Бившиот бразилски фудбалер Кака ќе има свое деби на тркачкиот маратон во Берлин.

40-годишниот Бразилец кој имаше успешна кариера во Реал Мадрид и Милан, истакнува дека мотив за трката му дала борбата на неговиот татко со корона вирусот  кој поминал во болница 45 дена и за среќа успешно се опоравил.

Освојувачот на златниот медал од Светското првенство во 2002 година вели дека маратоните се посебни бидејќи на нив можат да се натпреваруваат заедно и аматери и професионалци.

УЕФА се откажува од идејата за европско првенство со 32 тима наместо досегашните 24. Ваквата опција се појави во последниве месеци, каде се зборуваше дека постои шанса на ЕП 2028 да се зголеми бројот на учесници. Сепак, последните информации тврдат дека оваа идеја ќе биде укината, тврди „Тајмс“.

Последен пат бројот на учесници на ЕП беше зголемен во 2016 година, кога од 16 се искачија на 24 селекции. Сега имаше шанса уште повеќе да се зголемат на 32 репрезентации. Сепак, излегува дека ТВ станиците во Европа се спротивставиле на оваа идеја и тоа е причината поради која таа беше откажана.

Доколку се прифати новата идеја, тоа ќе значи дека повеќе од половина од 55-те квалификации ќе се пласираат на завршницата на ЕП. Во оваа ситуација, сепак, турнирот сигурно ќе го загуби квалиетот и ќе има премногу тимови кои ќе бидат неконкурентни.

Maкедонската фудбалска репрезентација денес од 18:00 часот го игра натпреварот против Грузија во рамките од Лигата на Нации, а додека сме во исчекување на таа средба пристигна информација за натпреварот со Бугарија в понделеник.

Бугарија и гостува на Македонија во последното коло од Лигата на Нации, ако сакаме да се бориме за првото место потребни ни се две победи. УЕФА денес го одреди судијата за натпреварот во Скопје, а тоа ќе биде Австриецот Јулијан Вајнбергер.

На Вајнбергер ќе му помагаат Максимилијан Колбиш, Михаел Обрицергер и Александар Харкам сите од Австрија.

Поранешниот долгогодишен тренер на Арсенал, Арсен Венгер, верува дека клубот од Лондон оваа сезона има реални шанси да стигне до титулата во Премиер лигата.

Венгер во изјава за Скај Спортс вели дека шансата ја гледа бидејќи не гледа друг тим кој е супер доминантен во моментов, и дека ова е совршена можност за Арсенал и тренерот Артета да се вмешаат во битката за титулата.

Венгер беше последниот тренер кој го предводеше Арсенал до шампионската титула во Премиер лигата во сезоната 2003/04 година, со тимот на славните „непобедливи“.

Англиската фудбалска федерација го обвини играчот на Манчестер Јунајтед, Кристијано Роналдо, за непристојно и агресивно однесување после натпреварот од Премиер лигата против Евертон одигран на 9.април минатата сезона.

По завршувањето на натпреварот Португалецот на еден од навивачите на Евертон му го скрши телефонот замавнувајќи кон него со раката. Подоцна се дозна дека се работи за 14-годишно момче со аутизам. 

Роналдо подоцна се извини за инцидентот, меѓутоа фудбалска федерација на Англија дури сега одлучи да отвори официјална истрага околу случајот и да покрене обвинение против фудбалерот.

Медиумите во Шпанија ја пренесуваат веста дека фудбалерот на Реал Сосиедад Давид Силва е казнет со 1080 евра поради напад на жена за време на карневал одржан на Канарските Острови.

Инцидентот се случил на 19.јули во летовалиштето Маспаломас, а во него учествувале и братот на Силва и уште една личност, а жената претрпела повреда на вратот и раката.

Искусниот Давид Силва во кариерата го има носено дресот на Валенсија, Еибар, Селта, Манчестер Сити, а од 2020 година е фудбалер на Реал Сосиедад.

Дефанзивецот на Јувентус, Глејсон Бремер, доби дозвола од раководството на клубот да се приклучи во таборот на репрезентацијата на Бразил.

Централниот дефанзивец има лесна повреда, но и покрај тоа клубот од Торино реши да не му ја одземе можноста за првпат во кариерата да биде дел од селекцијата на Бразил. Тоа е прва покана за Бремер, кој ќе има шанса да дебитира во дресот на Бразил на било кој од претстојните тестови против Гана на 23 септември или против Тунис на 27 септември, во зависност од неговото здравје и одлуката на селекторот Тите.

Меѓу другото, оваа прозивка е исклучително вредна за Бремер бидејќи доаѓа на помалку од два месеци пред Светското првенство во Катар. Така, 25-годишниот дефанзивец може да се надева дека ќе биде меѓу избраниците на Тите за СП во Катар на крајот на годината.

Фудбалскиот клуб Манчестер Јунајтед соопшти дека во минатата сезона оствари нето загуба од 115,5 милиони фунти, иако приходите биле зголемени за 18 одсто, односно 583,2 милиони фунти.

Финансискиот извештај покажува дека загубата во однос на минатата година е зголемена за 23,3 милиони фунти.

Клупскиот долг исто така пораснал од 419,5 милиони фунти за минатата година до 514,9 милиони фунти оваа година. Платите за играчите во клубот изнесувале рекордни 384,2 милиони фунти што претставува највисок износ во историјата на Премиер лигата. Претходниот рекорд го држеше Манчестер Сити кој на играчите им исплатил 355 милиони фунти.

Сити Фудбал Груп, кој е сопственик на Манчестер Сити, ќе го купи бразилскиот клуб Баија, објави новинарот Цезар Луис Мерло на своите социјални мрежи.

Информациите кои се објавени велат дека сопствениците на англискиот клуб веќе се договориле за зделка. Договорот ќе биде официјализиран за неколку дена. Баија ќе стане 12-та екипа во холдингот, во кој веќе се Манчестер Сити, Џирона (Шпанија), Палермо (Италија), Ломел (Белгија), Њујорк Сити (САД), Мелбурн Сити (Австралија), Монтевидео Сити (Уругвај), Јокохама Ф. Маринос (Јапонија), Троа (Франција), Сити Мумбаи (Индија) и Сечуан Јун (Кина).

Баија моментално игра во втората бразилска дивизија и е втора на табелата со амбиции да се пласира во првата лига на Бразил.

Примарна цел на Манчестер Јунајтед во зимскиот преоден рок ќе биде доведување на врвен напаѓач, а најновот име на списокот е Тами Абрахам.

Aнглискиот напаѓач Тами направи вистински потег со трансферот во Рома каде се промовираше во еден од најдобрите млади напаѓачи во Европа. Минатата сезона  Абрахам во дресот на Рома постигна 24 гола и 5 асистенции во сите натпреварувања и со тоа веднаш го привлече интересот на бројни клубови. 

Најсилен интерес за Абрахам покажува Манчестер Јунајтед, бидејќи приоритет на Тен Хаг е доведување на централен напаѓач.

Јасно е дека Рома нема лесно да се ослободи од својата ѕвезда, но Јунајтед е спремен да понуди 80 милиони фунти.