Германецот Александар Зверев беше убедливо поразен од Карлос Алкараз во финалето на Мастерсот во Мадрид (6-3, 6-1), а за лошото издание ги обвини АТП и распоредот на натпреварите.

Зверев, да потсетиме, во неделата околу 1 часот по полноќ го заврши полуфиналниот дуел со Стефанос Циципас, а ноќта претходно, до по полноќ, траеше дуелот со Феликс Оже-Алијасим.

„Морам да кажам дека работата на АТП оваа недела беше апсолутен срам. Пред два дена си легнав во 4:00, 4:30 наутро. Вчера си легнав во 5 часот наутро“, беше лут Зверев на прес-конференцијата.

И покрај се, Германецот признава дека можеби и во идеални услови нема да го победи 19-годишниот Шпанец, но верува дека би обезбедил подобро издание.

Се анализира дали Борис Бекер може да биде депортиран, потврди Министерството за внатрешни работи на Велика Британија, пишува Гардијан.

Минатата недела, поранешната тениска ѕвезда беше осуден ана две години и шест месеци затвор за криење имот вреден милиони фунти, откако банкротираше во јуни 2017 година. Бекер, осуден според Законот за несолвентност, ќе отслужи, како што пишува овој весник, половина од целосната затворска казна.

Портпаролот на тамошното МВР рече дека, иако не коментира поединечни случаи, „секој странски државјанин кој е осуден за кривично дело и е осуден на казна затвор се разгледува за депортација во најкраток можен рок“.

„Борба која може да чини и до 30.000 фунти, велат експертите, што значи дека Бекер можеби ќе мора лично да се застапува на суд како страна во тужбата. Доколку делото се случило по 31 декември 2020 година, Бекер е предмет на автоматска депортација бидејќи е осуден на 12 месеци или повеќе“, рече адвокатот Колин Јео.

Легендата на светскиот тенис Борис Бекер е осуден на две ипол години затворска казна, пренесува „Би-Би-Си“.

Причината поради која легендарниот германски тенисер мора да одлежи затворска казна е обидот за сокривање пари и други скапоцености во вредност од дури од два ипол милиони фунти во стечајната постапка.

Откако Германецот во 2017 година прогласи банкрот судот отвори стечајна постапка. Во текот на истрагата се докажа дека 54-годишникот задржал средства со кои можел да ги подмири долговите. Бекер намерно префрлал големи износи на други сметки во јуни 2017 година.

Роџер Федерер го потврди своето учество на тенискиот турнир во неговиот роден град Базел кој се одржува во октомври, соопштија организаторите. 

Поранешниот светски рекет број еден, кој во август ќе наполни 41 година, е надвор од тениските терени од минатиот јули, кога беше елиминиран во четвртфиналето од Вимблдон. 

Федерер имаше две операции на коленото во 2020 година и се врати минатата година, но потоа имаше уште една операција на коленото по Вимблдон што го принуди да го пропушти вториот дел од сезоната.

Младиот шпански тенисер, 18-годишниот Карлос Алкараз денеска за првпат во кариерата влезе во најдобрите десет тенисери во светот. Откако ја освои тутилата во Барселона минатата недела, тој скокна две места на АТП-листата и успеа да ги престигне Канаѓанецот Феликс Ожер-Алиасим и Британецот Камерон Нори.

Пред само една година Алкараз не беше ниту во Топ 100, но благодарение на блескавите игри и големиот напредок во сите сегменти од играта, денес е деветти тенисер во светот.

Новак Ѓоковиќ не успеа да дојде до посакуваниот триумф на турнирот во родната Србија, откако во големото финале во Белград беше поразен од Андреј Рубљов.

Светскиот рекет број еден имаше три тешки меча на патот до финалето и сите беа во три сета, па иако се чинеше дека може да примени ист рецепт откако го доби вториот сет против Русинот, сепак остана без гориво и сила во одлучувачкиот сет.

Ѓоковиќ го загуби последниот сет без да освои ниту еден гејм и убедливите 6:0 се доказ дека остана без ронка енергија на крајот од мечот, што беше повод и за подетална анализа од страна на самиот Ноле кога доби прашање од новинарите.

„Во третиот сет останав без енергија и не успеав да се погрижам за борба. Честитки до Рубљов кој веќе некое време е при врвот на светскиот тенис. Навистина сум изморен, искрено, можев да испаднам уште во првото коло. Зад мене се три тешки меча кои се надевам дека ќе ми помогнат во иднина“, изјави Ноле, кој смета дека неговиот физички пад е поврзан со некоја болест.

Одлуката на Вимблдон да им забрани учество на Русите и Белорусите го подели тенискиот свет.

АТП најпрвин излезе со соопштение во кое го осуди ваквиот потег на најпрестижниот тениски турнир во светот, а сега отиде и чекор понатаму.

Според последните информации кои ги пренесоа медиумите, но ги потврдија и некои тениски тренери, АТП и ВТА наскоро ќе имаат состанок во Мадрид, а темата ќе биде вистински преседан.

Размислуваат да одземат бодови на Вимблдон за ВТА и АТП листата. Поточно, Вимблдон би станал најдобро организирана, најбогата и најмасовна егзибиција бидејќи никој не можел да освои ниту еден бод.

Алтернативата е да се најде решение за бодови кои ќе им бидат доделени на Русите и Белорусите врз основа на некои претходни резултати.

Веројатно има уште простор за договор со Вимблдон, но славниот турнир ќе одржи прес-конференција на 26 април.

Првиот светски рекет Ига Швјонтек синоќа ја победи 12-та на ВТА ранг-листата, Ема Радукану со 2-0, по сетови 6-4, 6-4 и се пласираше во полуфиналето на турнирот во Штутгарт.   За полската тенисерка ова е 21 победа во низа. 

Таа победи на пет меча во Доха, потоа шест во Индијан Велс, шест во Мајами, два во Купот „Били Џин Кинг“ и сега два во Штутгарт. Победничката серија е најдолга за тенисерка во топ 10 најдолга од 2000 година. Швјонтек, исто така, стана првата жена што освоила 28 сета по ред по Серена Вилијамс, која го направи тоа помеѓу 

Отвореното првенство на САД во 2012 година и Австралија Опен во 2013 година. Попладнево, Швјонтек во полуфиналето на трунирот во Штутгарт ќе се соочи со Људмила Самсонова од Русија.

Ол Ингланд Клаб и Комитетот за управување на шампионатот изразија поддршка за сите засегнати во Украина за време на руската агресија врз оваа земја и затоа им забранија на руските и белоруските тенисери да настапат на Вимблдон оваа година.

Организаторите на овогодинешниот Грен слем во Лондон ги осудија наводите за „незаконски руски дејствија“ и внимателно ја разгледаа ситуацијата во контекст на обврските кон играчите, нивната заедница и пошироката јавност на Обединетото Кралство како британска спортска институција.

„Ги земавме предвид и насоките поставени од Владата во Обединетото Кралство особено во однос на спортските тела и настани. Со оглед на профилот на Шампионатот во ОК и ширум светот, наша одговорност е да ја одиграме нашата улога во широките напори на владата, индустријата, спортот и креативните институции да го ограничат глобалното влијание на Русија на најсилен можен начин. Во околностите на таква невидена неоправдана воена агресија, би било неприфатливо рускиот режим да извлече каква било корист од вмешаноста на руски или белоруски играчи на Вимблдон“, стои во соопштението.

Рафаел Надал почна денеска да тренира по пауза од еден месец поради повреда на реброто.   

„Какво возбудување е повторно да се најдеш на земјениот терен“, напиша Надал на социјалните мрежи. 

Надал поради повредата за време на мастерсот во Индијан Велс најави на 23 март дека ќе отсуствува од терените четири до шест недели. 

Шпанецот во меѓувреме го пропушти турнирот во Мајами, како и првиот годинешен Мастерс на земја во Монте Карло. Надал би можел да се врати на мастерс турнирите пред домашната публика во Мадрид, од 2 до 8 мај, и во Рим, од 9 до 15 мај, додека вториот грен – слем турнир сезонава Ролан Гарос е на програмата од 22 мај до 5 јуни.