Антонио Конте и официјално е нов тренер на Тотенхем, потврдија од лондонскиот клуб преку соопштение на социјалните мрежи. 

Договорот на италијанскиот стратег е до летото 2023 година со опција за продолжување по истекот на истиот. Според информациите од Англија, Конте ќе заработува 15 милиони фунти годишно.

За Антонио Конте ова ќе биде враќање во Премиер лигата како тренер, бидејќи претходно го водеше тимот на Челзи со кого стана и шампион во сезоната 2016/17.

„Исклучително сум среќен што повторно се враќам во Премиер лигата во улога на тренер. Со нетрпение чекам да почнам со работа во Тотенхем и да ја пренесам на тимот и на навивачите мојата страст, менталитет и одлучност кои ги имав како играч а сега и како тренер“, изјави Конте за официјалната веб страна на клубот.

Кристијан Ериксен е блиску до враќање на теренот. Данскиот фудбалер кариерата може да ја продолжи во холандската лига каде ќе му биде дозволено да игра. Ајакс веќе покажа интерес за потписот на Ериксен, кој претходно настапуваше за клубот од Амстердам.

Мартин Скаутс, агент на Кристијан Ериксен, претходно ги коментираше гласините за можното заминување на играчот од клубот. Пред тоа на веб-страницата на Интер се појави порака според која Интер е подготвен да ги разгледа предлозите од клубовите од земјите каде на Ериксен ќе му биде дозволен влез на теренот.

По срцевиот удар, Ериксен доби кардиовертер-дефибрилатор. Но, во Италија има строги ограничувања за работа со такви уреди. Во овој поглед, Данецот не може да се натпреварува во Серија А.

Нуно Еспирито Санто ќе добие големо обештетување за отказот од Тотенхем. Спарси ќе му платат на португалскиот стручњак 14 милиони фунти (малку повеќе од 16,5 милиони евра) за предвремен раскин на договорот.

Според изворот, според условите на договорот, клубот можел бесплатно да се раздели со тренерот на крајот на сезоната, доколку Тотенхем не влезе во првите шест тима од англиската Премиер лига. Да потсетиме, позицијата на Нуно Еспирито Санто беше разнишана по поразот на тимот во натпреварот од 10. коло од англиската Премиер лига со Манчестер Јунајтед (0-3).

Претходно беше објавено дека сонародниците на Санто – тренерот на Порто, Серхио Консеисао и Пауло Фонсека, кој претходно ги предводеше Шахтјор и Рома, се сметаат за кандидати за тренер на Тотенхем, но подоцна Италијанецот Антонио Конте излезе како главен фаворит.

Поради повреда на мускулот која и натаму му задава проблеми, Лионел Меси нема да биде во тимот на Париз Сен Жермен во натпреварот од Лигата на шампионите против Ред Бул Лајпциг. Натпреварот е во рамките од 4.коло на ЛШ и се игра на „Ред Бул Арена“ во Лајпциг.

Со ова продолжува лошиот период за Меси кој поради повреда беше заменет и на полувремето од дерби натпреварот во француското првенство против екипата на Лил.

Серхио Агуеро на мечот со Алавес излезе од игра во првото полувреме поради проблеми со дишењето. Потоа во болница му беше дијагностицирана аритмија, а денес стана јасно колку време ќе биде надвор од терените.

Барселона денес преку официјално соопштение потврди дека Агуеро ќе паузира подолг период, конкретно три месеци. Аргентинецот ќе остане уште неколку дена во болница додека не се утврдат причините поради кои довело до аритмија.

Барселона веќе има доволно проблеми, па ова е дополнителен удар за Каталонците кои ќе бидат три месеци без искусниот голгетер.

Леонардо ги коментираше информациите според кои францускиот клуб ПСЖ може да го раскине договорот со дефанзивецот Серхио Рамос.

Шпанецот, кој пред стартот на оваа сезона дојде во ПСЖ, допрва треба да дебитира за новиот тим откако ја санираше повредата. Беше објавено дека раководството на ПСЖ е загрижено за физичката состојба на Рамос.

„Знаеме дека Рамос има повреда. Шпанскиот печат кој известува за можен раскин на договорот само шпекуллира. Сите знаевме дека има здравствени проблеми. Знаевме се“, изјави Леонардо за „Фудбал Еспања“. Серхио Рамос му се приклучи на ПСЖ во јули 2021 година.

Договорот на фудбалерот со клубот е до 2023 година. Дефанзивецот се пресели во новиот клуб како слободен играч.

Јувентус е сериозно заинтересиран да го доведе во својот тим фудбалерот на Барселона, Усман Дембеле. Според тврдењата на италијанскиот печат, Дембеле е исклучен од активностите во првиот тим на „Камп Ноу“ бидејќи продолжува негодува околу потпишувањето на новиот договор.

Францускиот напаѓач се опорави од повредата, но допрва треба да го одигра првиот натпревар оваа сезона за „каталонците“. Јуве сака да го ангажира Французинот со слободен трансфер следната година, а Барса, пак, веќе го забележа Кинглси Коман од Баерн како можна замена.

Поранешниот македонски фудбалски селектор Игор Ангеловски е во потесниот круг кандидати за нов тренер на хрватскиот прволигаш Хајдук, јавија денеска локалните медиуми.

Ангеловски, според весникот „Слободна Далмација“ со својата возраст и ентузијазам се вклопува во плановите на раководството на сплитскиот клуб за нов шеф на стручниот штаб, кој треба да го наследи Јенс Густафсон, кому денеска му беше врачен отказ.

Ангеловски е без ангажман од завршувањето на Европското првенство, на кое за првпат во историјата ја одведе македонската репрезентација.