Македонскиот тенисер Калин Ивановски се пласираше во полуфиналето на ИТФ фјучерсот во Загреб, откако денеска во четвртфиналето го победи домашниот тенисер Вито Тонејц со 2-1 во сетови (6-4, 6-7(5), 6-2).

Дуелот донесе голема борба за секој поен и одиграни вкупно 218 поени (117:101 за Ивановски) по три часа игра.

Противник на Ивановски во утрешното полуфинале ќе му биде победникот од дуелот меѓу синот на Гран Ивановишеви, Емануел Иванишевиќ и Мирза Башиќ.

Македонскиот тенисер Горазд Србљак го предаде мечот од првото коло на ИТФ фјучрсот М15 Загреб против седмиот носител Никита Маштаков од Украина. Во моментот на прекин резултатот беше 1-1 во сетови и по пет одиграни гемови 4-1 во гемови за противникот.

Србљак го доби првиот сет со 6-4 во гемови, иако противникот почна со водство од 2-0, но македонскиот тенисер направи пресврт и поведе со 4-2 и предноста ја имаше и накрајот на првиот сет. Во вториот сет под 2-1 за Србљак, Маштаков дојде до предност од 4-2 и успеа да изедначи на 1-1 во сетови. Во решавачкиот сет во четвртиот гем Маштаков направи брејк и поведе со 3-1 во гемови, а по завршувањето на следниот гем Србљак поради повреда го предаде мечот. Во моментот на прекин мечот траеше 2 часа и 45 минути.

Утре во второто коло Калин Ивановски на истиот турнир ќе игра против вториот носител Душан Обрадовиќ од Србија.

Британскиот тенисер Енди Мареј ќе добие статуа во комплексот Вимблдон.

Мареј, кој го заврши 77-годишниот пост на Британците на Вимблдон, ќе биде почестен на теренот на Ол Ингланд Клубот.

Мари го победи Новак Ѓоковиќ во финалето во 2013 година, а ја освои титулата во 2016 година со триумф над Милош Раониќ.

Тој се повлече од тенисот минатото лето, по Олимписките игри во Париз.

Деби Џиванс, директорка на Ол Ингланд Клубот, вели дека планот е статуата да биде поставена во 2027 година.

Тоа ќе биде на 150-годишнината од турнирот Вимблдон, кој се игра од 1877 година.

За потсетување бронзена статуа на Фред Пери беше поставена на Вимблдон во 1984 година, на 50-годишнината од неговата прва титула.

Норвешкиот тенисер Каспер Руд го откажа настапот на овогодинешното издание на најголемиот турнир во светот, Вимблдон, кој започнува за осум денови, поради повреда на коленото.

Руд, кој два пати играше грен слем финале на Ролан Гарос, веќе некое време се бори со повреда на коленото, која во голема мера беше причина за неговата рана елиминација во 2. коло во Париз минатиот месец.

„За жал, Каспер сè уште не е подготвен за натпревари во три освоени сетови. Затоа, неговиот следен настап ќе биде во Гштад“, објави менаџерката на Руд, Тина Фалстер.

Во својата досегашна кариера, Руд не остави длабока трага на Вимблдон и неговото најдобро достигнување на терените на Ол Ингланд Клубот е пласманот во 2 коло.

Двократната освојувачка на Вимблдон, 35-годишната чешка тенисерка Петра Квитова, објави дека ќе стави крај на кариерата по овогодинешниот Ју Ес Опен, што ќе се одржи од 24 август до 7 септември.

Квитова, која го освои Вимблдон во 2011 и 2014 година, освои 31 трофеи во кариерата.

Нејзиниот најдобар пласман во кариерата е второто место на ранг-листата на ВТА, но во моментов е рангирана на 572-то место.
Претходно оваа година, Квитова се врати на тенисот по 15-месечна пауза поради бременост и раѓањето на нејзиното дете, но таа победи само еднаш во седум настапи и реши да се посвети на своето семејство.

Шпанскиот крал Фелипе VI денес му ја додели титулата маркиз на легендарниот тенисер Рафаел Надал како признание за неговиот придонес кон нацијата поради неговите неверојатни спортски резултати.

Надал отсега ќе ја носи титулата Маркиз од Левант де Мајорка, островот каде што е роден и живее, а тоа е наследна титула.

За време на својата богата кариера, Надал освои 22 грен слем титули, од кои неверојатни 14 беа на Ролан Гарос, и без сомнение е најдобриот играч во историјата на земјена подлога.

Покрај Надал, кралот ги почести и поп-рок пејачката Луз Касал и параолимписката пливачка Тереза ​​Пералес.

„Тие се гордост на Шпанија и постојана референтна точка на вредности што треба да го инспирираат нашето општество“, објави шпанската кралска куќа.

Германската тенисерка Татјана Марија е сензационална победничка на турнирот во Квинс.

Триесет и седумгодишната Марија дојде во Лондон, односно во Квинс Клуб, со цел да се обиде преку квалификациите да избори на турнирот, а си замина со титулата.

Во квалификациите, таа ги победи Чан и Родионова, кои вкупно ѝ однесоа шест гема.

Во првото коло, ја победи Лејла Фернандез (30. на ВТА листата), во второт славеше над Каролина Мухова (14), а потоа ветеранката славеше и над Елена Рибакина (11) и Медисон Киз (8).

Во неделата, во финалето Марија ја победи Аманда Анисимова (15) со 6-3, 6-4.

Ова е четврта титула за Марија во кариерата, а на речиси 38 години, таа стана најстарата шампионка на ВТА по Серена Вилијамс во 2020 година во Окленд.

„Кралица на Квинс“, напиша Марија пред камера по триумфот, посветувајќи ја титулата на својот сопруг и децата.

Поранешниот светски рекет број еден, Шпанец Рафаел Надал би можел да стане амбасадор на „Ролан Гарос“, изјави директорката на турнирот Амели Морезмо.

„Турнирот и Рафа имаат заедничка желба да соработуваат во некоја форма. Се фокусиравме на она што се случи оваа година, со информативната кампања и оддавањето почит. Но, ќе продолжиме со нашите дискусии за историјата на турнирот, поврзана со Рафа во последните 20 години, да може да продолжи на некој начин“, изјави Морезмо за „Дејли Мејл“.

Надал се пензионираше во 2024 година на 38-годишна возраст. Тој го држи рекордот за најмногу титули – 14 на Отвореното првенство на Франција.

Вкупно Надал има освоено 22 Грен слема.

Белоруската тенисерка Арина Сабаленка се пожали на временските услови на натпреварот против Американката Коко Гоф во финалето на Отвореното првенство на Франција. Белорусинката вчера загуби во три сета – 7-6 (7-5), 2-6, 4-6.

– Силниот ветер стануваше сè посилен, а потоа стивнуваше. Беше ужасно з аигра. Таа ја удираше топката, а ветерот додаваше брзина на ударите, поради што постојано доцнев. Покрај тоа, топката многу лошо отскокнуваше на земјената подлога, па морав да се повлечам за да се справам со ваквите удари, рече Сабаленка на прес-конференцијата по мечот.

Дваесет и едногодишната Гоф стана шампионка на „Ролан Гарос“ за прв пат во кариерата. За Гоф ова е втора Грен слем титула. Првата и е од Отвореното првенство на САД во 2023 година.

Македонската тениска репрезентација поведе со 1-0 во мечот против Малта од првото коло од Дејвис купот Трета Европска група што се игра во Скопје.

Првиот поен за Македонија го донесе Берк Бугариќ, кој по 1 час и 50 минути го совлада Лиам Деликата со 2-0 во сетови (7-6 (2) и 6-2).

Бугариќ добро стартуваше во мечот и поведе со 2-0 во гемови, но потоа следуваше пад во играта и противникот направи пресврт за водство од 3-2. Во следните три гема повторно имаше брејк ба двете страни и резултатот беше 4-4 во гемови. До крајот на сетот немаше брејк и по 6-6 првиот сет се решаваше во тај брејк. Бугариќ направи серија од пет поени за водство од 5-0 и таа предност ја зачува до крајот. и гемот го доби со 7-2.

Во вториот сет Деликата поведе со 1-0, но набрзо Берк со серија од четири гема направи комплетен пресврт за водство од 4-1 и сетот го доби со 6-2 и со тоа донесе водство.

Во вториот меч за Македонија настапува Стефан Мицов, додека во игра на двојки се пријавени Берк Бугариќ и Амар Хусеиновиќ.

Поради повреда денес за Македонија нема да настапи најдобриот тенисер, Калин Ивановски.