Фабио Капело, еден од највлијателните фудбалски тренери во Италија, не крие дека е многу задоволен од работата на директорите на Милан, Паоло Малдини и Фредерик Масара. Тој во последното интервју, нагласи дека двајца имаат голем придонес за освојувањето на титулата во Серија А.

„Малдини и Масара одлично се справија со трансферите. Паоло е неверојатно талентиран и многу паметен. Уште еден позитивен факт е отпорот против доаѓањето на Ралф Рангник иако сопствениците сакаа да го ангажираат Германецот без да побараат мислење од управата“, потенцираше Капело.

Фудбалерот на Манчестер Сити, Кевин Де Брујне, кој беше прогласен за МВП во последната сезона во Премиер-лигата, вели дека доаѓањето на Ерлинг Халанд на стадионот – „Етихад“ ќе донесе нов квалитет во тимот.

„Треба да се развиваме и да напредуваме. Мислам дека во првата сезона може да постигне 20-25 голови“, беа дел од зборовите на Белгиецот.

Халанд кој вчера го псотигна победничкиот гол за Норвешка на гостувањето во Србија во Лигата на нации, неодамна ја напушти Борусија Дортмунд и се пресели во англискиот фудбал.

Челниците на фудбалскиот состав Тотенхем нема да ја искористат опцијата во договорот за да ги откупат правата на голманот, Пјерлуиџи Голини.

27-годишниот чувар на мрежата во штотуку завршената сезона одигра само 10 натпревари во сите конкуренции и прими 11 голови. Голини во претходното лето беше испратен на позајмица од Аталанта, но, не успеа да ги убеди челниците на „спарси“ да му дадат перманентен договор.

Тоа значи дека младиот голман ќе мора да се врати во Бергамо.

Голманот Давид де Хеа е избран за „Играч на сезоната“ од страна на фудбалерите на Манчестер Јунајтед.

31-годишниот Шпанец одигра полни 90 минути на 38-те првенствени натпревари во сезоната и со одличните одбрани често го спасуваше тимот од порази.

Де Хеа оваа награда ја добива по четврти пат.

Тотенхем доби официјална понуда од Ајакс за крилниот напаѓач Стивен Бергвајн. 24-годишниот крилен напаѓач е подготвен да преговара со Ајакс за негов трансфер во Холандија. Од Тотенхем ќе дозволат заминување на играчот ова лето и во моментот се разгледува понудата од Ајакс.

Бергвајн одигра 32 натпревари оваа сезона, постигнувајќи 4 гола и 2 асистенции. Тој пристигна во Тотенхем за 30 милиони евра од ПСВ Ајндховен во јануари 2020 година.

Ова лето ќе биде богато со трансфери во екипата на Манчестер Сити. Клубот ја одбрани шампионската титула во Премиер лигата, па сега се очекува голем напад на Лигата на шампиони.

Во тимот предводен од Пеп Гвардиола, веќе пристигнаа напаѓачите Ерлинг Халанд и Хулијан Алварез. Како трето засилување кое ќе биде наскоро објавено е ангажманот на Марк Кукуреља од Брајтон. 

23-годишниот фудбалер кој потекнува од школата на Барселона, ќе биде ново засилување на левата бековска позиција во Сити.

Извршниот директор на Баерн Минхен, Оливер Кан, го искажа цврстиот став дека не прифаќа влез на олигарси во клубовите вклучувајќи ги и Баварците.

„Олигарсите дефинитивно немаат никаква улога во нашата иднина. Тие никогаш немале и никогаш нема да имаат, Олигарх не е вистинскиот збор за да се опише  случувањето во светот на фудбалот. Станува збор за цели земји кои поседуваат акции во клубови како Саудиска Арабија во Њукасл или Катар во Пари Сен Жермен“, вели поранешниот голман.

Фудбалерот на Манчестер Сити, Кевин Де Брујне, по завршетокот на сезонава ги положи потребните испити и се здоби со УЕФА тренерска А лиценца.

Очигледно дека 30-годишниот Де Брујне кој има договор со Сити до 2025 година, има подготвен план за работа после својата играчка кариера.

Фудбалерот својата тренерска лиценца ја доби во фудбалскиот сојуз на Белгија, каде и ја посетуваше обуката уште од 2019 година. Тренерската А лиценца му овозможува на Де Брујне да биде тренер на екипи до 18 години и тимови од пониските лиги.

Фудбалската репрезентација на Македонија го одигра првиот натпревар од новиот циклус во Лигата на нации. Црвено-жолтите одиграа нерешено 1:1 на гостувањето против селекцијата на Бугарија. Македонија беше подобар противник на теренот, но немаше среќа во реализацијата на своите шанси кои ќе ја донесеа победата.

Свое видување за натпреварот даде и еден од подобрите играчи на теренот, Елиф Елмас.

„Натпреварот го игравме во период после краткиот одмор што беше причина да немаме ритам во играта. Беше очигледно дека квалитетно сме подобар тим од Бугарија, и сме една класа над нив, но немавме среќа да ја оствариме посакуваната победа. Се надевам дека на следните натпревари ќе влеземе подобро подготвени и ќе оствариме победи“, изјави Елмас.

Емерик Лапорт сака да го напушти англискиот шампион, а кариерата би можел да ја продолжи во Серија А. Поранешниот дефанзивец на Билбао сака да ја промени средината и да се пресели во клуб каде ќе има поголема минутажа.

Во Сити го изгуби првотимскиот статус и побарал од раководството да му биде дозволен трансфер. Ситуацијата ја следи Јувентус, кој е силно заинтересиран за Лапорт бидејќи во него гледа идеален наследник за Киелини.

Граѓаните“ се спремни да го продадат, но за неговата слобода бараат 60 милиони евра, што може да биде проблем за „бјанконерите“.