Напаѓачот на Пари Сен Жермен, Нејмар , изрази желба да остане во францускиот клуб.

„Сакам да останам во ПСЖ. Никој од клубот не ми кажа ништо за плановите за мојата иднина. Не знам што сака клубот, но сакам да останам“, изјавил Нејмар.

Претходно беше објавено дека ПСЖ е подготвен да се раздели со Нејмар, бидејќи Бразилецот не е вклучен во плановите на новиот тренер на тимот, Кристоф Галтиер. Се пишуваше дека Нејмар го понудиле на Манчестер Сити, но „граѓаните“ ја одбиле понудата со образложение дека се задоволни од својата напаѓачка линија. Нејмар му се приклучи на ПСЖ во 2017 година со трансфер од Барселона од 222 милиони евра, што останува најскапиот трансфер во историјата на фудбалот.

На 144 натпревари за парискиот тим, напаѓачот постигна 100 гола и даде 60 асистенции. Договорот меѓу двете страни истекува во 2025 година.

Фудбалскиот селектор на Бразил, Тите, верува дека неколкуте млади репрезентативци ќе му помогнат на Нејмар да одигра добро на Светското првенство во Катар кон крајот на годинава.

Станува збор за Винисиус Жуниор и Родриго од Реал Мадрид, Рафиња од Барселона, новото засилување на Тотенхем Ричарлисон, сестраниот играч за врска на Њукасл, Бруно Гимараеш, крилниот напаѓач на Ајакс, Антони и Матеус Куња од Атлетико Мадрид.

Стратегот откри дека ќе го користи Нејмар во поцентрална улога што ќе им овозможи на помладите да играат многу послободно на нивните позиции.

Новото засилување на Реал Мадрид, Антонио Рудигер, иако е класичен централен стопер, доби улога да игра на позицијата лев бек на пријателскиот меч со Барселона.

Тренерот на „кралевите“, Карло Анчелоти, вели дека свесно го поставил Германецот да игра на страчната позиција и дека тоа нема да се менува.

„Не сум луд, тој е многу интелигентен, може да игра на таа позиција“. Алаба ќе игра лев бек само кога ќе биде потребно“, изјави Италијанецот.

Фудбалерот на Манчестер Сити и норвешки репрезентативец Ерлинг Халанд изјави дека е задоволен од своето деби во дресот на англискиот клуб во натпреварот против Барен Минхен.

Манчестер Сити на турнејата во САД го совлада Баерн Минхен со 1:0, а единствениот гол на натпреварот го постигна Халанд. 

„Задоволен сум, секогаш е добро кога постигнувам голови и кога можам да му помогнам на тимот во победата“, изјави Халанд после натпреварот.

Норвешкиот фудбалер уште истакна дека е свесен за големите очекувања од него во новата сезона, и дека е подготвен за почетокот на Премиер лигата.

Шпанскиот голман на Манчестер Јунајтед, Давид Де Хеа изјави дека му претставува голема чест што е дел од клубот од „Олд Трафорд“. Згора на тоа, тој наведува дека за него тоа е поважно од освојување трофеи.

„Секако дека сакаме да победуваме, но да се биде дел од овој клуб е повеќе од кој било трофеј.

Поминав многу време во клубот и тој стана мојот дом. Уживам во секој момент во Манчестер Јунајтед, дури и во лошите моменти. За мене е голема чест што сум дел од „црвените ѓаволи“, прокоментира Де Хеа.

Тренерот на Барселона Чави Ернандез беше воодушевен од победата на својот тим против вечниот ривал Реал Мадрид, на пријателскиот натпревар одигран во Лас Вегас.

Барселона го совлада Реал со резултат 1:0, а единствениот гол на натпреварот го постигна Бразилецот Рафиња кој ја засили екипата во овај трансфер период.

„Првото полувреме беше одлично, но второто малку покомплицирано. Додовме тука да победиме и успеавме во тоа. Имавме малку проблеми пред крајот на натпреварот, но сум задоволен од одиграното. Бевме подобар тим. За Барселона нема пријателски натпревари, бидејќи секогаш сакаме да победуваме, а посебно против Реал“, изјави Чави.

Новата сезона во Ла Лига стартува на 13.август. Барселона во првото коло на свој терен ќе игра со екипата на Рајо Ваљекано.

Тренерот на Реал Мадрид, Карло Анчелоти го коментираше настапот на тимот на пријателскиот натпревар со Барселона.

„Добар натпревар. Се обидов да користам нови играчи за да се прилагодам на стилот на тимот. Игравме рамноправно. Сакам да играм натпревари со силни противници. Отпрвин делувавме како во втор план, моравме малку да трпиме. Очигледно, кога ќе ги внесете Каземиро, Крос и Модриќ, станува полесно, но јас сакав да ги вклучам младите. Бев задоволен од играта на тимот во одбраната. Составот на Реал Мадрид е голем, имаме многу играчи. Овој состав е подобар од минатата сезона. Го зголемивме интензитетот на тренинзите. Продолжуваме да работиме“, изјави Карло Анчелоти за „Марка“ .

Да потсетиме дека средбата помеѓу Барселона и Реал Мадрид се одигра во Лас Вегас и заврши со победа на каталонскиот тим со резултат 1-0.

Напаѓачот на Манчестер Сити, Ерлинг Холанд, призна дека се уште не е во топ форма по деби голот во победата од 1-0 над Баерн во контролниот натпревар одигран синоќа.

„Беше одлично да се игра против Баерн и да се види во каква состојба сум пред натпреварот против Ливерпул следната недела. Да бидам искрен, се уште не сум во идеална форма, но тоа ќе се случи. Не сум загрижен за тоа. Се чувствувам добро во целина. Беше убаво што се вратив во игра по шест недели без фудбал. Добро е чувството“, изјави Халанд по мечот со Баварците.

Поради тропските горештини кои ја зафатија Европа, стартот на Серија А може да биде одложен, најави претседателот на елитниот ранг на италијанскиот фудбал, Лоренцо Касини.

„Првата грижа е климата. Доколку продолжат овие високи температури, ќе биде многу тешко да се започне сезоната според планираното на 13 август. Сигурно ќе биде сезона со аномалии поради зимската пауза за време на Светското првенство во Катар и тажно е што нема да учествуваме таму. Сепак, тоа е предупредување да вложуваме повеќе во нашите млади играчи“, изјави Касини за време на обиколката на стадионот на Удинезе, пренесуваат бројни италијански медиуми.

Милан ја брани титулата шампион на Италија, а заедно со Росонерите, Италија во Лигата на шампионите ќе ја претставуваат Интер, Наполи и Јувентус.