Македонската фудбалска репрезентација оствари убедлива победа од 4:0 на домашен терен против селекцијата на Гибралтар. Натпреварот беше одигран во рамките на 4.коло од Лигата на нации.

После завршувањето на средбата, селекторот на Македонија изрази благодарност до фудбалерите за нивната желба да настапуваат за репрезентацијата и да одделат 17 денови од нивниот планиран одмор.

„ Никој не знае што ќе се случи до крајот на овие натпревари во Лигата на нации. Јас сум задоволен од пристапот на момците кој е за секоја пофалба. Без разлика против кого игра овој тим има максимален респект кон секого, но на теренот кон никого. Благодарност до сите кои беа дел од овој период на натпревари бидејќи одвоија 17 дена од одморот кој им следува и беа на располагање на тимот и државата“, потенцира Милевски.

Реал Мадрид на својата официјална веб-страница го објави заминувањето на бразилскиот дефанзивец Марсело, кој за тимот настапуваше 15 години. Претходно, 34-годишниот фудбалер изјави дека финалето на Лигата на шампионите во сезоната 2021/22 со Ливерпул (1-0) му било последно во Кралскиот клуб.

Реал Мадрид соопшти дека утре, 13 јуни, ќе се случи официјалниот чин на збогување со Марсело. На настанот ќе присуствува и претседателот на клубот Флорентино Перез. После тоа ќе биде организирана и проштална прес-конференција за Марсело.

Марсело е во Реал Мадрид од 2007 година. За тоа време, тој одигра 545 натпревари за клубот во сите натпреварувања, на кои постигна 38 гола и направи 103 асистенции. Како дел од клубот шест пати го освојуваше првенството на Шпанија, пет пати Суперкупот на Шпанија, два пати шпанскиот Суперкуп и пет пати Лигата на шампионите.

Претседателот на Барселона, Жоан Лапорта изјави дека капитените на каталонскиот клуб се сложиле за намалување на платите.

Да потсетиме дека Барселона има четворица капитени: фудбалерите Жерар Пике, Жорди Алба, Серхио Бускетс и Серхи Роберто.

„Капитените се однесуваа посебно добро кон Барселона, согласни за намалување на платата. Ние секогаш ќе им бидеме благодарни. Овој гест беше многу важен и никој освен нив не го направи тоа“, изјави за „Марка“ претседателот Лапорта.

Барселона успеа да освои 73 поени на 38 натпревари и го зазеде второто место на табелата во Ла Лига на крајот од сезоната 2021/22.

Весли Снајдер го откри начинот на кој бил „избркан“ од Реал Мадрид и дека нема добри спомени од „кралскиот“ клуб.

„Најлошиот дел од мојата кариера беше кога се збогував од Реал Мадрид. Заминав во теретана, а потоа дојдов до својот плакар кој беше празен. Потоа бев со претседателот на разговор, а тој не ми даде шанса ништо да кажам, туку ми порача дека не сум им во плановите и сакаат да ја освојат Лигата на шампиони. Бев разочаран и изненаден“, открива Снајдер.

Снајдер изјави дека имал потенцијал да биде на исто ниво со светските мегаѕвезди Кристиано Роналдо и Лионел Меси.

„Можев да бидам како нив, но едноставно не сакав. Уживав во животот и можев да пијам чаша вино на вечера. Лео и Кристиано се различни. Тие жртвуваа многу за нивниот успех. Но, мојата кариера совршено ми одговара. Беше одлично“, изјави Снајдер.

На Ибица полицијата уапси играч на германската Бундеслига под сомнение дека силувал шпанскa тинејџерка.

Британски „Сан“ пренесува дека 25-годишен фудбалер бил приведен заедно со маж на иста возраст откако 18-годишна девојка им кажала на детективите дека била сексуално злоставувана во вила во Сан Хозе.

Извори блиски до истрагата тврдат за британските медиуми дека девојката е повредена и пренесена во болница, а двајцата уапсени од средата се зад решетки, а наскоро ќе има затворен распит и ќе се донесе одлука дали осомничените ќе бидат ослободени со кауција или ќе останат во притвор.

Иако името на фудбалерот не се открива, извори тврдат дека станува збор за играч кој неодамна го продолжил договорот со еден од најуспешните германски клубови. Се наведува и дека ја освоил титулата шампион на Германија.

Англиските медиуми ја пренесуваат веста дека Тотенхем летово ќе се обиде да го ангажира фудбалерот на Евертон Ричарлисон.

Клубот од Лондон веќе стапил во контакт со играчот и се започнати првичните преговори со неговите претставници.

Тренерот на Тотенхем, Антонио Конте, веќе најави дека екипата ќе треба дополнително да се засили за наредната сезона ако сака поуспешни настапи во Премиер лигата и Лигата на шампиони. Клубот веќе ги доведе Иван Перишиќ од Интер и голманот Форстер од Саутемптон.

Сега се очекува Тотенхем да одвои 60 милиони евра за бразилскиот напаѓач.

Немања Матиќ на почетокот на следната недела ќе пристигне во Рим на лекарски прегледи во екипата на Рома.

Српскиот репрезентативец го напушта Манчестер Јунајтед и ќе потпише со Римјаните како слободен играч. Тој по третпат ќе се соработува со Жозе Мурињо по заедничката соработка во Челзи и Манчестер Јунајтед.

Според „Кориере дело спорт“, Матиќ со сопругата и двете ќерки со чартер од Србија ќе пристигне во Рим во понеделник или вторник. Тој ќе потпише едногодишен договор според кој ќе добие 4,2 милиони евра. Договорот ќе има опција за продолжување на уште една година во зависност од одиграните натпревари.

Медиумите во Франција објавуваат дека челниците на Париз Сен Жерен веќе му соопштиле на тренерот Маурицио Почетино дека тој нема повеќе да ја води екипата и дека може да си бара нов клуб.

И покрај тоа што аргентинскиот тренер сеуште има договор со ПСЖ, сепак од клубот се незадоволни од неговите резултати поради што планираат предвремено раскинување на соработката. 

Бројни се шпекулациите дека нов тренер на клубот од Париз ќе биде легендарниот Зинедин Зидан, кој наводно конечно се согласил да седне на клупата на францускиот шампион.

Барселона Б, која е втор тим на истоимената шпанска екипа, од сезоната 2022/23 ќе се врати во името Барселона Атлетик.

Одлуката ја донесе претседателот Жоан Лапорта. Ова го објави прес-службата на клубот на официјалниот сајт.

Последен пат постоел втор тим под името Барселона Атлетик во 2008-2010 година. Под новото име, тимот почна да го води Пеп Гвардиола, кој потоа беше префрлен во главниот тим на гигантот од Каталонија.

Името Барселона Атлетик настанало во 1970 година и се користело до 1991 година. Тогаш тимот се викаше „Барселона Б“ до 2008 година, а потоа повторно од 2010 година., па се до денес.

Рафаел ван дер Варт го советуваше својот сонародник Френки де Јонг да не се двоуми туку да замине во Манчестер Јунајтед.

Според информациите, англискиот клуб и Каталонците се договориле за цената (80 милиони евра), но самиот играч се уште не донел одлука.

„Да бев на местото на Френки, ќе одев во Јунајтед“, изјави ван дер Варт за Ziggo Sport. – Во Барса има играчи кои можат да го направат истото, а и подобро од него. Додека другите играчи за кои станува збор се тука, нема место за Де Јонг во Барселона“.

Шпанците се надеваат дека ќе го продадат играчот од средниот ред не затоа што не им се допаѓа, туку затоа што им требаат пари.