Нашиот репрезентативен голман, Столе Димитриевски, им се врати на тренинзите во Рајо Ваљекано после повредата која го оддалечи од теренот неколку натпревари.

Според информациите од Шпанија, клубот од Ла Лига ја одбил понудата од 5,5 милиони евра која ја испрати екипата на Ал Наср од Саудијска Арабија за ангажирање на голманот Димитриевски.

Од Рајо Ваљекано одговараат дека сакаат да го задржат Димитриевски во екипата, но ако некој сака да го доведе во своите редови, ќе мора да ја плати клаузулата од договорот вредна 50 милиони евра.

Меѓутоа, постојат информации дека Ал Наср ќе бидат упорни во својот обид за купување на македонскиот голман и дека во најскоро време ќе испратат повисока понуда.

Легендата на италијанскиот фудбал, Фабио Канаваро, започнал разговори со челниците на Евертон околу можноста тој да биде новиот тренер на екипата.

Канаваро на овој начин им се приклучи на Вејн Руни и Френк Лампард кои се меѓу најсериозните кандидати за клупата на тимот од Гудисон Парк.

Доколку Италијанецот ја добие функцијата, тоа ќе биде негово прво тренерско искуство во Европа, после неговиот престој како тренер на кинескиот Гуангжу.

Во меѓувреме Канаваро имаше понуда да стане селектор на полската фудбалска репрезентација, која тој набрзо ја одби.

Фудбалерот на Барселона, Ансу Фати, никако да ја прекине серијата од повреди кои го пратат оваа сезона.

Младиот Фати, доживеа уште една повреда на натпреварот во кој Барселона после продолженијата беше елиминирана во Кралскиот куп од тимот на Атлетико Билбао.

Тренерот Чави сигурно ќе биде загрижен бидејќи според првите информации од лекарскиот тим, повредата на фудбалерот не е наивна и се очекува тој да паузира повеќе од два месеци.

Тимот на Удинезе објави дека се засилува со одбранбениот играч Пабло Мари кој пристигнува од Арсенал.

Мари ќе биде во италијанскиот клуб како позајмен играч до лето, а Удинезе ќе има опција за откуп на неговиот договор. 28-годишниот Шпанец не беше во плановите на Артета и се очекуваше да го напушти клубот.

Во овој момент Удинезе се наоѓа на 14-тата позиција на табелата во Серија А и сигурно дека им е потребна цврстина во одбраната, Мари би требало таа цврстина да ја донесе.

Раководството на Фудбалската федерација на Македонија, претседателот Муамед Сејдини, генералниот секретар, Филип Поповски и неговиот заменик, Дрилон Ганиу во „Куќа на фудбалот“ имаа работна средба со градоначалникот на општина Аеродром, Тимчо Муцунски и шефот на кабинетот на градоначалникот во општината, Марјан Христов.

На состанокот разговараа за фудбалската инфраструктура во општина Аеродром и можноста за соработка на двете институции во изградба на капитален проект, односно изградба на нов репрезентативен стадион во рамки на „Куќа на фудбалот“ во општина Аеродром.

„Би сакал да упатам благодарнот до градоначалникот Муцунски за конструктивниот разговор. Инфраструктурата е секогаш важна. Секогаш велам дека нас, како Фудбалска федерација на Македонија, ни треба стадион. Ние ќе бидеме носители на проектот, но добредојдени се локалната самоуправа, државата и сите останати кои можат да помогнат.

Нѐ радува искрената желба и отвореноста за помош и поддршка од општина Аеродром и градоначалникот Муцунски за започнување на еден ваков голем проект. Ова беше првичен состанок, но сигурен сум дека соработката со општината ќе биде одлична. Верувам дека заеднички ќе создадеме услови да започнеме со проект кој ќе биде обележје на едно време.

Ние како Фудбалска федерација сме исклучително активни кога е во прашање подобрувањето на фудбалските услови и на тој начин ќе продолжиме и во иднина, изјавил претседателот на ФФМ, Сејдини.

За градоначалникот Муцунски, ФФМ го продолжува континуитетот на квалитетна работа и заедништво.

„Вие сте пример за другите како една успешна федерација може да функционира. Не само заради резултатите на репрезентацијата која ја обедини цела Македонија, туку и за силните напори да го развивате фудбалот на сите нивоа.  Наша обврска како општина е да се обидеме да придонесеме за напредок на спортот и фудбалот во општината и токму тоа е целта и на нашата денешна посета на „Куќа на фудбалот“. Инфраструктурата останува засекогаш. Верувам дека таквата политика на Федерацијата ќе трае. Со претседателот на ФФМ, Сејдини разговаравме за изградба на репрезентативен стадион во општина Аеродром и во блиска иднина верувам дека ќе започнеме со активности. Нашата општина ќе помогне во рамки на своите можности да биде вистински партнер во изградба на репрезентативен стадион кој ќе биде гордост на Аеродром и целата држава“, наведе Муцунски.

Голема желба на претседателот на Барселона, Жоан Лапорта е доведување на напаѓачот Ерлинг Халанд ова лето.

Меѓутоа, евентуалниот трансфер на норвежанецот ќе биде доста комплициран проект, бидејќи за него се интересираат и многу други европски гиганти. Тука мора да се напомене и високиот износ кој Барселона ќе треба да ја плати за трансферот, провизијата за менаџерот Мино Рајола како и самата плата на играчот.

Доколку каталонците не успеат со доведување на Халанд, како втора опција се споменува играчот на Реал Сосиедад, Александар Исак.

За напаѓачот од Шведска постои голем интерес и од голем број на клубови од Премиер лигата меѓу кои предничи Арсенал, но се претпоставува дека тој повеќе преферира да остане во Шпанската Ла Лига.

Манчестер Јунајтед ја одби понудата на Њукасл за фудбалерот, Џеси Лингард. „Враните“ сакаат да го изнајмат до крајот на сезоната и сакаат да му ја покријата целата плата.

Сепак, „црвените ѓаволи“ не се согласуваат со понудата бидејќи  договорот на играчот истекува на крајот од сезоната. Тимот од „олд Трафорд“ е  подготвен да ги разгледа понудите само за негова продажба , но, не сака да го изнајмува.

Лингард неодамна изјави дека сака да игра редовно во Вест Хем. „Чеканите“ внимателно ја следат ситуацијата.

ФИФА реши да го ограничи бројот на фудбалери кои ќе одат на позајмица во текот на една сезона.

Тоа значи дека клубовите во 2022/23 ќе можат да позајмат најмногу 8 фудбалери во сезоната 2023/24 ќе можат да позајмуваат максимум седум а од 1 јули 2024 година вкупниот број на позајмени фудбалери ќе биде 6.

Правилата не се однесуваат на играчите помлади од 21 година. Минималниот договор за позајмица ќе биде помеѓу два трансфер периоди – зимскиот и летниот.

Лионел Меси не е вклучен во составот на националниот тим за квалификациските натпревари за Светското првенство во 2022 година, кои ќе се одржи во јануари и февруари.  Ова беше објавено на „Твитер“ од страна на репрезентацијата на Аргентина.

Веќе на 28 јануари, Аргентина ќе игра на гостински терен со репрезентацијата на Чиле, додека на 2 февруари ќе биде домаќин на Колумбија.

Во квалификациите за СП 2022 во Јужна Америка на врвот е Бразил (35), а потоа следуваат Аргентина со 29 и Еквадор со 23 освоени бодови.

Да потсетиме дека Меси имаше инфекција со коронавирус. Аргентинскиот фудбалер се опоравуваше од вирусот и ги пропушти натпреварите на ПСЖ со Лион (1:1) и Брест (2:0). Тој се врати во составот на ПСЖ во вторникот на 18 јануари.

Десет нови случаи на фудбалери и вработени кои се заразени со ковид-19 се пријавени во Венеција, соопшти клубот од Италија.

Тимот кој настапува во Серија А има вкупно 14 случаи со позитивни тестови за коронавирус. Венеција во сабота треба да го пречека италијанскиот шампион Интер, но, натпреварот може да биде одложен.

Според најновите здравствени протоколи поврзани со натпреварите во Серија А, клубот може да побара одложување доколку 35% од играчите се тестираат позитивно за КОВИД-19. Венеција не прецизира колку има заразените играчи во тимот и колку се од придружниот персонал.