува второ дете. Преку кратко соопштение, Гакпо ја сподели нивната неизмерна болка во овие исклучително тешки моменти, молејќи ја јавноста за приватност и почит кон нивните лични животи додека се соочуваат со загубата.

Среде сеприсутната тага, Ноа сподели трогателно искуство кое на семејството му донесе трошка утеха. По примањето на страшната вест, таа го одвела нивниот првороден син Самуел во локална црква за да запалат свеќа во спомен на неговото братче. Веднаш потоа, тие се упатиле кон мирното црковно игралиште каде во тој момент си играло само едно друго дете.

Во миг кој за нив имал длабоко духовно значење, се испоставило дека непознатото момче се вика токму Елајџа. За Ноа и Коди, оваа коинциденција била преубав знак од Бога и потсетување дека споменот и духот на нивниот син засекогаш ќе останат со нив. Оваа емотивна приказна брзо одекна во фудбалскиот свет, сведочејќи за неверојатната сила на едно семејство кое успева да најде надеж дури и во најтешките моменти.

И покрај огромниот емотивен товар, Коди Гакпо донесе исклучително храбра одлука и потврди дека ќе биде на располагање за вечерашниот натпревар со Мароко. По заедничкиот разговор со својата партнерка и со селекторот, 27-годишниот напаѓач реши да остане со националниот тим на Холандија во клучната нокаут-фаза од турнирот. Фудбалската федерација на Холандија ја потврди веста, изразувајќи најдлабоко сочувство и уверување дека целата организација цврсто стои зад фудбалерот.

Додека Холандија се подготвува за новиот спортски предизвик, присуството на Гакпо на теренот ќе биде синоним за врвна човечка издржливост и доказ дека неговата мотивација вечерва ги надминува границите на спортот.

Светското првенство во Гвадалахара донесе двојно разочарување за репрезентацијата на Уругвај. Покрај разочарувачката елиминација, уругвајската јавност остана во шок по тешката повреда на играчот од средниот ред, Мануел Угарте. Фудбалерот на Манчестер Јунајтед незгодно го искриви коленото во 42. минута при обид за старт, непосредно пред Алекс Баена да го постигне победничкиот гол за Шпанците.

Угарте веднаш падна на тревата со болна гримаса, а по интервенцијата на медицинскиот тим, во солзи и со рацете преку лицето, беше изнесен на носила. Магнетната резонанца ги потврди црните прогнози: скинати лигаменти, повреда која практично му ја запечати судбината на овој турнир, но и донесе огромни главоболки за неговиот клуб.

Од Манчестер Јунајтед веднаш соопштија дека се во постојан контакт со уругвајските лекари и дека фудбалерот наскоро се враќа во Англија на дополнителни прегледи. Иако клубот не излезе со официјална временска рамка за закрепнувањето, самиот Угарте преку социјалните мрежи потврди дека го чека долг и макотрпен процес.

„Да се доживее најтешката повреда за еден фудбалер, и тоа на еден од најважните натпревари во историјата на мојата земја… тоа е болка што ќе ја носам цел живот“, напиша Угарте на Инстаграм. „Кога животот сака да ве сопре, наоѓа начин да ви го соопшти тоа. Мое е да останам позитивен.“

Според првичните проценки на спортските лекари, рехабилитацијата по ваков тип на хируршки зафат трае меѓу девет и дванаесет месеци. Тоа значи дека Уругваецот е аут најмалку до крајот на 2026 година и ќе го пропушти комплетниот есенски дел од новата сезона во Премиер лигата.

Ваквиот развој на настаните целосно ги помати сметките на „Олд Трафорд“. Не е тајна дека клупското раководство планираше да го продаде Угарте летово со цел да обезбеди буџет за целосна реконструкција на средниот ред. За него веќе имаше сериозен интерес од гиганти како Милан, Јувентус и Галатасарај, со оглед на тоа што тој не успеа целосно да се наметне во тактичките замисли на тимот изминатава сезона.

Сега тие планови паѓаат во вода. Бидејќи трансферот е невозможен, Јунајтед нема да може да смета на финансиски прилив од негова продажба, ниту пак да го ослободи буџетот од неговата плата. Иако „црвените ѓаволи“ имаат право на милионска отштета преку Програмата за заштита на клубови на ФИФА (која ги покрива платите на играчите кои ќе претрпат долгорочни повреди на репрезентативна должност), тоа не го решава дефицитот на теренот. Спортскиот сектор сега мора експресно да се сврти кон алтернативни решенија на пазарот пред почетокот на новата кампања во август.

Пари Сен Жермен се подготвува целосно да го преобликува својот напаѓачки арсенал за претстојната сезона. Актуелниот француски шампион оди на сè или ништо за потписот на двајца суперталенти: тинејџерската сензација на РБ Лајпциг, Јан Диоманде, и креативецот на Монако, Магнес Аклиуш.

Управниот одбор на парижаните јасно стави до знаење дека овие два трансфери не се алтернатива еден за друг. Планот на Луис Енрике е двајцата фудбалери да бидат столбови на новиот, хипердинамичен напад на тимот. Преговорите веќе се во напредна фаза, а клубот работи на брзо финализирање на договорите со цел да се означи почетокот на една нова, помодерна ера во престолнината.

За да се отвори простор за двете големи засилувања, ПСЖ започна брза реализација на неколку звучни заминувања од сегашниот напад. Преговорите за излезните трансфери се пред самиот крај:

• Гонсало Рамос: Португалскиот напаѓач е на чекор до премин во Милан, во зделка вредна над 74 милиони евра.
  
• Рандал Коло Муани: Францускиот репрезентативец веќе ги договори личните услови со Јувентус, отворајќи го патот за негова преселба во Серија А.
  
• Канг-ин Ли: Јужнокореецот е во завршни преговори со Атлетико Мадрид, а токму Аклиуш е проектиран како негова директна замена на теренот.
  
• Бредли Баркола: Младиот крилен напаѓач се наоѓа високо на листата со желби на Ливерпул, кој во него гледа идеално освежување за својата офанзивна линија.

Додека преговорите за Аклиуш се одвиваат без поголеми пречки (фудбалерот веќе имал разговор со Енрике и изразил желба да потпише), битката за Диоманде се претвори во вистинска трансфер драма со висок влог.

Ливерпул беше сериозно заинтересиран за 19-годишното крило од Брегот на Слоновата Коска, испраќајќи до РБ Лајпциг фрапантна понуда од 100 милиони евра. Германскиот клуб ја одби оваа сума, барајќи дополнителни 20 до 30 милиони евра по одличните настапи на тинејџерот на Светското. Сепак, гигантот од Мерсисајд беше принуден целосно да се повлече од трката. Диоманде јасно им стави до знаење на своите агенти и на Лајпциг дека негова единствена желба е ПСЖ.

Поранешниот фудбалер на Португалија, Рикардо Кварезма, упати критики за настапот на „европските бразилци“ на мечот против Колумбија кој заврши 0-0.

„Недостасува радост, среќа, креативност, ја нема храброста што отсекогаш сме ја имале. Личеше дека беа уморни и демотивирани“ – рече Кварезма.

Португалија на стартот на елиминациите ќе излезе на мегдан со Хрватска. Мечот ќе биде одигран в петок во 01.00 часот.

Бројките по завршувањето на групниот сегмент на Светското првенство откриваат еден фасцинантен детаљ: африканскиот континент бележи најдобри резултати во досегашниот тек од турнирот.

Неверојатни девет од вкупно десет африкански репрезентации обезбедија пласман во елиминациската рунда, што претставува импресивни 90 отсто успешност.

На втората позиција се наоѓаат селекциите од Јужна Америка, кои задржаа пет од своите шест претставници на Мундијалот, односно забележаа учинок од 83 проценти.

Што се однесува до европските тимови, дури три земји ги завршија настапите предвреме, па во нокаут фазата продолжија 13 од вкупно 16 екипи, што дава успешност од 81 процент. Иако африканските репрезентации објективно не се вбројуваат меѓу главните претенденти за освојување на светскиот трон, овие статистички податоци јасно сведочат за огромниот фудбалски напредок на овој континент.

Роберт Левандовски ќе ја продолжи кариерата во Соединетите Американски Држави, откако постигнал договор со Чикаго Фајр за преселба во МЛС-лигата.

Полскиот напаѓач ги договорил условите со американскиот клуб уште минатата седмица, а официјализацијата на трансферот се очекува во наредните денови. Според информациите, Левандовски ја избрал понудата на Чикаго Фајр и покрај интересот од други клубови од ширум светот.

По четири сезони во дресот на Барселона, искусниот голгетер заминува како слободен фудбалер и ќе започне нов предизвик во кариерата.

Претходно настапуваше и за Баерн Минхен, Борусија Дортмунд и Лех Познањ, каде што се етаблираше како еден од најдобрите напаѓачи на својата генерација.

Цените на влезниците за Светското првенство на платформите за препродажба драстично се зголемија за натпреварот Португалија-Хрватска кој ќе биде одигран во Торонто.

Просечната цена за најевтината влезница надминува 3.000 долари. Мечот ќе биде одигран на 2 јули. На теренот ќе настапат легендите, Роналдо и Модриќ, кои го играат последниот Мундијал.

Просечната цена за најевтиниот билет на секундарните страници за препродажба е 3.225 долари, што е највисока вредност за осминафиналните мечеви.

Share.
Facebook
Twitter
Pinterest
LinkedIn
Tumblr

Кристијано Роналдо повторно беше стартер за Португалија на мечот со Колумбија со што го запиша 25-от натпревар на Мундијалите.

Тој се изедначи со германската ѕвезда, Лотар Матеус, на второто место на ранг-листата на сите времиња.

Пред нив е само Лионел Меси кој има 28 мечеви но, допрва го чека минимум уште еден на тековниот шампионат.

Канада со 1-0 ја победи Јужна Африка во првиот 1/16 финален натпревар на Светското првенство, единствениот гол на мечот беше постигнат пред самиот крај.

Канада беше поактивна и создаде повеќе шансите во текот на мечот, но Јужна Африка одлично се бранеше.

Африканците имаа и свои моменти, иако најчесто се бранеа, знаеа да нападнат и да се преселат пред голот на Канада.

Кога се чинеше дека мечот ќе отиде во продолженија, Еустакио со убав гол во 92. минута донесе победа од 1-0 за Канада.

Канада во осминафиналето ќе игра со подобриот од дуелот меѓу Холандија и Мароко.

Натпреварот меѓу САД и Босна и Херцеговина во шеснаестинафиналето на Светското првенство доби дополнителна најава поради изјавата на американската водителка Ебигејл Велез.

Таа во програма на „ABC“ призна дека речиси и не знае ништо за босанската репрезентација, но тоа не ја спречи самоуверено да го најави дуелот.

„Едно знам за Босна, не би знаела ни да ја покажам на карта. Не знам ништо за Босна и не сакам да знам. САД се врати и сме подобри од кога било. Подгответе се, Босно, затоа што ова нема да ви се допадне“, порача Велез.

Босна и Херцеговина обезбеди место во нокаут фазата како една од најуспешните третопласирани репрезентации, освојувајќи четири бода во групата Б. Американците, пак, го освоија врвот во групата Д со шест бода и ќе ја имаат фаворитската улога во пресметката за место во осминафиналето.