Во судир на две различни тактички филозофии на стадионот Георгиос Караискакис, Баер Леверкузен направи џиновски чекор кон осминафиналето во Лигата на шампионите, славејќи со 2-0 над Олимпијакос. Натпреварот беше решен во само три минути фудбалска магија, кога чешкиот напаѓач Патрик Шик го претвори тензичниот егал во огромна предност за германскиот тим.

Атмосферата во Пиреја беше вжештена уште од првата минута, а грчкиот шампион тргна агресивно во обид да го повтори јануарскиот успех против истиот ривал. Олимпијакос наметна висок притисок, принудувајќи го Леверкузен на дефанзива во првите 25 минути. Мехди Тареми и Желсон Мартинс беа најблиску до водство, но ударот на Мартинс беше спектакуларно сопрен од Јанис Бласвих.

„Фармацевтите“, сепак, не подлегнаа на паниката. Нивната најзрела шанса во првиот дел дојде преку волејот на Ибрахим Маза, кој по интервенцијата на голманот Константинос Цолакис заврши во пречката. Најдраматичниот момент се случи непосредно пред паузата: Ајуб Ел Кааби ја затресе мрежата на гостите, но по интервенција на ВАР-собата, голот беше поништен поради минимален офсајд на Тареми, што предизвика револт кај домашната публика.

Иако домаќините влегоа во второто полувреме со обновена енергија, судбината на мечот беше запечатена по еден час игра. Во класичен контранапад, Ернест Поку „пролета“ низ средината и испрати перфектно додавање до Патрик Шик, кој со ладнокрвна завршница го отвори резултатот.

Пред Олимпијакос да се освести од шокот, „Веркслф“ удри повторно. Само 144 секунди подоцна, Алехандро Грималдо прецизно изведе корнер, наоѓајки го Шик на првата статива. Чехот со прецизен удар со глава го удвои водството и го постави конечниот резултат. Оваа победа има и историска тежина за Леверкузен, бидејќи е нивен прв триумф на гостински терен во нокаут-фазата од Лигата на шампионите.

Иако Олимпијакос беше поактивен во обидите, ефикасноста на Баер беше клучниот фактор. Статистиката за „очекувани голови“ потврди дека германскиот состав креираше далеку поквалитетни шанси. За Шик, ова е продолжување на извонредната форма со четири гола на последните шест меча во елитното натпреварување.

За тимот на Хосе Луис Мендилибар, овој пораз е горчлив по одличниот старт. Сега ги чека тешка мисија на БајАрена следната недела, каде ќе им треба чудо за да го анулираат дефицитот. Леверкузен, пак, ги избрка „Грчките демони“ и со една нога е веќе во следната рунда.

Тренерот на Севиља, Матијас Алмеида, се соочи со жестока казна од дисциплинските органи на Ла Лига и ќе мора да паузира дури седум натпревари, што претставува една од најстрогите суспензии во историјата на шпанското првенство.

Аргентинскиот стратег беше исклучен во финишот од дуелот со Гетафе кој заврши 1-1. Во 85 минута Алмеида бурно реагираше кон главниот судија Матијас Хесус, по што заработи директен црвен картон.

Според образложението, санкцијата е изречена поради неколку прекршоци од негова страна, меѓу кои недолично однесување, навреди кон судијата, упорни протести, како и шутирање на топката по спорната ситуација.

Од таборот на Севиља веднаш излегоа со официјално соопштение во кое нагласија дека целосно стојат зад својот тренер и најавија жалба на одлуката. Доколку казната остане во сила, Алмеида повторно ќе може да ја предводи екипата дури на 22 април, кога Севиља ќе се соочи со Леванте.

Бурни се реакциите во јавноста по вчераниот натпревар во Лигата на шампионите помеѓу Бенфика и Реал Мадрид, а за случајот со Винисиус сега се огласи и првиот човек на ФИФА, Џани Инфантино.

Инфантино призна дека бил шокиран, но и тажен поради тоа што се случило на натпреварот.

„Бев шокиран и тажен кога го видов инцидентот со расизам кон Винисиус. Во фудбалот апсолутно нема простор за расизам, потребно е да ги имаме сите засегнати страни за да се преземат дејствија. Во ФИФА посветени сме да обезбедиме дека фудбалерите мора да се почитуваат и акција мора да има.

Сакам да го пофалам судијата Франсоа Летексиер за активирање на протоколот за антирасизам. ФИФА и фудбалот покажуваа солидарност за сите жртви на расизам. Не за расизмот! Не за никаква форма на дискриминација“, порача Инфантино.

Инаку, претходно УЕФА потврди дека за случајот е отворена истрага и во наредниот период би можеле да бидат изречени соодветни казни.

Францускиот гигант Марсеј официјално го објави назначувањето на Хабиб Беј еза свој нов главен тренер. Тој го наследува Роберто Де Зерби.

48-годишниот специјалист, кој претходно го водеше Рен, потпиша договор со Олимпик Марсеј до 2027 година.

Хабиб Беј ее поранешен играч на Марсеј, играјќи на „Велодром“ помеѓу 2003 и 2007 година.

Марсеј моментално е на 4-то место на табелата во Лига 1 со 40 бода по 22 одиграни натпревари.

Главниот тренер на Арсенал, Микел Артета, го коментираше резултатот од 31-то коло од англиската Премиер лига против Вулверхемптон. Натпреварот заврши нерешено 2-2.

„Многу е тешко да се прифати. Во второто полувреме не игравме онака како што требаше, онака како што треба да играме за да добиеме натпревар од Премиер лигата. Подобро е да не судиме сега; сите се премногу емотивни во моментов. Треба да го прифатиме овој удар, го заслужуваме. Лесно е да се каже нешто во жештината на моментот што ќе му наштети на тимот. Секој го сака најдоброто. Но, мора да се помине и низ тешки времиња. Денес, ја плативме цената во последната минута. Треба да ги направиме основните работи многу подобро отколку што ги направивме. Треба да бидеме критични кон себе бидејќи не игравме доволно добро. Бевме неконзистентни во лигата во последните месеци“, изјави Артета за „Би-Би-Си“.

Тренерот на Бодо/Глимт, Кјетил Кнутсен, остана реален по победата од 3:1 над Интер во плејоф рундата од Лигата на шампионите, велејќи дека тимот сè уште има простор за подобрување.

„Мислам дека денес имавме малку среќа. Бевме исклучително ефикасни, но според нашите стандарди тоа беше просечна изведба. Резултатот е добар, но играта беше просечна“, рече Кнутсен.

Во врска со стратегијата за реваншот следната недела, специјалистот нагласи дека неговиот тим не треба да се затвори.

„Има многу работи на кои треба да се работи. Тоа ќе биде сосема поинаква игра. Не можеме само да се браниме длабоко во нашата половина и да се потпираме на контранапади. Исто така, мора да напаѓаме, да притискаме, да се браниме цврсто и да ги бараме нашите шанси. Дефинитивно нè очекува тежок натпревар“, реќе тренерот на Бодо/Глимт.

Кнутсен, исто така, упати пофалби за ѕвездата на вечерта, Каспер Хег, кој постигна гол и имаше две асистенции. „Тој постигна огромен напредок. Се снаоѓа одлично, вклучително и во одбраната. Може да ја задржи топката, победува во многу дуели и учествуваше во сите три гола. Тој е исто така прекрасна личност, па сè е совршено“, рече Кнутсен.

Во натпревар кој стана олицетворение на терминот „европски трилер“, Клуб Бриж и Атлетико Мадрид одиграа пулсирачки 3-3 на стадионот Јан Брејдел. Ова беше дуел со два потполно различни периоди, тактички надмудрувања и луд финиш кој го остава овој двомеч од нокаут-фазата во Лигата на шампионите потполно отворен.

Вечерта започна токму онака како што посакуваше Диего Симеоне. По само осум минути игра, „Јорганџиите“ поведоа откако Жоакин Сејс играше со рака во казнениот простор, што беше потврдено со ВАР-проверка. Хулијан Алварез ја презеде одговорноста и со ладнокрвна завршница го постигна својот петти гол во елитното натпреварување оваа сезона. Иако домаќините имаа поголем посед на топката и го примораа Јан Облак на неколку врвни интервенции, гостите зададоа тежок удар пред самиот крај на првиот дел. Во судиското продолжение, по корнерот на Гризман, јануарското засилување Адемола Лукман се најде на вистинското место за високи 0-2. Во тие моменти се чинеше дека белгискиот шампион е на колена.

Сепак, она што се случувало во соблекувалната на Бриж вроди со плод. Домаќините истрчаа на теренот во вториот дел со неверојатен интензитет кој го шокираше шпанскиот гигант. Во 51-та минута, Рафаел Ониедика, најдобриот поединец на средбата, најбрзо реагираше на една одбиена топка по ударот на Тресолди и ја намали негативата. Моментумот целосно се префрли на страната на Бриж. Само десетина минути подоцна, стадионот „еруптираше“: Николо Тресолди успеа да го пресретне центаршутот на Мамаду Диакон и да го матира Облак за израмнување. Тактичката дисциплина на Симеоне едноставно исчезна под притисокот на разиграните домаќини.

По еден несреќен сплет на околности, дефанзивецот на Бриж, Хоел Ордоњез, ја затресе сопствената мрежа во обид да го блокира центаршутот на Маркос Љоренте. Кога сите мислеа дека среќата му сврте грб на белгискиот тим, следеше последен одговор. Драмата го достигна врвот во 89-та минута: Ониедика со мајсторско додавање го пронајде Христос Цолис, кој ја задржа смиреноста и погоди во долниот агол за конечни 3-3. Ова беше историски резултат во негативна смисла за Атлетико: за првпат во историјата на Лигата на шампионите, тимот на Симеоне не победи во натпревар во кој имал предност од два гола.

Бразилската ѕвезда Фелипе Кутињо одамна не е на нивото од најславните денови, иако во изминатиот период и не беше толку лош во дресот на Васко де Гама, сепак сега се најавува негово заминување.

Според информациите од Бразил, Кутињо веќе имал разговор со стручниот штаб и донел одлука да го раскине договорот, што наводно ги затекнало челниците на клубот. Особено ако се знае дека управата подготвувала продолжување на соработката, бидејќи актуелниот договор му истекуваше во јуни.

Во клубот не очекувале ваков потег, но се шпекулира дека причината лежи во незадоволството од односот на навивачите. Свирежите од трибините на стадионот во Рио очигледно тешко му паднале на искусниот офанзивец, кој не сакал да продолжи во атмосфера што не ја чувствува како поддршка.

Каде би можел да продолжи засега не е познато. Кутињо зад себе има богата интернационална кариера во која настапуваше за Интер, Васко де Гама, Еспањол, Ливерпул, Барселона, Баерн Минхен, Астон вила и Ал Духаил.

По вчерашниот дебакл на Јувентус од Галатасарај со 5-2 во Истанбул вечерва италијанскиот фудбал доживеа нов удар, Интер беше поразен на гости кај Бодо со 3-1.

Не беа домаќините толку многу подобар противник од „нераѕурите“, меѓутоа знаеа да ги искористат своите шанси и заслужено ќе патуваат со предност на реваншот во Италија. Изненадувањето го најави Фет по 20 минути игра. Интер брзо се врати и со голот на Еспозито десет минути подоцна израмни на 1-1.

Во второто полувреме, Интер повеќе ја имаше топката во свој посед, меѓутоа тешко создаваше посериозна прилика за гол. Бодо од друга страна набрзина во три минути во 61. и 64. постигна два гола за 3-1 и победа.

Изненадување видовме во Белгија каде што Клуб Бриж се врати од од негатива од два гола и одигра 3-3. Тргнаа одлично гостите од Мадрид и преку Алварез и Лукман во првиот дел обезбедија 2-0. Домаќините во вториот дел прво преку Онедика намалија на 2-1 во 52. минута, а на истекот на еден час игра и израмнија со голот на Тресоиди.

Атлетико на десетина минтуи пред крајот со автоголот на Ордонез дојде и до 3-2, но ниту тоа не беше доволно за победа бидејќи Цолис во завршница стрелаше за 3-3.

Во преостанатиот натпревар, Баер Леверкузен немаше проблеми и славеше со 2-0 на гости кај Олимпијакос.