Од РК Вардар и официјално го потврдија трансферот на Анте Кудуз. Од следната сезона на позицијата лев бек во тимот на Вардар 1961 ќе игра хрватскиот интернационалец Анте Кудуз (25). Македонскиот првак потпиша двегодишен договор со Кудуз и тој во Скопје би требало да остане до летото 2023 година. Кудуз (202 см.) доаѓа од екипата на Динамо Букурешт каде настапува и лани беше прогласен за најдобар играч во првенството на Романија. Лани настапуваше со Динамо Букурешт во групната фаза од ЛШ, во група Д. Со екипата избори пласман во осминафиналето на ЛШ, но беа откажани натпреварите и административно беа одредени учесниците за Ф4 турнирот. Кудуз таа сезона постигна 61 гол, а особено значајно беше неговата улога токму во дуелите со Спортинг во елиминациите и пласманот за осминафиналето. Сезонава на 4 натпревари во Лига Европа досега постигна вкупно 11 гола. Динамо Букурешт е во група со Спортинг, Кристијанстад, Фуксе Берлин, Татран Прешов и Ним.

Живко Мукаетов останува прв човек на ракометот во Македонија и во следните четири години. Мукаетов едногласно ја доби довербата од страна на сите делегати, а со оглед на тоа што немаше противкандидат за прв човек на ракометот беше избран со аплауз. „Сакам да се заблагодарувам на поддршката и соработката која ја имавме во сите овие години. Можам да ветам дека ќе продолжиме да работиме. Со давање на идеи, заеднички да направиме уште подобро за македонскиот ракомет. Свесни сме дека со младите треба да работиме многу повеќе, тука сме заеднички сите да го направиме тоа. Голема благодарност до сите и ајде заедно да работиме за уште подобра сегашност и иднина на македонскиот ракомет“, изјави Мукаетов веднаш по добивањето на довербата од делегатите. Со ова Живко Мукаетов продолжува да ја води РФМ и во следните четири години, а овој нов мандат ќе биде со важност до јануари во 2025 година.

РК Еурофарм Пелистер и тренерот Жељко Бабиќ потпишаа нов договор со важност до јуни 2024 година. Клубот и хрватскиот тренер се на иста бранова должина и заеднички ќе ја продолжат надградбата на проектот.
48-годишниот Бабиќ дојде во Битола во првите денови од 2020 година и ја водеше екипата во прекинатата сезона заради коронавирусот и во првиот дел од тековната сезона, во која битолскиот клуб одигра шест официјални натпревари.
Пред да дојде во Еурофарм Пелистер, тренерот од Сплит работеше во Меткович, Кршко, Сплит, Горење Велење, Мешков Брест, а беше и селектор на хрватската ракометна репрезентација. Бабиќ е трет хрватски тренер во Битола, по Костелиќ и Мунетиќ.

Тренерот на ракометарите на Еурофарм Пелистер, Жељко Бабиќ, вели дека е задоволен од подготовките во Загреб и прикажаното на контролните мечеви. „Ракометарите одлично се ангажираа деновиве. Во текот на сите натпревари покажавме задоволителен интензитет. Задоволен сум, иако ни недостасуваше реализација. Очекувам во наредните 10-15 дена да играме во подобра форма. Тоа е очекувано, со оглед на големата пауза. Исто така ни фалат неколку играчи, кои беа дел од репрезентацијата. Верувам дека за првиот дуел во пролетната полусезона во СЕХА лигата ќе бидеме комплетни. Се надевам дека ќе започнеме успешно. Добро се презентиравме на овие натпревари против силни противници. Одличен потег беше да се дојде тука во Хрватска. Им дадовме шанса на ракометарите кои играа помалку и тие добро се претставија. Посебно, сакам да го потенцирам настапот на Кукуловски. Покажа дека е голем потенцијал и Еурофарм Пелистер заврши голема работа што го доведе во клубот. Очекувам во текот на сезоната да го развие својот потенцијал и еден ден да дојде во македонската репрезентација“, потенцираше тренерот на битолчани.

По исклучително лошиот настап на Светското првенство во Египет, сениорската ракометна репрезентација на Македонија се враќа дома со освоено 23. место.
Лошиот настап на Мундијалот влијаеше на промена на селекторот, па Данило Брестовац од денеска повеќе не е предводник на А селекцијата.
„Ракометната Федерација на Македонија би сакала да ја извести јавноста дека македонската куќа на ракометот и г. Данило Брестовац, на 26 јануари 2021 г., взаемно се спогодија да ја прекинат соработката околу ангажманот на машките ракометни сениори.“ – соопштија од РФМ.
Брестовац беше назначен за селектор на Македонија во јуни 2019. година.

Македонската ракометна федерација веќе го закажа организирањето на Изборното Собрание за избор на претседател на РФМ. Актуелниот прв човек на РФМ, Живко Мукаетов повторно се кандидира за позицијата претседател, а сите клубови од Македонија му изразија поддршка. Со официјален документ, на кој се потпишаа и ставија клупски печати, сите македонски екипи застанаа зад сегашниот претседател, што е доказ дека Мукаетов одлично ја вршел својата работа досега. Со овој допис во кој клубовите ја изразуваат поддршката за Мукаетов станува јасно дека на 31 јануари нема да има многу дилеми кој ќе продолжи да ја води федерацијата. Бидејќи еден клуб не може да даде поддршка на двајца претседателски кандидати, тоа значи дека Живко Мукаетов ќе биде претседател најмалку до 2025 година. Изборното Собрание на РФМ е закажано за 31 јануари во хотелот Александар Палас со почеток во 12:00 часот. Сите делегати од машките и женските клубови застанаа зад Мукаетов, па тоа значи дека ќе бидеме сведоци на реизбор на Муакетов за прв човек на федерацијата за уште еден мандат.

Селекторот на хрватскиот национален тим, Лино Червар ја изненади јавноста и по натпреварот кој го загуби Хрватска од Аргентина со 23- 19 и најави оставка по завршувањето шампионатот. „Ја превземам одговорноста, разочаран сум и многу изненаден. Изненаден сум од начинот на кој мојата екипа го одигра решавачкиот натпревар на СП, но одговорен сум јас како селектор. Разочаран сум од пристапот кон играта во најважниот натпревар. Јас не можам да продолжам вака, се гордеам со се она што досега направив, но време е некој друг да ја превземе работата. Не сум навикнат да губам вакви натпревари. Сепак на Хрватскиот ракометен сојуз е да пронајде мој наследник, апелирамда бидат внимателни при зиборот затоа што следуваат квалификациите за Олимписките игри“ изјави Лино Червар веднаш по натпреварот со Аргентина.

РК Металург спогодбено ја прекина соработката со црногорскиот интернационалец, Бранко Канкараш кој во изминатато лето беше ангажиран како големо засилување за тимот од „Автокоманда“.
„Донесовме заедничка одлука со Канкараш дека е најдобро сезоната да ја доигра во клуб од кој добивме одлична понуда. Лимитираноста во бројот на странци кои можат да настапуваат во домашно првенство беше причината Бранко да ги проследи натпреварите од трибини, што за играч од негов ранг е неприфатливо“, стои во соопштението на Металург.

Хрватскиот репрезентативец кој го одбележа ракометот во последната деценија, Иван Чупиќ се враќа во домашниот ракомет по цели 14 години.
Според пишувањата на Хендбол Планет, 34-годишното крило на Вардар ќе го напушти Скопје ова лето по пет сезони поминати во црвено-црниот дрес.
Освојувачот на три титули во Лигата на шампионите со Виве Киелце и Вардар, потпиша тригодишен договор со хрватскиот шампион, ППД Загреб.
Чупиќ врвот во својата кариера го доживеа во Македонија, кога со Вардар освои две шампионски титули во ЕХФ Лигата на шампионите на завршницата во Келн во 2017. и 2019. година.
РК Загреб претходно го објави и доаѓањето на уште еден искусен хрватски репрезентативец, Жељко Муса, кој се враќа од германски Магдебург.