Лаутаро Мартинез беше еден од најдобрите играчи на Интер во петокот при победата на неговата екипа од 1-3 на гости против Специја, но неговата иднина во Интер е неизвесна.

Барселона може да ја искористи оваа ситуација со купување на играчот во следниот преоден рок, пишува „Кориере Дело Спорт“.

Според оваа информација во договорот за Мартинез би можеле да бидат вклучени Миралем Пјаниќ, кој моментално е позајмен во Бешикташ и Мемфис Депај, кој не е во плановите на тренерот на Барселона, Чави.

Ѕвездата на Париз Сен Жермен, Лионел Меси ќе го пропушти натпреварот од францускиот шампионат против Анжер, соопштуваат од клубот.

Во соопштението на ПСЖ  се вели дека на 34-годишниот Аргентинец му е дијагностицирано воспаление на левата нога, и дека следната изјава за состојбата на играчот ќе биде дадена за два дена.

Натпреварот со Анжер кој се игра утре ќе го пропуштат и Верати, Кимпембе, Паредес, Дракслер, Ерера, Курзава и Диало.

Навивачите на Челзи на социјалните мрежи го критикуваа напаѓачот Ромелу Лукаку, откако тој промаши чиста шанса во победата од 2-0 над Кристал Палас во полуфиналето на ФА Купот.

Лукаку не беше во стартниот состав и на теренот влезе во 77. минута од средбата. Во еден од следните напади на „сините“, Тимо Вернер му ја додаде топката на Ромелу Лукаку, кој го промаши противничкиот гол од два метри.

Навивачите на Челзи го критикуваа Лукаку поради слабата реализација, а еден навивач на социјалните мрежи го повика клубот да го продаде белгискиот напаѓач.

Четири месеци по доаѓањето на Бразилецот Даниел Алвеш во Барселона, тимот е на второто место во поредокот во шпанската Ла Лига и значително го подобри својот настап.

Каталонскиот стручен штаб на чело со тренерот Чави Хернандез има намера да го задржи 38-годишниот Алвеш во своите редови, пишува шпанскиот весник „Диарио спорт“.

Чави ги цени квалитетите на Бразилецот и неговото искуство го смета за многу важно во работата со помладите играчи на Барселона.

Сепак, конечната одлука за иднината на Дани Алвеш во шпанскиот гигант ќе ја донесат членовите на управата на клубот, меѓу кои и Матео Алемани и Жорди Кројф. Се очекува тоа да се случи по завршувањето на сезоната во Ла Лига.

Тренерот на Реал Мадрид, Карло Анчелоти е импресиониран од играчот на Челзи, Рис Џејмс и сака да го доведе на „Сантијаго Бернабеу“.

Скаутите на Реал ја анализирале играта на Џејмс при нивниот дуел од Лигата на шампионите и се на мислење дека тој ќе биде одлично засилување за тимот.

Анчелоти сака да види промени во составот, и да ја засили бековската линија, иако тимот има одлична сезона и оди кон титулата во Шпанија и ЛШ. Од Реал знаат дека евентуалниот трансфер би бил скап и тежок за реализација, но во предвид го земаат големиот потенцијал за развој на играчот. Оваа сезона Рис настапи на 31 натпревар за Челзи и има 6 гола и 7 асистенции.

Српскиот фудбалер во дресот на Лацио, Сергеј Милинковиќ – Савиќ, ќе го напушти клубот ова лето и најверојатно ќе се пресели во редовите на Јувентус, откриваат италијанските медиуми.

Договорот на фудбалерот со Лацио има важност до 2024 година, но се очекува челниците на клубот и претседателот Лотито, да се согласат со продажба на Србинот како би оствариле прилично висока добивка. Очекувањата се дека Јувентус за реализација на трансферот ќе одвои околу 70 милиони евра.

Сергеј Милинковиќ – Савиќ сезонава има скор од девет гола и десет асистенции.

Тренерот на Ливерпул, Јирген Клоп, најави дека ќе им даде одмор на дел од своите играчи за дербито во Премиер лигата против Манчестер Јунајтед кој се игра вечерва на „Енфилд“.

Натпреварот е од голема важност за двете екипи, во однос на остварувањето на своите цели за сезонава. Ливерпул продолжува да се бори за титулата во Англија, додека Јунајтед сеуште е во трка за место воТоп 4.

Екипата на Ливерпул има шанси и за освојување на ФА Купот и Лигата на шампионите.

„Се обидуваме да одлучиме која е најдобрата формација за дуелот со Манчестер Јунајтед. Мора да размислуваме за интензитетот во изминатите натпревари, и кои од играчите играа најчесто. Ќе мора дел од фудбалерите да добијат одмор и да искомбинираме состав со најподготвените од нив, изјави Клоп.

Фудбалерот на Борусија Дортмунд, Ерлинг Халанд, е многу блиску до трансфер во Манчестер Сити, со кого наводно веќе ги договорил личните услови.

Оваа вест ја објавуваат најпознатите англиски медиуми, меѓу кои Дејли Мејл и Скај Спорт. Популарните „граѓани“, за младиот норвешки напаѓач подготвиле петгодишен договор според кој ќе заработува 31 милиони евра годишно, со што ќе стане најплатен играч во клубот, и ќе ја надмине заработката на Кевин де Брујне кој има плата од околу 24 милиони евра.

Како што е познато, Халанд во договорот со Борусија Дортмунд има откупна клаузула од 75 милиони евра, што секој клуб заинтересиран за доведување на фудбалерот ќе мора да ја плати.

Единствен проблем за Сити во врска со трансферот претставува високата провизија која ја побаруваат менаџерот Мино Раиола и таткото на фудбалерот, Алф-Инге Халанд.

Ралф Рангник знае каков предизвик го чека утре кога неговиот тим гостува кај Ливерпул. Германецот зборуваше за својот сонародник Јирген Клоп, кого го познава долго време, како и за состојбата на Бруно Фернандеш, кој доживеа сообраќајна несреќа.

„Како што кажав по натпреварот со Норвич, мора да бидеме покомпактни, мора да го најдеме вистинскиот баланс помеѓу поседот на топката и нашата работа во одбраната. Покомпактни, поагресивни. Ова мора да го покажеме утре против еден од најдобриот, можеби најдобриот тим. Иако за многу луѓе сме веројатно аутсајдери, знаеме дека ако го подигнеме нивото, можеме да играме многу силно и тогаш ќе имаме шанса за три бода. Ова е амбицијата и нашата цел за утре“, рече Рангник.

Германецот објасни дека Бруно Фернадеш е добро физички: „Тој тренира со тимот. Несреќата се случи на пат кон Карингтон. Колку што знам, нема повредени. Тој е добро и ќе биде добро за утре. Варан беше на тренинзите, но тој тренира сам. Ситуацијата е иста и за повредените играчи“.

Карло Анчелоти се сретна со претседателот на клубот Флорентино Перез.

Се разговарало за можно засилување на тимот, но газдата јасно ставил до знаење дека набавките се можни само во случај на продажба на други играчи.

Во исто време, мадридскиот клуб е уверен дека благодарение на продажбата на голем број играчи може да заработи од 75 до 100 милиони евра, не сметајќи го заминувањето на Марсело, Иско и Герет Бејл како слободни играчи, што ќе ослободи средства од буџетот за плата.

Шпанскиот колос е заинтересиран за играчот од средниот ред на Монако, Орелијан Чуамени, но пред тоа треба да договори излезни трансфери.