Најдобрите македонски ракометари продолжуваат со подготвките за настап на Светското првенство.

Селекторот Кирил Лазаров и неговите избраници, во Стара Пазова ја одработуваат првата фаза. Филип Кузмановски ја пренесе атмосферата во националниот тим.

„Расположението и мотивацијата се на највисоко ниво. Пред нас е уште едно големо првенство. Сите знаеме колку беше тешко да дојдеме до него и колку сите напорно работиме за да бидиме дел од овој колектив.

Од прв ден почнавме со анализа на нашите противници. Ќе се соочиме со квалитетни репрезентации, мораме да бидеме добро подготвени, и физички и тактички. Ќе имаме доволно време да се спремиме до стартот на првенството.
Во следниот период ќе одиграме и контролни натпревари на кои ќе можеме да го пробаме сето она што го подготвуваме за нашата група“.

Македонија на Светското првенство, своите натпревари во Д-групата ќе ги игра во Вараждин, Хрватска.

Првиот натпревар Македонија ќе го одигра на 15.јануари од 20.30 часот против Унгарија, два дена подоцна од 18 часот Македонија ќе игра против Холандија, а на 19.јануари последен противник во групата на избраниците на Лазаров ќе им биде Гвинеја.

Македонската машка ракометна репрезентација се подготвува во српскиот град Стара Пазова за настап на претстојното Светско првенство кое ќе се одржи во јануари идната година во Хрватска, Данска и Норвешка.

Меѓу повиканите 20 ракометари е и младиот македонски репрезентативен голман, Иван Галевски, кој истакна дека настапот на Светското првенство е голем предизвик и мотив плус сите повикани да го дадат својот максимум.

„Чест и задоволство ми е што сум дел од овој колектив. Нè очекува еден голем предизвик, но тоа не треба да ни претставува притисок, напротив еден мотив плус за да секој го даде својот максимум. Подготовките се одвиваат добро и се надевам дека спремни ќе го дочекаме стартот на Светското првенство“, изјави 20-годишниот голман на Алкалоид за официјалниот сајт на Ракометната федерација на Македонија.

Македонската репрезентација настапот на Светското првенство ќе го почне на 15 јануари против Унгарија во Вараждин.

Најтрофејниот македонски ракометен клуб Вардар 1961 го продолжи денеска договорот со украинскиот интернационалец Дмитро Горига.

Како што е соопштено, двете страни се договорија за продолжување на соработката за уште една сезона, до крајот на натпреварувачката 2025/2026.

„Горига сезонава покажа дека неговото ангажирање е вистински погодок и во многу ситуации ги потврди своите голгетерски способности. Борбеноста и лојалноста кон клубот секогаш биле очигледни, и не се штедеше тоа да го покаже и на терен“, посочи Вардар 1961.

Продолжувањето на соработката со Горига е во рамки на плановите на клупското раководство за создавање квалитетен и конкурентен тим за следните сезони.

„Како клуб работиме на формирање тим и задржување на сите играчи за кои сметаме дека можат квалитетно да помогнат, и на ангажирање на засилувања кои ќе донесат дополнителен квалитет. Во преговори сме со сите играчи кои можат да придонесат за силен Вардар, и знаеме дека изборот ќе ни донесе успех во иднина“, изјави за клупскиот сајт оперативниот директор на РК Вардар 1961, Андрја Нунев.ег

Загрепската полиција поднесе кривична пријава против ракометарот на хрватскиот првак Загреб, Милош Кос, кого го сомничи за физички напад врз клупски колега.

Инцидентот се случи на 27 ноември по одигрување на натпреварот меѓу Загреб и Нант во Лигата на шампиони.

Со истрагата е утврдено дека Кос по натпреварот во соблекувалната на Загреб Арена го нокаутирал соиграчот Матеј Мандиќ (22), а поголем инцидент спречиле другите ракометари на Загреб.

На инцидентот претходел вербален конфликт, а според пишувањата на локалните медиуми, Кос физички го нападнал голманот Мандиќ, кој му приговорил дека не се трудел доволно на теренот во поразот од Нант.

Александар Стефановски, претседателот на РК Бутел Скопје ја поднесе својата кандидатура за претседател на македонската ракометна федерација на состанокот на Управниот одбор на РФМ.

Иако сум млад, верувам дека искуството кое го стекнав во ракометот и во РК Бутел, како и во Управниот Одбор, ми дава доволно основа да извршам позитивни промени. Со посветена работа и поддршка од околината, имам намера да помогнам во натамошен развој на нашиот спорт.

Стефановски изјави на денешниот состанок на УО на РФМ: “Сега сакам акцент да биде на настапот на репрезентација на СП, а потоа ќе откријам повеќе детали за кандидатурата и моите планови.”

Изборното собрание на ракометната федерација ќе се спроведе на 1 март 2025 година.

Македонскиот репрезентативец, Жарко Пешевски и во иднина ќе биде дел од актуелниот ракометен шампион Еурофарм Пелистер.

Искусниот кружен напаѓач ја прифати понудата на „зелено-белите“ и уште најмалку една година ќе остане во Битола со опција и за дополнителна сезона.

Жаре во 2022 година се врати на домашната сцена по епизодата во Германија каде беше дел од Штутгарт. Претходно настапуваше и за украински Мотор Запорожје, а во Македонија ги бранеше и боите на Металург.

Инаку Пешевски е еден од капитените на Пелистер.

Селекторот на машката ракометна репрезентација на Данска, Николај Јакобсен, го објави скратениот список пред домашното СП 2025.

Данците почнуваат нова ера без Микел Хансен, но и без Никлас Ландин, кој заврши со националниот тим, па на голманската позиција ќе бидат Емил Нилсен и Кевин Мелер.

Го нема ниту Ханс Линдберг, кој исто така не игра повеќе за националниот тим, но Јакобсен го селектираше Менса Ларсен, кој ги пропушти ОИ, но играше на претходните три СП кога Данска освојуваше злато.

Тука се Лауге и Мелгард, но и Андерсон, Питлик и Гидсел, кои играат во одлична форма сезонава.

Тој смета на 19 ракометари за собирот после Нова Година, а Данска пред Мундијалот на домашен терен ќе игра две пријателски средби со Бахреин на 9 и 10 јануари.

Еурофарм Пелистер како последна активност оваа година си ја зацрта најважната мисија, а тоа е да ги израдуваат дечињата од ранливите категории.

Хуманата акција на натпреварот против Вардар 1961 заврши успешно. Плишаните мечиња и детските играчки кои симпатизерите, навивачи ги донесоа на гореспоменатата средба се најдоа во вистинските раце.

Утринава дел од ракометарите на Пелистер ги даруваа во основното училиште со ресурсен центар ,,Кочо Рацин’’ од Битола.

Селекторот на македонската ракометна репрезентација Кирил Лазаров денеска го соопшти списокот на ракометари за настап на Светското првенство што во јануари ќе се одржи во Хрватска, Данска и Норвешка. Сите повикани играчи се од домашното првенство, односно од три клубови Алкалоид, шампионот Еурофарм Пелистер и од Вардар.

На списокот на Лазаров немаше место за долгогодишниот репрезентативец Филип Талески. Членот на Бенфика не беше повикан ниту за претходниот собир за дуелите со Естонија и Литванија во евроквалификациите. Голманот Мартин Томовски од германски Потсдам доби статус на резерва и не е на првичниот список.

На голманските позиции освен капитенот Никола Митревски ќе конкурираат и Марко Кизиќ и Иван Галевски. Леви крила се Петар Атанасијевиќ и Иван Џонов, а од спротивната страна се повратникот Ненад Костески и Александар Петковски. На десната бековска позиција повикани се Томислав Јагуриновски, Мартин Велковски и Мартин Серафимов. На центарската позиција конкурираат Марко Митев и Игор Ѓорѓиев, а како леви бекови повик добија Филип Кузмановски и Павле Атанасијевиќ. Лазаров повика четворица пикери, Жарко Пешевски, Милан Лазаревски, Валентин Карасманакис и Марко Стојковиќ, додека повик има и за двајца дефанзивци Никола Маркоски и Михајло Младеновиќ.

Ракометарите на Еурофарм Пелистер триумфално ја завршија оваа календарска година, откако во последниот меч во декемвриската програма како гости го совладаа тимот на Пролет со 23-37. Битолчани одиграа квалитетен меч во кој целосно го контролираа резултатот, освојувајќи заслужени бодови со кои остануваат во трката за првото место во Суперлигата пред почетокот на плеј-офот.

Избраниците на Раул Алонсо беа предводени од Цветан Кузмановски, Павле Атанасијевиќ и Ненад Костевски, кои го завршија мечот со по шест, односно десет погодоци.

Пелистерци ја забележаа четиринаесеттата победа сезонава, додека Пролет останува на учинок од пет триумфи, четири нерешени средби и шест порази. За суперлигашите следува зимската пауза, а возбудувањата ќе продолжат на почетокот од февруари следната година.

Шампионатот на Македонија продолжува на 8 февруари 2025 година со дуелот на Еурофарм Пелистер против Куманово во Битола.