Една од најдобрите пливачки на денешницата, Австралијката Аријарне Титмус, изненадувачки објави дека ја завршува кариерата.

25-годишната Титмус освои осум олимписки медали, од кои четири златни, три сребрени и еден бронзен. Исто така таа е четирикратна светска шампионка. Најголемиот успех го постигна во дисциплината 400 метри слободен стил, дисциплина во која е двократна олимписка и светска шампионка, а освои и медали на 200 и 800 метри слободен стил и во штафетните трки 4 x 200 слободен стил.

По Олимписките игри во Париз минатата година, Титмус изјави дека ќе земе една година пауза од натпреварите за да ги „наполни батериите“, па работеше како телевизиски коментатор за време на Светското првенство во Сингапур оваа година.

Сепак, само неколку месеци подоцна, Титмус одлучи да се пензионира.

„Ова е тешка одлука, но сум задоволна. Го сакам пливањето, тоа ми е страст уште од детството, но откако неодамна направив пауза од тренинзите, сфатив дека некои други работи во мојот живот станаа многу важни“, рече Титмус.

Титмус го имаше своето меѓународно деби на Светското првенство во 2019 година во Гвангжу кога ја освои титулата на 400 метри слободно со победа против најтрофејната пливачка на сите времиња, Американката Кејти Ледеки.

Нивното соперништво траеше до Игрите во Париз, каде што Титмус ја одбрани титулата олимписки победник во истата дисциплина во финалето, кое беше наречено „трка на векот“ бидејќи нејзини сопернички беа канадската сензација Самер Мекинтош, која освои сребро, и Ледеки, која мораше да се задоволи со бронза.

Покрај бројните освоени медали, Титмус е и актуелна светски рекордерка на 200 метри слободно со време од 1:52,23.

По речиси две недели оо контроверзниот инцидент на Големата награда на Индонезија, судиите на Мото ГП ја донесоа конечната одлука да го казнат возачот на Априлија, Марко Бецеки.

Марко Бечеки е казнет со двоен долг круг, кој ќе мора да го одработи на неделната трка на Големата награда на Австралија.

Станува збор за судирот што се случи во седмата кривина, во првиот круг од трката на патеката „Мандалика“, кога Бецеки го собори Марк Маркез. Иако судиите веднаш започнаа истрага, тие не можеа да ја слушнат верзијата на Бецеки за несреќата бидејќи Италијанецот заврши во медицинскиот центар на самата патека.

Затоа, беше одлучено дека одлуката ќе биде донесена по неговото сослушување во Австралија, каде што Бецеки денес ја даде својата изјава.

Судиите се повикаа на членот од правилата, кој се однесува на „дејствија што создаваат опасни ситуации и доведуваат до несреќа“, и истакнаа дека Бецеки е во центарот на вниманието по втор пат оваа сезона поради инцидент.

Тој беше казнет за прв пат во Аргентина поради контакт со Фабио Квартараро.

Веднаш по инцидентот, возачот од Римини ја призна својата грешка и му се извини на Маркез, а потоа двајцата се сретнаа во медицинскиот центар. Маркез подоцна се огласи на социјалните мрежи за да ги повика фановите да не го обвинуваат Италијанецот, велејќи дека ваквите ситуации се дел од спортот.

Еден од најмладите возачи на МК Ендуро Тим Водно од Скопје, Михаил Стојковски (14 години) е освојувач на шампионската титула во еден од најпрестижните мото шампионати ,,Алпе Адриа Мотокрос шампионат,,

По три извозени трки (БиХ, Хрватска и Србија),во конкуренција од 21 возач во класата MX85 Михаил Стојковски успеа да освои највеќе поени и со тоа да ја обезбеди титулата шампион за 2025 година во класата MX85 што е огромен успех за нашата земја и клубот за кој настапува МК Ендуро Тим Водно Скопје.

Михаил веќе шест години е активен мотокрос возач. Минатата 2024 година е државен шампион во класата MX85 ,а оваа година со освојувањето на Алпе Адриа шампионската титула може да се издвои како единствен возач од нашата земја кој ја има освоено оваа титула.

Еден од најважните шаховски настани во текот на годината е Европскиот клупски куп, турнир кој традиционално се одржува кон крајот на сезоната, но кој претставува епицентар на шаховските збиднувања поради интересот кој го побудува и квалитетот што го нуди. Популарно наречен шаховска верзија на Лигата на шампионите, ЕКК секоја година го собира кремот, но не само од Европа.

Шаховскиот клуб Алкалоид неколку децении го гради својот имиџ доминирајќи на домашно тло, а веќе има и повеќедецениска традиција на учество на ЕКК, при што во три наврати беше освојувач на медали: во 2016 година беше шампион на Европа, а во 2017 и во 2024 година вицешампион. Евидентно и јасно видливо е управувањето и водењето на клубот од најдобрата македонска компанија „Алкалоид“ АД со пресликување на корпоративните искуства и знаења во клубот.

Оваа година на грчкиот остров Родос ќе се игра јубилејното 40-то издание на главниот/отворен ЕКК (може да учествуваат машки, мешани и женски тимови), на кое е пријавен и Алкалоид, а паралелно ќе се игра и 29-тото издание на женскиот ЕКК (учествуваат само женски тимови). Според објавените состави, оваа година конкуренцијата за највисок пласман на ЕКК е најсилна во последните 10-ина години. Пет тимови се издвојуваат според просечниот рејтинг на играчите од својот тим, притоа со повеќе од 2700 се BayeganPendik (Турција) и Алкалоид, а веднаш до нив со просечен рејтинг над 2600 се SuperChess (Романија), Novy Bor (Чешка) и Tuxera (Унгарија). Фактор повеќе е што оваа година има рекорден број на учесници од 101 тим (односно од 20 тимови кај дамите).

Во тимот на ШК Алкалоид има само две измени, односно:

– во составот ќе настапат индиските велемајстори Arjun Erigaisi (2797), Chithambaram Aravindh (2711) и Abhimanyu Puranik (2615); кинеските велемајстори Yi Wei (2754) и Yangyi Yu (2720); српските велемајстори Aleksandar Inđić (2618) и Velimir Ivić (2628), како и македонскиот интернационален мајстор Тони Лазов (2382);
– Erigaisi i Wei се во топ 10 од светската елита, Yu и Aravindh во топ 30, додека, пак, Inđić, Ivić и Puranik во септември беа во топ 100;
– Yu има фантастичен настап за Алкалоид на ЕКК со освоени пет медали (три злата и две бронзи) за резултатот на својата табла, додека, пак, на своите први настапи минатата година за Алкалоид Erigaisi на првата табла освои злато, а, пак, Aravindh на четвртата табла бронза;
– српските велемајстори како репрезентативци на Србија ја освоија европската шампионска титула во 2023 г., а Inđić следната година стана европски шампион во поединечна конкуренција. За Алкалоид настапуваа и на екипните државни првенства во 2021 (Inđić), односно во 2023 (Ivić) година. Првпат за алкалоидовата екипа на ова најсилно европско клупско натпреварување ќе настапат Puranik и Лазов, објаснува капитенот на тимот, велемајсторот Влатко Богдановски.

Еден од најголемите ММА борци на сите времиња, 39-годишниот Бразилец Хозе Алдо, го потврди своето пензионирање од спортот вторпат, и тоа го направи во исклучително емотивен момент пред својата домашна публика.

„Кралот на Рио“, како што беше официјално наречен, не можеше да избере подобро место за да се збогува со својата неверојатна кариера, и тоа го направи на настан на UFC во Рио де Жанеиро.

Во преполната Фармаси арена, поранешниот шампион доби шанса да се збогува на вистински начин, откако неговото последно враќање во кафезот не ги донесе посакуваните резултати.

Минатата година беше поразен од Марио Баутиста на УФЦ 307, а во мај оваа година, по проблемите со намалувањето на тежината за бантам категоријата, загуби од Ајеман Захаби на УФЦ 315.

Поранешниот шампион во мешани боречки вештини на УФЦ, Конор Мекгрегор, беше суспендиран на 18 месеци поради кршење на антидопинг правилата. Ирецот пропуштил три допинг тестови.

Телото за антидопинг на боречките спортови соопшти дека иако Мекгрегор не бил достапен, тој се опоравувал од повреда и не се подготвувал за претстојната борба.

„Мекгрегор целосно соработуваше со истрагата, ја прифати одговорноста и обезбеди детални информации за кои утврдивме дека придонеле за пропуштените тестови.

Како резултат на тоа, стандардната казна од 24 месеци беше намалена за шест месеци“, се вели во соопштението.

По трката во Сингапур, возачот на Ферари Луис Хамилтон успеа да собори рекорд на Михаел Шумахер.

Седумкратниот светски шампион не мина најдобро на трката за Големата награда на Сингапур, но успеа да го собори рекордот на Михаел Шумахер.

Тој успеа да има најбрз круг на трката и така на 16 години во низа успева барем на една трка годишно да има најбрз круг. Досега рекордот беше за Шумахер, кој исто така го постави како возач на Ферари, на почетокот на овој век кога доминираше во формула 1.

Хамилтон на трката во Сингапур беше рангиран на крајот на осмото место.

Марк Маркез, човекот кој оваа сезона повторно го разбуди својот препознатлив борбен дух, ќе мора привремено да ги остави трките на страна.

По падот во Индонезија, осумкратниот светски шампион заработи фрактура на основата на коракоидниот израсток и повреда на лигаментите на десното рамо, што ќе го држи надвор од акција најмалку две трки.

По пристигнувањето во Мадрид, Маркез веднаш бил подложен на детални медицински прегледи во болницата “Рубер Интернационал”, кадешто докторите исклучиле сериозни компликации или повторна повреда на старите проблеми со рамото.

Добрата вест е дека нема дислокација, но лошата е дека закрепнувањето ќе бара време и целосен одмор.

Медицинскиот тим, предводен од д-р Самуел Антуња и д-р Игнасио Роџер де Оња, одлучи за конзервативен третман без операција, што подразбира имобилизација и контроли на неделна база.

Капитенот на машкиот национален тим, Никола Ѓоргиев од Букурешт внимателно ја следеше ждрепката за ЕвроВолеј 2026 која синоќа се одржа во Бари. Заклучокот е: тешка ждрепка.

Најдобриот македонски одбојкар, сепак, останува оптимистички расположен и продолжува да верува во екипата која ја предводи.

Македонија за ЕвроВолеј 2026 е дел од групата Б во Варна, каде покрај домаќинот и актуелен светски вице-првак Бугарија, ќе се соочи и со Полска, Украина, Португалија и Израел.

„Македонија на ова Европско првенство влегува без еуфорија и големи очекувања како што беше во 2023 кога бевме организатори, но имавме среќа и во ждрепката, и во групата имавме две репрезентации кои беа со послаб ранкинг од нас. На ова ЕП Македонија влегува како најслабо рангирана селекција и верувам дека сите противници во групата на нас гледаат како на тотален аутсајдер. Добивме тешка група со два изразени фаворита – Бугарија и Полска. Украина, особено Португалија, која играше во осминафиналето на СП и ја елиминираше Куба и Израел се противници со кои ќе водиме голема битка и никој не може да ни забрани да сонуваме за осминафинале. Само да сме живи, здрави и спротени.

На ЕвроВолеј 2026 ќе влеземе со една поинаква ‘математика’ – да си ја играме нашата игра и да си ја гледаме нашата работа и да сонуваме. Искусни сме, веќе имаме три ЕП зад нас и знаеме како е и да се победува и да се губи. На претходното ЕП игравме и осминафинале и од тоа имаме искуство. Напоменав дека групата е тешка, но имаме шанси за нешто историско. Без еуфорија, со многу работа и посветеност и да бидеме најдобри кога ќе биде најпотребно. Потешко можеше, а можеше да биде и полесно, но самото тоа што сме на уште едно ЕП носи големо задоволство“, заклучува Ѓоргиев.

Шпанецот Фермин Алдегер (Дукати-Гресини) ја забележа својата дебитантска победа во кариерата во кралската класа во МотоГП, откако денеска триумфираше на трката за Големата награда на Индонезија.

Неговиот сонародник Марк Маркез (Дукати), кој минатата недела во Јапонија и теоретски ја обезбеди седмата шампионска титула во кариерата, предвреме ја напушти трката со повреда на клучната коска на десното рамо, откако се судри со победникот во саботниот спринт, Италијанецот Марко Безеки.

Останатите две места на подиумот, исто така, ги зазедоа шпански возачи, Педро Акоста (КТМ) заврши втор, а Алекс Маркез (Дукати-Гресини) беше трет на патеката Мандалика.

„Не можам да верувам, толку сум среќен. Голема благодарност до сите луѓе во тимот на Дукати Гресини. Ова е голема работа за мене, бидејќи сум почетник во најсилната класа. Но, нема време за опуштање, морам да продолжам вака“, рече Алдегер

За Алдегер ова е трет подиум оваа сезона, откако заврши трет на ГН на Франција и втор на австриското Гран При.