Карло Анчелоти изјави дека неговиот тим нема да го потцени Шахтјор, иако во првиот меч во Украина победи со високи 5-0.

„Натпреварот е од големо значење бидејќи пораз или победа ќе промени многу. Ако бидеме поразени после ќе мора сигурно да победиме во последните два меча. Сигурен сум дека тимот ќе даде се од себе за да ги освоиме трите бода“, изјави Анчелоти.

Потоа Италијанецот доби прашање дали проблемите на Азар можеби се од ментална природа.

„Азар тренира добро и му преостанува само една работа. Треба да има надеж, треба да верува дека ќе дојде неговиот момент. Треба да го следи примерот на својот соиграч Маријано Дијаз кој одигра одлично против Елче. Едноставно треба да верува во себе и да биде професионалец“, истакна Анчелоти.

Напаѓачот на Баерн Минхен, Роберт Левандовски, го запиша својот 100-ти настап во Лигата на шампиони. Својот јубилеј Левандовски го прослави на најдобар можен начин, постигнувајќи хет-трик за својот Баерн кој на „Алианц Арена“ ја совлада екипата на Бенфика со резултат 5:2.

Роберт Левандовски со постигнатиот хет-трик досега има вкупно 81 голови во Лигата на шампиони и се наоѓа на третото место на листата најдобри стрелци во ова натпреварување зад Кристијано Роналдо кој има 139 и Меси со постигнати 123 гола.

Тренерот на Манчестер Јунајтед, Оле Гунар Солскјер, после натпреварот против Аталанта во Лигата на шампионите кој заврши со резултат 2:2, даде изјава во која не штедеше пофалби за Кристијано Роналдо кој го спореди со легендарниот кошаркар Мајкл Џордан. 36-годишниот Португалец беше стрелец на двата гола за Јунајтед на оваа средба.

„Кристијано за нас е тоа што беше Мајкл Џордан за Чикаго Булс. Никој не треба да се сомнева во нивниот карактер. Тие никогаш не се предаваат, никогаш не се откажуваат и секогаш одат само напред“, изјави Солскјер.

Кристијано Роналдо после четири кола од Лигата на шампиони, има постигнати 5 голови за екипата од „Олд Трафорд“.

Фудбалерот на ПСЖ, Лионел Меси, изјави оти не размислува да се повлече од професионалниот фудбал по Светското првенство 2022 во Катар.

„Искрено, не размислувам за пензија. После тоа што ми се случи живеам од ден за ден, од година за година. Не знам што ќе биде на Светското првенство или по завршувањето на Светското првенство. Не размислувам за тоа. Ќе се случи тоа што треба да се случи во тоа време“, изјави Меси во интервју за шпански „Спорт“

Меси призна дека трансферот од Барселона во ПСЖ во летниот преоден рок било голема промена во неговиот живот, но вети дека еден ден ќе се врати со семејството во каталонската престолнина.

Според пишувањата во шпанските медиуми, управата на Реал Мадрид подготвила нов договор за Бразилецот Винициус.

Винициус Жуниор е член на „Кралскиот клуб“ од 2018 година кога пристигна како неафирмиран играч од Бразил. Во моментов бразилскиот напаѓач се наоѓа во извонредна форма и е еден од најдобрите играчи на Реал. Неговите примања во моментот се 3,5 милиони евра по сезона, но со новиот договор неговата плата ќе изнесува 10 милиони евра по сезона.

Според информациите кои ги пренесува каталонскот портал „Ел Национал“ Мино Раиола сака да го одведе Ерлинг Халанд во Барселона.

Менаџерот на ѕвездата на Борусија Дортмунд е во одлични пријателски односи со претседателот на Барселона, Жоан Лапорта и е подготвен да издејствува договор за негов премин на „Ноу Камп“ во 2022 година.

Како што е познато откупната клаузула на Ерик Халанд која изнесува 75 милиони евра ќе стане активна следното лето, но Раиола е отворен за компромис со Барса поради нивната незавидна финансиска состојба.

Жоао Феликс сериозно размислува да ја промени средината, пренесуваат шпанските медиуми.

Португалецот падна во втор план кај Диего Симеоне откако пристигна Гризман, па неговата минутажа значително ќе се намали оваа сезона. Најсилен интерес за него покажуваат ПСЖ и Ливерпул. „Светците“ во него гледаат идеален наследник на Мбапе, кој е на излезна врата.

„Јорганџиите“ за неговиот трансфер бараат 80 милиони евра, а ПСЖ е спремен да ја плати таа сума.

Неодамна Њукасл го отпушти Стив Брус, а од тогаш клубот и понатаму е без менаџер, меѓутоа сега од Островот се тврди дека новите сопственици го избрале новиот предводник. Според последните информации, Унаи Емери ќе биде новиот шеф на стручниот штаб на англискиот премиерлигаш. Во овој момент Емери го води Виљареал, а наводно шпанскиот клуб се согласил да го пушти Емери за шест милиони евра оштета.

За Емери евентуалното преземање на Њукасл би било враќање во Премиер лигата каде што го водеше Арсенал со кој не се прослави.

Амбициите на Њукасл со новите сопственции се големи, меѓутоа првата задача на новиот стратег ќе биде да избори опстанок во Премиер лигата. Во овој момент тимот се наоѓа на претпоследното место на табелата и после 11 кола со четири освоени бодови и се уште чека на првата победа.

Нашиот најдобар фудбалски судија, Александар Ставрев, повторно ќе биде активен во Лигата на Европа.

Тој ќе го води мечот во Белгија меѓу Генк и англискиот состав Вест Хем, кој ќе биде одигран в четврток од 18:45 часот во рамките на четвртото коло во групата Х.  Негови помошници ќе бидат Дејан Костадинов и Куштрим Лика додека Дејан Јакимовски ќе биде во улога на четврти судија.

Ќе потсетиме дека белгискиот тим е закован на дното на табелата додека Вест Хем ја има челната позиција.

Швајцарското јавно обвинителство покрена обвинение за измама против поранешниот претседател на ФИФА Сеп Блатер и Мишел Платини кој беше прв човек на УЕФА.

Истрагата против двајцата фунционери се водеше 6 години а се однесуваше на незаконска исплата на 2 милиони швајцарски франци од ФИФА кон Платини, на име консултантски услуги во 2011 година.