Од страна на РК Голден Арт КЛ7 синоќа излегоа со информација во кој официјално го објавија завршувањето на соработката со досегашниот тренер Андон Бошковски.
„Ракометниот клуб Голден Арт КЛ7 ја информира македонската спортска јавност дека заклучно со 15 јануари престануваат сите обврски за ангажман како главен тренер во клубот на досегашниот прв тренер Андон Бошковски. На Бошковски му благодариме на досегашната соработка и за придонесот во развој на нашиот проект и му посакуваме многу успех во следните ангажмани. Клубот во текот на следните неколку дена ќе информира за новото решение за прв тренер на клубот“ се вели во соопштението на клубот објавено на официјалната веб страница.

Готје Мвумби Тиери, масивниот пивот на Конго, стана ѕвезда на денот на ракометното Светско првенство, а сцените како тој се пробива низ противничката одбрана станаа вирални на социјалните мрежи.
Тиери успеа да го претвори неинтересниот натпревар помеѓу Конго и Аргентина во сензационален со самата своја појава. Одигра одличен натпревар, за 11 минути во игра од четири удари кон голот постигна четири гола за дебитантот на СП, но љубителите на спортот посветија внимание на неговата килажа.
Така, дојдоа до страницата на францускиот четвртолигаш Друкс, за кој Тиери настапува од минатото лето. Таму пишува дека има 26 години, висок е 192 сантиметри и она што на сите им е најинтересно, тежок е 110 килограми.
Меѓутоа, изненадувањето дојде на службениот сајт на СП. Таму пишува дека конгоанскиот горостас е висок 176 сантиметри и има 89 килограми!
Организацијата на СП во Египет уште пред почетокот на првенството беше прогласена за катастрофална од многумина, а овој гаф со пропорциите на Тиери е само еден од доказите за споменатото.

Светската ракометна федерација објави дека репрезентативецот на Данска, Емил Јакобсен, е позитивен на ковид-19.
Тој заедно со неговиот цимер во хотелската соба ќе бидат ставени во изолација и нема да играат на денешниот меч со Бахреин. Воедно ИХФ најави дека од утре ќе стартува секојдневното тестирање на сите учесници на СП.
-ИХФ активно ја следи состојбата во врска со ковид-19 и континуирано ги подобрува условите. Затоа е одлучено да се примени нов ритам со PCR тестовите. Сите членови на делегациите како и сите судиите, службените лица и делегатите кои учествуваат на Светскиот шампионат ќе се тестираат за ковид-19 секој ден од 16 јануари“, стои во соопштението.

Македонија на стартот на Светското ракометно првенство беше поразена од Шведска со 32:20, а на тој натпревар Кире Лазаров го запиша своето име во историјата.
Легендарниот ракометар стана првиот играч кој постигнал погодок на светско првенство во четири различни децении. Интересно, првиот погодок на светско првенство го постигна во Каиро, исто како и синоќа. Тој против Шведса постигна пет погодоци од десет упатени удари кон голот.
Првиот погодок во својата кариера, Лазаров го постигна на СП 1999. година како 19-годишен во победата против Саудиска Арабија. На наредните четири светски првенства нашата репрезентација не настапуваше, па се врати во Хрватска во 2009. година. Тогаш, Лазаров го сруши рекордот на светските собири со 92 погодоци.
По тоа првенство, Македонија настапи на четири од петте светски првенства, а Лазаров и во 2017. година беше најдобар стрелец со 50 погодоци.

Селекторот на македонската ракометна репрезентација, Данило Брестовац ги одбра ракометарите кои ќе патуваат во Египет на настап на Светското првенство. Брестовац ќе поведе 20 ракометари за настап на Мундијалот, ќе бидеме без Дејан Манасков, Борко Ристовски и Гоце Георгиевски, но со Кире Лазаров и Стојанче Стоилов од искусните.

Голмани:
Никола Митревски (Порто)
Мартин Томовски (Лудвигсхафен)
Никола Даниловски (Охрид)

Леви крила:
Димитар Димитриоски (Вардар)
Цветан Кузманоски (Еурофарм Пелистер 2)

Леви бекови:
Филип Талески (Вардар)
Дарко Георгиевски (Анжер)
Горан Крстевски (Фочани)
Михајло Младеновиќ (Металург)

Централни бекови:
Филип Кузмановски (Хановер)
Марио Танкоски (Еурофарм Пелистер)
Марко Мишевски (Вардар)

Десни бекови:
Кирил Лазаров (Нант) – капитен
Мартин Велкоски (Еурофарм Пелистер)
Мартин Серафимов (Металург)

Десни крила:
Мартин Поповски (Амичитија Цирих)
Ненад Костески (Еурофарм Пелистер 2)

Кружни напаѓачи:
Стојанче Стоилов (Вардар)
Жарко Пешевски (Штутгарт)
Никола Марковски (Еурофарм Пелистер)

Македонија ќе биде во групата Г заедно со Шведска, Египет и Чиле. Најдобрите три селекции во секоја група одат во наредната фаза.

Репрезентативецот на Хрватска, Стипе Мандалиниќ, официјално ја продолжи соработка со нашиот ракометен состав Еурофарм Пелистер. Левиот бек кој одработи шест месеци во Битола, вели дека е задоволен од постигнатото.
„Мојот впечаток е многу позитивен. Градот е мал, но, има душа и живее за спортот, посебно за ракометот. Среќен сум во Битола, затоа ја договоривме соработката за наредната сезона. Клубот се стреми за големи цели почнувајќи од тренерот и стручниот штаб. Ќе има многу натпревари, но не ме плаши збиениот календар бидејќи играв во Бундеслигата каде што се играат три натпревари неделно. За навивачите на Пелистер сум слушал претходно, гледав и неколку натпревари на Интернет, минатата сезона против Веспрем и Мешков Брест и тоа е навистина атмосфера која ти дава „ветер во грб“. Таква публика со таков ентузијазам посебно ќе ни недостига на големите натпревари“, вели ракометарот на Еурофарм Пелистер.

Унијата на европските ракометари преку писмото испратено до претседателот на Светската ракометна федерација, Хасан Мустафа, изрази загриженост што ќе има публика на натпреварите на Мундијалот во Египет. Како што објави „ТВ2“ од Норвешка, играчите побарале натпреварите да се играат пред празни трибини и воедно да бидат запознаени со протоколот кој ќе им гарантира безбедност доколку ИХФ остане на идејата да има навивачи. Светското ракометно првенство во Египет ќе се одржи од 13 до 31 јануари под посебни мерки за заштита од ковид-19.

Селекторот на нашите најдобри ракометари, Данило Брестовац, ги повика Стојанче Стоилов, Дејан Манасков и Никола Маркоски да се вклучат во подготовките откако ќе го поминат задолжителното тестирање за ковид-19.
Крилото, Гоце Георгиевски, кој го прележа вирусот, нема да се врати во селекцијата бидејќи е надвор од посакуваниот ритам. Избраниците на Брестовац на 10 јануари ќе го одиграат и вториот контролен меч со Чиле во Скопје.
Ние се надеваме дека некоја селекција пред се Чешка која има проблеми со заразени ракометари ќе се откаже и дека ќе и го отвори патот на Македонија да замине на Мундијалот во Египет.