Португалија низ иглени уши ја елиминира Хрватска и закажа соседно осминафинале со Шпанија

Репрезентацијата на Португалија обезбеди пласман во осминафиналето на Светското првенство откако во драматичен финиш ја совлада Хрватска со 2-1. Португалците со гол во 94. минута извлекоа победа, а во следната рунда ги очекува голем судир против селекцијата на Шпанија.

Ова беше дефинитивно еден од најатрактивните мечеви во досегашниот тек на шампионатот. Публиката уживаше во отворен фудбал со безброј шанси, три признати погодоци, погодени рамки од головите, но и дури четири поништени голови.

Иако Португалија имаше иницијатива и повеќе од играта во првото полувреме, ниту една од шансите не беше искористена. Хрватите беа во подредена улога во овој дел од играта, па на одмор се замина со почетните 0-0.

Вториот дел понуди вистински спектакл. Хрватска заигра далеку поангажирано и во 53. минута Перишиќ ја затресе мрежата за водство на својот тим од 1-0.

Потоа следуваше неверојатен период во кој прво на Хрватите им беше поништен гол поради офсајд, а кратко по тоа, од истата причина беше поништен и погодокот на Кристијано Роналдо на спротивната страна.

Сепак, Португалците израмнија во 68. минута. По интервенција на ВАР технологијата, беше досуден пенал, а Роналдо беше сигурен реализатор од единаесет метри за 1-1.

Возбудувањата продолжија во 81. минута кога Хрватска повторно даде гол преку Сучиќ, но судиите пак сигнализираа офсајд. Веднаш по ова, Леао ја погоди пречката за Португалија, додека Ковачиќ ја стресе стативата од португалскиот гол.

Решавачкиот удар Португалија го зададе во 94. минута. Леао одлично асистираше, а новото засилување на Милан, Рамош, со прецизен удар со глава погоди за 2-1 и голем пресврт.

Хрватска не се предаде и во последната секунда постигна гол за 2-2, но и овојпат голот беше поништен поради офсајд. Португалија патува во осминафиналето каде ќе ги одмери силите со соседниот ривал Шпанија.