Менаџерскиот тим на Милан е во потрага по нов централен дефанзивец кој ќе биде партнер на Фикајо Томори во одбраната на тимот, после повредата на Симон Кјаер.

Директорот Паоло Малдини како приоритет за евентуален трансфер го истакнува играчот на Лил, Свен Ботман. Тој посакува да го доведе 21-годишниот холандски репрезентативец на позајмица во јануари со право на негов целосен откуп по завршетокот на сезоната.

Ботман има слични физички предиспозиции со Томори и заедно би претставувале вистински ѕид во одбраната на тимот од „Сан Сиро“.

Барселона е видно заинтересирана за доведување на играчот за врска на Олимпик Марсеј, Бубакар Камара.

Младиот репрезентативец на Франција е еден од подобрите играчи во Марсеј каде веќе се етаблира како стандарден првотимец.

Договорот на Камара со тимот од Франција му истекува на крајот од сезонава, но тој од 1 јануари има право да преговара со други клубови кои се заинтересирани за него.

Барселона за потписот на 22-годишниот играч за врска ќе мора да се бори со Манчестер Јунајтед кој исто така посакува да го види во своите редови.

Манчестер Јунајтед преку соопштение објавено на нивниот официјален веб сајт информира дека ја отвори својата тренинг база. 

Тренерот Ралф Рангник и играчите од тимот ќе почнат со етапно враќање на тренинзите, пред претстојниот дуел во Премиер лигата против екипата на Њукасл кој се игра на 27.декември.

Минатата недела базата на Манчестер Јунајтед беше затворена поради зголемениот број позитивни случаи со коронавирус меѓу играчите и персоналот во клубот од „Олд Трафорд“.

 Поради овие причини Јунајтед не ги одигра последните две кола од лигата, против екипите на Брентфорд и Брајтон. Овие два меча беа одложени и ќе се одиграат во некои наредни термини.

Преговорите на Барселона со Манчестер Сити за доведување на Феран Торес се во завршна фаза.

Според информациите кои доаѓаат од медиумите Торес веќе ги договорил личните услови со клубот од „Камп Ноу“. Барселона е спремна за услугите на шпанскиот интернационалец да плати 50 милиони евра додека шампионот на Англија побарува 60 милиони евра.

21-годишниот напаѓач на почетокот од сезоната беше речиси стандарден првотимец во тимот на Пеп Гвардиола, но како што одминуваше сезоната тој сепак падна во втор план во екипата.

Изгледни се шансите дека двата клуба ќе дојдат до меѓусебен договор и во јануари Феран Торес сепак ќе облече дресот на Барселона.

Дрис Мертенс потврди дека има клаузула за продолжување на договорот со наполитанците, но не знае дали клубот ќе ја активира.

34-годишниот играч е дел од Наполи од 2013 година, откако го напушти ПСВ Ајндховен, а неговиот актуелен договор ќе истече во јуни 2022 година.

„Има опција во договорот, ќе видиме што ќе се случи“, изјави Мертенс за Скај Спорт Италија.

Инаку, Белгиецот е најдобар стрелец на клубот на сите времиња со 141 гол на 376 натпревари.

Турскиот фудбалски гигант, Фенербахче, му врачи отказ на тренерот Витор Переира. 

Португалскиот стручњак отказот го доби после дерби натпреварот со екипата на Бешикташ кој заврши со нерешен резултат 2:2.

Фенербахче со Переира на клупата, оваа сезона покажуваше лоши резултати што доведе до тоа тие да заостануваат 14 бода зад првопласираниот Трабзонспор и да го заземат 5-то место на табелата во првенството на Турција.

Популарниот „Фенер“ сеуште не објавува кој би бил потенцијален наследник на Переира, но се очекува таа одлука да биде донесена во најбрз можен рок.

Екипата на Реал Мадрид прави напори следното лето да го донесе во своите редови играчот на Баерн Минхен Корентин Толисо. 

Толисо има договор со клубот од Баварија до крајот на сезоната и според најавите тој нема желба да го продлжи истиот.

Таквата ситуација сака да ја искористи „кралскиот клуб“ и да го повтори сценариото со Давид Алаба кој исто така пристигна од Баерн  како слободен играч без обештетување.

27-годишниот Французин е член на Баерн Минхен од 2017 година каде пристигна од екипата на лион за 41,4 милиони евра.

Покрај Реал, за услугите на Толисо се заинтересирани и ПСЖ, Јувентус и Тотенхем.

Ѕвездата во тимот на Париз Сен Жермен, Килијан Мбапе,го прослави својот 23-ти роденден и по тој повод организираше забава на која присуствуаа голем број негови соиграчи, но видно беше отсуството на Нејмар и Лионел Меси.

Младиот Мбапе од неговите тимски колеги доби подарок дрес на ПСЖ со бројот 2050 со што сакаат да асоцираат на негово останување во клубот до 2050 година.

Килијан Мбапе пристигна во Париз од екипата на Монако во 2018 година и големи се шансите ова лето тој да го напушти клубот и да се пресели во тимот на Реал Мадрид.

Клубовите во Премиер-лигата ја одбија иницијативата за времено прекинување на сезоната поради зголемениот број на заразени со корона-вирусот во екипите.

На состанокот била разгледана и идејата да се одложат натпреварите од 20. коло што е на програмата од 28 до 30 декември. Во изминатиот период беа одложени вкупно 10 натпревари во Премиер- лигата поради позитивни случаи на ковид.

Челниците на англискиот фудбал и клубовите, најавија дека ќе имаат нова средба за неколку недели се со цел да се направи нова проценка на ситуацијата.

Челзи е силно заинтересирано за плејмејкерот на Вулверхемптон Рубен Невеш.

Португалецот е голема желба на тренерот Томас Тухел, кој во него гледа идеално засилување за средниот ред. Вулверхемптон е спремен да го пушти Невеш, но за неговата слобода бара 35 милиони фунти, а Челзи веќе ги започнал преговорите.

За 24-годишниот Португалец интерес покажуваат и други клубови ширум Европа, па Челзи сака да ја победи конкуренцијата и веќе стапил во контакт со неговиот агент.