Синоќа во Скопје беше презентирана автобиографската книга „Секогаш на победа“, дело на Кирил Лазаров, еден од најдобрите ракометари на сите времиња. Најдобриот стрелец на Лигата на шампионите и рекордер по многу основи кога е во прашање светот на ракометот, на хартија ја пренесе својата ракометна и животна приказна во соработка со српскиот новинар Жика Богдановиќ, основач на регионалниот ракометен портал „Балкан-Хандбал“.
Лазаров на промоцијата истакна дека во автобиографијата има многу возбудливи детали и стои зад напишаното.
„Сите Македонци знаат многу работи за мене, но во книгата ќе може да прочитате многу работи кои не сте ги знаеле“, порача вечерва Лазаров.

Лазаров преку Пелистер, Загреб, Веспрем, Сиудад Реал, Атлетико Мадрид, Барселона до Нант стигна до ракометните височини.

На промоцијата присуствуваа ракометни авторитети како Пепи Манасков, Стевче Стефановски, Иван Марковски, претседателот на Ракометната федерација на Македонија, Живко Мукаетов, Каролина Гочева, Симон Трпчевски и многу, многу други…

Веспрем најмалку до крајот на месец ноември ќе настапува без Расмус Лауге. Данецот во натпревар од Лигата на шампионите против Динамо Букурешт во 38. минута заработи повреда на скочниот зглоб.

Времето за опоравување според направените анализи ќе биде четири до пет недели, а можеби и подолго.

Лауге ќе ја пропушти ЕХФ неделата и дуелите на Данска од Златната лига, а би можел и да го пропушти и Европското првенство во Унгарија и Словачка, доколку не се опорави навреме.

Еден од најдобрите светски ракометари на сите времиња, Никола Карабатиќ, го продолжи договорот со својот сегашен клуб Париз Сен Жермен. Од францускиот клуб потврдија дека Карабатиќ ќе остане во Париз до 2023 година со цел да се освои трофејот во Лигата на шампионите.

„Многу сум среќен што ќе продолжам да го носам дресот на ПСЖ и во иднина. Се надевам дека ќе освоиме што е можно повеќе титули заедно“, изјави Карабатиќ, кој е трикратен олимписки шампион со Франција.

Домагој Дувњак и Швеѓанецот, Никлас Екберг, ги продолжија договорите со екипата на Кил која утре ќе гостува кај Вардар во рамките на новото коло во Лигата на ракометните шампиони.

Тие ќе останат во бундес-тимот до 30 јуни во 2024 година иако постои можност тој термин да биде продолжен.

Дувњак потпиша за Кил во 2014 година додека Швеѓанецот го носи дресот од 2012 година. Двајцата беа дел од екипата која ја освои европската круна во сезоната 2019/20.

Тренерот на екипата на Кил, Филип Јиха, нема да може да рачуна на двајцата свои најдобри ракометари на дуелот од Лигата на шампионите против Вардар.

Германскиот тим, во Скопје ќе допатува без Стефан Вајнхолд и Сандер Сагосен. Причината поради која овие двајца ракометари ќе бидат отсутни е нивниот позитивен тест на ковид-19. Тие мора да останат во карантин и нема да можат да настапат за својата екипа.

Натпреварот Вардар – Кил е на распоред за утре во среда во 20:45 часот.

Ракометарите на Вардар 1961 влегоа во серија од два порази во Лигата на шампиони, а веќе в среда имаат нов тежок предизвик. Во Скопје доаѓа легендарниот германски шампион, Кил.

Во пресрет на мечот, на денешната прес-конференција првиот човек на клупата на „црвено-црните“, Веселин Вујовиќ вели:

„Кил доаѓа кога не е во најдобра форма и има некои играчи кој не се во составот. Нас повеќе не оптеретуваат вестите токму околу составот, јас би сакал Кил да дојде во полн состав, за да Вардар го покаже својот квалитет. Сакам Вардар да не игра само во моментите на инспирација, носен од добрата атмосфера, па да падне како против Монпеље. Сакам да победуваме и кога не играме најдобро. Не треба да бараме оправдувања, сите знаат дека ние сме нова екипа. Ме радува тоа што Вардар има простор да напредува, да биде уште подобар. Игравме добро против Алборг, ја загубивме средбата во последните неколку минути од првото и првите неколку минути во второто полувреме. Противникот знаеше да ги казни нашите грешки“.

Средбата в среда во „Јане Сандаски“ се игра со почеток од 20.45 часот.

Македонија го има шестото место на ранг листата на ЕХФ. Тоа значи дека нашиот ракометен шампион во наредната сезона ќе стартува директно во групната фаза во елитата на Европа.

Во второто по ранг натпреварување ќе имаме три места. Една екипа ќе оди директно во група, а другите две ќе треба да поминат низ квалификациите.

Што се однесува до ТОП 10 на ЕХФ , први се Германците пред Шпанците кои ја спуштија Франција на третото место.

Членот на македонската ракометна репрезентација, Дејан Манасков, објави на социјалните мрежи дека му е извршена успешна операција на лигаментите од коленото. Поради здобиената тешка повреда тој нема да настапи за репрезентацијата на Македонија на Европското првенство во 2020 година.

„Операцијата помина добро, се чувствувам одлично. Благодарам за сите ваши пораки со поддршка изминативе две недели. Интересниот дел може да започне, се гледаме наскоро, ве сакам сите “ – гласи пораката на Манасков.

Шпанија, Португалија и Швајцарија поднесоа заедничка кандидатура за организација на Европското првенство (ЕП) во ракомет во машка конкуренција во 2028 година, објави Европската ракометна федерација (ЕХФ).

Трите земји ги споија во едно кандидатурите, откако претходно Шпанија и Португалија излегоа со заедничка кандидатура, додека Швајцарија поднесе кандидатура за ЕП 2026 и ЕП 2028.

Прифаќајќи ја заедничката кандидатура на Шпанија и Португалија за ЕП 2028, Швајцарија ги повлече своите кандидатури за завршните турнири во 2026 и 2028.

Трите земји во заедничката кандидатура, меѓу друго, како место за одигрување на завршните натпревари на првенството го наведао стадионот на фудбалскиот гигант Реал, „Сантијаго Бернабеу“.

Одлуката за организација на ЕП 2028 ќе биде донесена на 20 ноември во Виена.

Тренерот на Вардар, Веселин Вујовиќ пред натпреварот истакна дека домаќинот нема да ги повтори грешките од Скопје, но и дека Вардар нема да излезе на терен со „бело знаме“.

„Ќе биде многу поразличен натпревар од тој што го одигравме во Скопје. Ние успеавме да ја успориме нивната игра, да не трчаме многу и тоа ни донесе резултат, односно победа. Но, тие сега Алборг сигурно нема да ги повтори грешките од Скопје. Нивниот контранапад е многу поопасен од нашиот. Нам ни недостасува Борко, кој има мали здравствени проблеми, но тука е Сафар да го замени. По мечот со Монпелје бевме загрижени, затоа што јавноста и ние самите очекувавме многу повеќе. Но, на тој натпревар се покажа дека во Европа се игра квалитетен ракомет и дека нема лесни противници. Вардар мора уште многу да направи и да работи за да може да се надигрува со најдобрите. Ние не патуваме со бело знаме, мораме да веруваме во себе и еден добар меч во Алборг ќе ни биде од големо значење за важниот натпревар со Кил во Скопје“, рече Вујовиќ.

По четири одиграни кола во Лигата на шампионите,  Вардар се наоѓа на делба на третата позиција во групата со пет бода, колку што имаат ПИК Сегед и Монпелје.