Адријан Сутил е уапсен и моментално е во притвор по меѓународна полициска операција. Германецот е уапсен под сомнение за измама и проневера, објави германскиот „Билд“.

Поранешниот возач на Формула 1 е приведен од германската полиција, а Обвинителството во Штутгарт достави потврда дека се претресени неколку објекти во соработка со Државната криминална полиција на Баден-Виртемберг.

Возачот наводно не сакал јавно да коментира за обвинувањата.
Сутил возеше во Формула 1 од 2007 до 2011 година, а потоа од 2013 до 2014 година. Во текот на својата кариера беше возач за тимовите Спајкер, Форс Индија и Заубер.

Пред и по Формула 1, тој бил активен и во авто-мото спортовите. Откако завршил со автомобили, меѓу другото, се натпреварувал во „Ферари Челинџ“.

Оскар Пјастри се избори за пол позицијата за последната спринт трка за сезонава во формула 1. Тој успеа да биде најдобар во квалификациите, а пред сè подобар од неговите конкуренти за титулата светски првак Ландо Норис и Макс Верстапен.

Пјастри до првото место стигна со време 1:20.055 минута. Второто место му припадна на Џорџ Расел. Поради грешката во последниот круг Ландо Норис заврши како трет.

Верстапен е најголем губитник на квалификациите и по грешката квалификациите ги заврши на шестото место и со тоа ги намали шансите за висок пласман и за освојување на титулата.

Добар пласман постигна Фернандо Алонсо, кој успеа да се пласира на четвртото место.

Стартот на трката е утре (сабота) во 15 часот.

Одбојкарската федерација на Македонија и селекторот на женскиот А национален тим, Стефан Пауновиќ ја завршија соработката. Српскиот стратег во изминативе четири години успешно ја извршуваше оваа функција, која финишираше со квалификацискиот циклус за ЕвроВолеј 2026.

Одбојкарската федерација на Македонија му се заблагодарува на Пауновиќ за професионалниот однос, разбирањето, убавата енергија во работата и успесите кои женската репрезентација на Македонија ги направи со него како селектор.

Двете страни се насочуваат кон новите предизвици. Стефан Пауновиќ продолжува со работа со неговиот клуб Ново Место од Словачка, за кој настапува и македонската репрезентативка Ерјона Јонузи.

ОФМ до крајот на 2025 година ќе го именува новиот селектор на женскиот национален тим.

Тимот на Астон Мартин следната сезона ќе има нов шеф, тоа ќе биде Адриан Њуи, додека досегашниот шеф, Енди Кауел, ќе ја преземе улогата на прв човек задолжен за стратегија.

Во последните недели имаше многу шпекулации дека Кристијан Хорнер би можел да се врати во Формула 1 како шеф на Астон Мартин. Се покажа дека шпекулациите не се точни, Астон Мартин ќе има нов шеф, а тоа ќе биде неговиот поранешен близок соработник заработи унапредување.

Њуи се приклучи на тимот со седиште во Силверстоун на 1 март оваа година, кога ја презеде улогата на извршен технички партнер, чија главна задача беше да го подготви Астон Мартин за новата ера на Формула 1 што започнува следната година.

Сепак, девет месеци подоцна, Астон Мартин објави дека Њуи и Кауел се согласиле да ги поделат своите должности со цел да се фокусираат на своите силни страни и со тоа да му обезбедат на тимот поголема ефикасност. Според овој договор, Њуи ќе го води техничкиот тим, како и досега, но тој ќе се занимава и со водење на тимот на самата патека.

„Во последните девет месеци видов одлични индивидуални таленти во нашиот тим. Со нетрпение очекувам да ја преземам оваа дополнителна улога за да се поставиме во најдобра можна позиција за натпреварувањето во 2026 година, кога ќе се најдеме во сосема нова позиција, кога Астон Мартин ќе стане фабрички тим, а покрај тоа ќе се соочиме со големиот предизвик на новата регулатива. Новата улога на Енди, а со тоа и фокусот на интеграцијата на новата погонска единица со нашите три главни партнери, ќе биде клучен во ова патување пред нас“, истакна Њуи.

Астон Мартин ќе користи мотори на Хонда од следната сезона, а неговите бои ќе продолжат да ги бранат Фернандо Алонсо и Ленс Строл.

За Њуи, улогата што ќе ја преземе ќе биде најголемата во неговата кариера, со оглед на тоа што досега беше единствено задолжен за дизајнирање на автомобилот.

Вистинската легенда на Формула 1 работеше за Вилијамс, Мекларен и Ред Бул пред Астон Мартин. За време на неговата богата кариера, автомобилите што ги дизајнираше освоија вкупно 13 титули во конкуренцијата на возачи и исто толку меѓу конструкторите.

Следната трка во Формула 1 се вози, в недела во Катар, на патеката Лусаил.

Една од најдобрите светски скијачки Лара Гут Бехрами од Швајцарија ја заврши сезонава откако доживеа тешка повреда. Таа на тренинг трка во супервелеслалом во Купер Маунтајн во Колорадо.

Таа најави дека ова ќе и биде последна сезона во кариерата, а првиот настап сезонава требаше да го има на 29.ноември (сабота).

Гут Бехрами заработи оштетување на менискусот и кинење на лигаментите на коленото.

Се вбројува во најдобрите во женското скијање со 48 победи во Светскиот куп во три дисциплини (супервелеслалом, спуст и велеслалом). Во два наврати беше победничка на Светскиот куп (2016 и 2024 година), а има и седум мали кристални глобуси.

Македонија годинава доби нов европски шампион во мотоциклизам – Петар Мијалков, човек кој со огромна посветеност, храброст и дисциплина успеа да се искачи на самиот врв на БМУ Европскиот шампионат.

Со моќни настапи, стабилни резултати и карактер што не отстапува пред предизвиците, Петар ја испиша една од најубавите страници во историјата на нашиот мото спорт.

Во негова чест, во Штип беше организиран свечен шампионски круг, каде што љубителите на мотоциклизмот го поздравија и му оддадоа признание за европскиот успех. Минатиот месец, по повод 8 Ноември – Денот на ослободувањето на Штип, Петар Мијалков доби и специјална награда и признание од градоначалникот Иван Јорданов и од Градот Штип, како благодарност за огромниот придонес и промоција на градот на меѓународната спортска сцена.

Кој е Петар Мијалков?

Петар ја носи љубовта кон мотоциклизмот од најрана возраст. Иако желбата отсекогаш постоела, недостигот на финансии и услови го одложиле неговиот почеток. Во 2017 година го купува својот прв мотор и започнува да вози по улични патеки, но сонот за вистинска тркачка стаза секогаш стоел како недостижна цел. Кога конечно ги обезбедува потребните средства, започнува да тренира на стаза – и во 2023 година официјално влегува во светот на трките.

Активно се натпреварува само три години, но резултатите зборуваат сами за себе. Во втората натпреварувачка година (2024) ја освојува својата прва голема титула – БМУ Европски вицешампион и Државен шампион на Македонија. Веќе следната година, неговиот талент и труд кулминираат: Петар е на самиот врв и на БМУ Европскиот шампионат и на Државниот шампионат за 2025 година.

Надвор од патеката, Петар е смирен, вреден и семеен човек. Во брак е три години со сопругата Стефанија. Татко е на синот Драган, а семејството наскоро ќе се зголеми – тие ја очекуваат својата принцеза. Токму семејната поддршка, како што вели самиот Петар, му дава сила да продолжи, да се усовршува и да чекори кон уште поголеми цели.

Репрезентативниот среден блокер Филип Маџунков по една сезона мината во редовите на матичниот клуб, Струмица 47&72 повторно се враќа на интернационалната сцена и тоа во позната средина, во тимот на белгиски Лувен. Нашиот одбојкар и клубот се обврзаа на соработка до крајот на сезоната.

Маџунков ќе биде значајно засилување за Лувен како во белгиското првенство, каде што екипата во моментов е на втората позиција, така и во ЦЕВ Лигата на шампионите, каде тимот во групната фаза ќе се соочи со италијански Лубе Цивитанова, Монпеље од Франција и полска ПГЕ Варшава.

Средниот блокер денеска ќе и се приклучи на екипата и ќе стартува со тренажен процес, додека дебито за ново-стариот клуб треба да го има престојниот викенд.

Маџунков покрај дресот на Струмица на домашна сцена бил играч и на Вардар, додека интернационалната кариера ја гради со настапи во националните првенства на Црна Гора, Италија, Германија, Хрватска, Полска и сега повторно Белгија.

Одбојкарките на Јанта Волеј Кисела Вода претрпеа убедлив пораз со 3-0 во сетови вечерва во првиот натпревар од 1/16 финалето од ЦЕВ купот од Младост Загреб. Резултат по сетови: 6-25; 12-25 и 19-25.

Гостинската екипа од Хрватска фаворитската улога ја потврди веќе во првиот сет, кој го доби на убедлив начин со само шест загубени поени, а во вториот сет Јанта Волеј КВ го зголеми бројот на освоени поени, но и тој сет заврши со убедлива разлика. Одбојкарките на македонскиот претставник најголем отпор „пружија“ во третиот сет кога освоија 19 поени.

Реванш дуелот се игра на 2 декември во Загреб.

Возачите на Мекларен, Ландо Норис и Оскар Пјастри, се дисквалификувани од Големата награда на Лас Вегас.

Шокантна вест е што значително ќе ја искомплицира борбата за титулата пред последните две трки од сезоната во Формула 1.

Ландо Норис изгледаше дека е на дофат на шампионатот кога денес ја помина целта на второто место на Големата награда на Лас Вегас, но неговите бодови сега ќе бидат избришани, што значи дека победникот од Лас Вегас, Макс Верстапен, сега му се приближи, само 24 бода зад него.

Зошто Мекларен беа дисквалификувани?

Мекларен беше повикан пред судиите по трката бидејќи двата негови болида наводно ги прекршиле техничките прописи. По истрагата, се покажа дека ниту Норис ниту болидот на Пјастри не ги исполнуваат барањата за дебелината на задниот лизгачки блок, поради што беа дисквалификувани. Бодовите освоени од Норис и Пјастри за второто и четвртото место, соодветно, затоа се избришани.

Норис останува на врвот со 390 бодови, но Верстапен сега е израмнет со Пјастри на второто место. Британецот има 24 бода предност пред нив, а во последните две трки од сезоната, вклучувајќи ја и трката со спринт следниот викенд, можат да се освојат максимум 58 бода, па затоа е јасно дека сè е сè уште отворено.

Возачот на Мекларен, Ландо Норис, победи во квалификациите за Големата награда на Лас Вегас возени утрово.

Во одлучувачкиот сегмент, најдобриот круг на Британецот беше 1 минута 47,934 секунди. Возачот на Ред Бул, Макс Верстапен, заврши втор (+0,323 секунди), а возачот на Вилијамс, Карлос Сајнц, трет (+0,362).

Тимскиот колега на Норис, Оскар Пјастри, заврши петти (+1,027). Седумкратниот светски шампион Луис Хамилтон од Ферари заврши на 20-то место, последното место во квалификациите.

Главната трка во Лас Вегас ќе се вози утре (23 ноември) со почеток во 5 часот по македонско време.