Легендарниот француски фудбалер Зинедин Зидан, во специјално интервју за Л`Екип на својот 50.роденден изјави дека сака да биде селектор на Франција.

Француските медиуми веќе подолго време шпекулираат дека популарниот Зизу е можен наследник на актуелниот селектор на „триколорите“Дидие Дешамп, кој се очекува да ја напушти функцијата после Светското првенство во Катар.

„Се разбира дека би сакал да бидам селектор на Франција еден ден, но не можам јас да кажам кога тоа би се случило. посакувам да направам полн круг со репрезентацијата на Франција. Играњето за националниот тим беше нешто најдобро што ми се случило во кариерата. Сега кога станав фудбалски тренер често ми се поставува прашањето дали и кога ќе бидам селектор. Ако се укаже прилика јас сум тука“, вели Зидан.

Баерн Минхен е фаворит за привлекување на напаѓачот на Штутгарт, Саша Калајџиќ. Баварците денеска го најавија привлекувањето на Садио Мане и сега се движат кон следните цели. Тие сакаат да привлечат истакнат централен напаѓач, бидејќи нема да имаат играч на оваа позиција доколку дојде до очекуваното заминување на Роберт Левандовски.

За Калајџиќ беше заинтересирана Борусија Дортмунд, но тие го привлекоа Себастијан Алер од Ајакс. Неколку клубови од Англија ја следат и ситуацијата околу членот на австриската репрезентација, но Баерн е јасен фаворит за неговиот потпис. Се очекува напаѓачот да одлучи за својата иднина до крајот на месецот.

Калајџиќ пристигна во Штутгарт со Адмира Вакер во 2019 година. Неговата прва сезона во Германија беше нарушена поради сериозна повреда на коленото, но Штутгарт освои промоција. Во својата прва сезона во елитата, напаѓачот постигна 16 гола на 33 натпревари, а следната повторно беше прогонуван од повреди.

Сепак, силно ја заврши минатата сезона и го привлече вниманието на голем број европски клубови.

Францускиот фудбалер Кристофер Нкунку го продолжи договорот со својот актуелен клуб РБ Лајпциг до 2026 година.

Нкунку е член на Лајпциг од 2019 година, и минатата сезона тој беше прогласен за најдобар напаѓач во германската Бунделсига, постигнувајќи 20 гола. 

Претходно постоеја многу шпекулации во врска со неговото заминување од Лајпциг и премин во клуб од Премиер лигата или негово враќање во ПСЖ.

Нкунку во март оваа година дебитира за репрезентацијата на Франција, за која досега одигра шест натпревари.

Македонскиот фудбалски репрезентативец Бојан Миовски е нов член на славниот шкотски клуб Абердин.

Според информациите кои ги пласираа од Абердин, 22-годишниот напаѓач потпиша четиригодишен договор со клубот.

Миовски во Шкотска пристигнува од унгарски МТК, а претходно има настапувано за екипата на Карабах, како и за македонските клубови Работнички, Македонија ЃП и Ренова.

Според најновото рангирање на ФИФА, македонската фудбалска репрезентација има пад од две места на листата, и сега се наоѓа на 64.место.

Македонија периодов во Лигата на нации забележа две победи, но тие беа остварени над аутсајдерот Гибралтар, додека против Бугарија одигра реми на гостински терен, а доживеа пораз од Грузија во Скопје.

На врвот од ФИФА ранг листата се наоѓа репрезентацијата на Бразил, втора е Белгија а трета Аргентина.

Хенрих Мхитарјан ги помина лекарските прегледи пред да се пресели во Интер. Зделката треба официјално да биде објавена во блиска иднина. Претходно беше објавено дека играчот, кој е слободен, ќе потпише договор со Интер на две години, според кој ќе заработува 4,5 милиони евра по сезона. Мхитарјан, кој играше за Рома од 2019 година, ја одби понудата на Римјаните за нов договор поради неучеството на тимот во Лигата на шампионите следната сезона.

Рома му понуди договор 1+1 со плата од 3 милиони евра годишно. На 44 натпревари во сите натпреварувања минатата сезона, Мхитарјан постигна пет гола и девет асистенции. На 25 мај, играчот од средниот ред ја освои Конференциската лига на УЕФА со Рома.

Фудбалскиот стратег, Зинедин Зидан, ја одбил понудата на ПСЖ бидејќи сака да ја има улогата на селектор на Франција, објавија повеќето медиуми во Европа.

Ќе потсетиме дека  сегашниот предводник на „галските петли“, Дидие Дешамп, ќе си замине кон крајот на годинава веднаш по Светското првенство во Катар.

Се претпоставува дека Зидан има усмен договор со луѓето од Француската фудбалска федерација и затоа не сака да преземе ниту еден клуб.

Дефанзивецот Клемент Ленгле е подготвен да ја напушти Барселона, но само доколку се најде клуб кој е подготвен да му ја даде истата плата, открива „Спорт“.

Сепак, ова изгледа неостварлив услов, бидејќи Французинот добива 10 милиони евра.

Ленгле е на „Камп Ноу“ четири години, но одамна го изгуби стартното место и навивачите не го сакаат. Каталонците треба итно да се разделат со барем неколку играчи за да привлечат нови.

Барса за Ленгле плати речиси 36 милиони евра, но тој никогаш не успеа да убеди дека трансферот вреди. Договорот со клубот му истекува во 2026 година.

Францускиот репрезентативец Пол Погба на крајот од месецот станува слободен агент и како што стојат работите се е подготвено за неговото враќање во Јувентус.

Познатиот инсајдер за трансфери Џанлука Ди Марцио, најавува дека менаџментот на Погба ги договара последните детали со челниците на Јувентус пред склучувањето на финалниот договор со Бјанконерите. Според информациите, францускиот фудбалер на 1.јули ќе пристигне во Торино на медицински прегледи. 

Пол Погба повторно доаѓа во Јувентус од Манчестер Јунајтед како и пред 10 години кога пристигна како слободен играч. После тоа во 2016 година, тој за 105 милиони евра замина од Торино и заигра на Олд Трафорд.