Во интервју за наполитанското радио „Кис Кис“, Џовани Ди Лоренцо го испофали Елиф Елмас.

„Елмас во последно време напредуваше многу, сега има континуитет и прерасна во врвен фудбалер. Тој ни е од голема помош“, вели Ди Лоренцо.

Тој вели дека на Италија нема да ѝ биде лесно во дуелот против Македонија во баражот за пласман на СП.

„Ќе играме против репрезентацијата на мојот пријател Елмас, против Македонија нема да ни биде лесно. Целта останува да се пласираме на Светското првенство во Катар, знаеме дека цела Италија ќе навива за нас“.

Тренерот на Барселона, Чави Ернандез, даде одговор во врска со иднината на Усман Дембеле во клубот.

„Имав личен разговор со Дембеле. Тој се чувстува среќен тука и сака да остане со нас. Усман ја препозна мојата замисла за неговата улога во новиот проект на екипата, но во моментов неможам да дадам поконкретни детали“, изјави Чави.

„На Дембеле му е потребно да започне повторно да постигнува голови со што ќе стекне поголема самодоверба. Тој е играч кој може да прави разлика во тимот. Подготвен е за настап на следниот натпревар и се надевам дека ќе се прикаже во вистинско светло“, додаде тренерот на Барса.

Се најавуваше дека јужномаериканските репрезентации можат да добијат право да се натпреваруваат во Лигата нa Нации, а сега тоа е и потврдено.

Потпретседателот на УЕФА, Збигњев Боњек за полски „Мечики“ потврди дека постигнат е договор јужноамериканските селекции да бидат дел од Лигата на Нации, а сега останува само да се утврди во кој формат.

„Ова издание на Лигата на Нации е последно во ваков формат. Одржавме состанок со јужноамериканските селекции и од 2024 година тие ќе ни се придружат. Се уште работиме на форматот во кој ќе ни се придружат и календарот. Сепак, календарот е ограничен и не можеме многу да промениме“, изјави Боњек.

Во Лига А сигурно место би имале Аргентина и Бразил, како и Колумбија, Чиле, Перу и Уругвај. Останатите четири репрезентации – Боливија, Еквадор, Парагвај и Венецуела би играле во Лига Б.

Според информациите на познатиот фудбалски новинар, Фабрицио Романо, голманот на Ајакс, Андре Онана постигнал договор за негов трансфер во Интер.

29-годишниот Онана би требало да пристигне во шампионот на Серија А како слободен играч во текот на летото.

Според Романо, голманот водел преговори и со екипата на Барселона но на крајот неговата одлука била тој да продолжи во Интер.

Андре Онана се очекува да биде наследник на Самир Хандановиќ кој има 38 години и договор до крајот на оваа сезона.

98% од фудбалерите во елитниот ранг на италијанскиот фудбал примиле по две дози вакцина, објави Серија А. Серија А сезонава не беше многу погодена од пандемијата, а бројот на позитивни случаи помеѓу играчите е релативно низок.

„Да ја одиграме својата улога и да се вакцинираме за себе и да ги заштитиме најранливите“, напиша на Твитер Џорџо Киелини, дефанзивецот на Јувентус и репрезентативец на Италија.

Италијанскиот национален здравствен институт во средата соопшти дека делта сојот и понатаму преовладува во земјата. Ситуацијата е целосноа спротивна во Англија, каде што три натпревари во средината на неделата се одложени, а уште пет најмалку нема да се играат за викендот поради проблеми на екипите со голем број заразени.

Последните податоци од Премиер лигата покажуваат дека 81% од играчите примиле една доза, додека со две се вакцинирале 68%. Англиската фудбалска лига во која се наоѓаат клубовите од вториот до четвртиот ранг објави дека 25% од фудбалерите од 72 клуба одбиле да се вакцинираат.

Весникот „Мундо Депортиво“ најави дека фудбалскиот состав Барселона во јануарскиот преоден рок може да се засили со крилото на Реал Сосиедад, Аднан Јанузај, кој во континуитет покажува добри партии во Примера Дивизион.

Тренерот на Шпанците, Чави Хернандез, бил запознаен со опцијата за привлекување на белгискиот репрезентативец и затоа ќе мора брзо да одлучи дали ќе ја искористи.

Во исто време, медиумите наведуваат дека Каталонците се фокусирани на Феран Торес од екипата на Манчестер Сити.

Екипата на Интер преку официјално соопштение објавено на клупската веб-страница информира дека спогодбено го раскина договорот со Кристијан Ериксен, кој важеше до летото 2024 година.

Причина за тоа е забраната на фудбалерот да игра во Италија со дефибрилатор, кој му беше поставен поради проблеми со срцето, што го доби за време на Европското првенство во 2020 година.

Ериксен го засили Интер во јануари 2020 година, кога беше купен од Тотенхем за 20 милиони евра. 

29-годишниот Данец за шампионот на Серија А одигра 60 натпревари и постигна 6 гола.

Продолжува со одложувањето натпревари во Премиер лигата поради позитивни случаи на ковид-19. Место десет во следното коло ќе бидат одиграни пет натпревари. Одложени се дуелите: Мачестер јунајтед – Брајтон, Саутемптон – Брентфорд, Ватфорд – Кристал Палас, Вест Хем – Норич и Евертон – Лестер.

Доколку не се појават дополнителни проблеми би требало да се одиграат натпреварите: Астон Вила – Барнли, Лидс – Арсенал, Вулвс – Челзи, Њукасл – Манчестер Сити и Тотенхем – Ливерпул.

Коронавирусот прави навистина големи проблеми, па поради тоа и тренерот на Брентфорд, Томас Франк претходно бараше да се одложи целото коло.

„Бројот на заразени со коронавирус расте во сите клубови во Премиер лигата и поради тоа сите имаат проблеми. Треба да се одложи целото коло овој викенд и Лига Купот и тоа на сите би ни дало барем една недела да се расчисти ситуацијата и да се прекине овој ланец. Со таква одлука би биле сигурни дека програмата за „Боксинг деј“ ќе се одвива според планот“, изјави Франк додавајќи дека во неговиот клуб има 13 позитивни случаи.

Тренерот на Ливерпул, Јирген Клоп, е убеден дека ќе пронајде решение во тимот во врска со најавеното отсуство на неколку свои играчи кои ќе настапат на Африканскиот куп на нации.

Турнирот се одржува од 9 јануари до 6 февруари и на него ќе настапат Мохамед Салах кој е репрезентативец на Египет, Садио Мане настапува за Сенегал и Наби Кеита за Гвинеја.

Салах оваа сезона има постигнато 21 гол за Ливерпул во сите натпреварувања, и неговото отсуство ќе се осети најмногу.

“Одамна знам дека тројцата ќе играат на турнирот и најмалку двајца ќе имаат шанса да останат таму подолго. Имаме други опции во екипата од кои сум задоволен но секако дека не ни е сеедно. Не може да имаме целосно еднакви замени за Садио, Мо и Наби. Ќе биде тешко но се надевам дека ќе се снајдеме“, изјавува Клоп.

Челниците на фудбалскиот состав Њукасл ќе понудат 100 милиони евра за напаѓачот на Фиорентина, Душан Влаховиќ, кој упорно одбива да ја продолжи соработката со италијанскиот состав.

Неговиот договор е валиден до летото во 2023 година а „виолетовите“ се обидуваат да го убедат да остане и понатаму во тимот.

Медиумите наведуваат дека за потписот на Влаховиќ се заинтересирани  екипите на Манчестер Сити, Манчестер Јунајтед и Тотенхем.