Голгетерот на Баерн Минхен, Роберт Левандовски, го израмни рекордот на легендарниот Герд Милер по бројот на постигнати голови во Бундеслигата за една календарска година.

Репрезентативецот на Полска, постигна два гола во победата над Штутгарт со 5:0 и веќе ја достигна бројката од 42 погодоци во 2021 година, и се изедначи со легендарнииот Герд Милер кој вакво достигнување направи во 1972 година.

Левандовски може да го собори рекордот на последниот натпревар за оваа година кога Баерн игра против екипата Волфсбург.

Артур Мело пристигна во Јувентус како скапо платено засилување, но испадна како најголемо промашување во поновата историја на клубот.

Неговиот трансфер од Барселона беше проценет на 72 милиони евра, а Јувентус плати 15 милиони евра плус Миралем Пјаниќ.

Јувентус сака што побрзо да се ослободи од него и е спремен да го испрати на 18-месечна позајмица со право на откуп.

Екипата на ПСЖ има намера да го доведе играчот на Реал Мадрид, Винисиус Жуниор.

 Ова би претставувало еден вид на одмазда поради тоа што „Кралскиот клуб“ веќе е извесно дека ќе потпише договор со ѕвездата на французите, Килијан Мбапе.

21-годишниот Винисиус сеуште го нема продолжено договорот со Реал Мадрид иако неодамна изјави дека би сакал да остане во шпанскиот гигант. Сепак челниците на ПСЖ ќе се обидат со примамлива финансиска понуда да го убедат играчот да се пресели во нивните редови каде би бил соиграч на неговите сонародници Нејмар и Маркињос.

Деле Али најверојатно ќе го напушти Тотенхем во јануари, бидејќи Антонио Конте нема да смета на него во остатокот од сеозната.

25-годишниот играч за врска има договор со Тотенхем до јуни 2024 година и клубот сигурно ќе сака солидно обештетување за Англичанецот.

Заинтересираните клубови не се спремни да потрошат голема сума во јануари, па затоа голема е веројатноста Деле Али да замине во некој клуб на позајмица. Деле Али играше содлично од почетокот на сезоната под водство на Еспирито Санто, но Конте јасно му порача дека не се вклопува во неговата формација

Интерес за играчот за врска покажуваат Њукасл, Вулверхемптон и Астон Вила, па готово сигурно Англичанецот ќе го напушти Тотенхем во јануари.

Хавиер Занети ја коментираше ждрепката за осминафиналето во Лигата на шампионите, која им го донесе Ливерпул за противник. Поради киксот на УЕФА, ждрепката мораше да биде извлечена двапати, а првично Интер требаше да се соочи со Ајакс.

„Нема смисла да се коментира што се случи, бидејќи сите видоа што се случи. Ја прифаќаме ждрепката и подготвени сме да се соочиме со Ливерпул. Тие се врвен тим, но и ние сме. Интер има одлична историја. Имаме многу време да се подготвиме и ќе бидеме подготвени за тие пресметки. Големо задоволство е да се игра во елиминациската фаза за прв пат по 10 години. Интер отсуствуваше предолго и одлично е што сме повторно тука. Ливерпул е многу добар тим, но ние сме Интер и можеме да покажеме за што сме способни“, додаде Занети.

Фудбалскиот клуб Милан планира да ја засили одбраната на екипата која е ослабена поради отсуството на Симон Кјаер кој поради повреда на лигаментите од коленото беше опериран и нема да игра до крајот на сезоната.

Информациите од Милано велат дека прв избор на тренерот Пиоли е Србинот Никола Миленковиќ од Фиорентина.

Иако неговиот актуелен договор со „виолетовите“ е со важност до 2023 година, преговорите за негов трансфер се во тек и се очекува тој да пристигне на „Сан Сиро“ во јануари. 

Салцбург е познат како клуб кој во последните години лансираше голем број на таленти, а сега има нова ѕвезда за која се „тепаат“ европските гиганти.

Станува збор за 21-годишниот Бренден Аронсон, кој во јануари оваа година пристигна во Салцбург од Филаделфија. Аронсон е офанзивен играч за врска, кого го карактеризира голема техника и чуство за гол и веќе е стандарден репрезентативец на САД.

Најсилен интерес за него покажуваат италијанските гиганти Милан и Јувентус кои веќе стапиле во контакт со неговиот агент.

Салцбург за слободата на својот „бисер“ бара 25 милиони евра, па се очекува наскоро да започнат преговори со италијанските клубови.

Познатиот спортски новинар Фабрицио Романо, сподели информација дека претседателот на Барселона, Жоан Лапорта, во Торино остварил работна средба со фудбалскиот менаџер Мино Рајола.

Според него иако Барселона се соочува со големи финансисиски проблеми, сепак клубот ќе се обиде да ги доведе на „Ноу Камп“ најголемите клиенти на Рајола, Ерлинг Халанд и Пол Погба.

Двајцата играчи се опции за летниот трансфер период, кога Халанд има клаузула со која може да ја напушти Борусија Дортмунд, а на Погба му истекува договорот со Манчестер Јунајтед и ќе биде слободен играч. 

Селекторот на нашата футсал репрезентација, Васко Скендеровски, го објави поширокиот список за двата пријателски меча со Црна Гора закажани за утре и задутре  во СЦ Борис Трајковски.

„Повикавме претежно играчи од домашниот шампионат. Резултатот е значен за подигнување на самодовербата пред претстојните квалификации за Светското првенство“, вели Скендеровски.

Повикани играчи: Голмани: Антонио Петровски (СК Проект Цико), Влатко Петровски *СК Проект Цико), Иван Стојановски (Шкупи);Одбрана: Реџеп Сулејман (Шкупи), Таулант Исмаили (ФК Ликени, Косово), Ферид Агуши (Шкупи), Драган Петровиќ (Шкупи), Берат Рамадани (Арбен Бајрами); Напад: Иван Крстевски (СК Проект Цико), Алекандар Глигоров (Железарец), Игор Леовски (СК Славија Прага, Чешка), Мартин Мехмединовиќ (СК Прокет Цико), Дарко Ранготов (СК Проект Цико), Мартин Тодоровски (СК Проект Цико), Еркан Сефери (Шкупи), Јакуп Рамадани (ФК Ликени, Косово), Адријан Мицевски (Штутгартер 2020, Германија).

Дефанзивецот на Норич, Макс Аронс, може да добие понуда во текот на наредното лето да се преслеи во редовите на Рома.

Според медиумите, луѓето од „Олимпико“ ги процениле квалитетите на младиот фудбалери и затоа сакаат да испратат понуда , тврди „Кориере дело спорт“.

„Канаринците“ се борат за опстанок во Премиер лигата а 21-годишниот десен бек покажува солидни резултати од почетокот на сезоната. За младиот талент се заинтересирани Тотенхем и Евертон.