Фудбалерот на Милан, Златан Ибрахимовиќ го оперирал левото колено во Лион, поради што ќе паузира до осум месеци, соопшти денеска италијанскиот клуб.

Во соопштението се наведува дека шведскиот фудбалер бил подложен на артроскопска операција на левото колено.

„Операцијата е планирана веќе некое време со цел Ибрахимовиќ да ја реши нестабилноста поради претходна операција на предните вкрстени лигаменти. Закрепнувањето ќе трае меѓу седум и осум месеци“, се вели во соопштението на Милан.

Четириесетгодишниот фудбалер има договор со италијанскиот клуб до крајот на јуни, а сезонава за Милан одигра 23 натпревари и постигна осум гола. Останува да се види дали Швеѓанецот ќе продолжи да игра по опоравувањето или ќе ја заврши кариерата и ќе прифати една од функциите во миланскиот клуб.

Поранешниот фудбалер на Манчестер Сити, Винсент Компани, реши да ја напушти тренерската позиција во Андерлехт на која беше во изминативе три години.

Медиумите ширум Европа објавуваат дека Компани е многу блиску до враќање во Англија, но овој пат како тренер на Барнли. Ако се оствари оваа вест тогаш задача на стручњакот од Белгија ќе биде враќање на клубот во Премиер лигата после отпаѓањето оваа сезона.

Сопствениците на Тотенхем планираат да инвестираат 150 милиони фунти во нови играчи ова лето.

„Ова е поголема финансиска флексибилност и можност да се продолжи со инвестирање на теренотот и надвор од него“, соопштија од клубот од северен Лондон.

За првпат Спарс имаат можност да соберат сериозни дивиденди од нивниот нов стадион, кој беше користен со полн капацитет во текот на целата сезона.

Тотенхем стигна до финалето на Лигата на шампионите во 2019 година. Сега лондончани повторно ќе имаат можност да учествуваат на најпрестижниот клупски турнир во светот, откако завршија како четврти во англиското првенство.

Томас Тухел ќе може да потроши 200 милиони фунти на трансфери ова лето, објави „Телеграф“.

Конзорциумот, предводен од Тод Боли, косопственик на Лос Анџелес Доџерс, кој е исклучително блиску до официјалното купување на лондонскиот клуб, е подготвен да ја даде оваа сума за да го засили составот.

Приоритет на лондончани во текот на летниот преоден рок е засилување на одбраната по очекуваното заминување на Антонио Рудигер, Андреас Кристенсен и Цезар Аспиликуета.

Главните дефанзивци назначени од клубот се Жил Кунде од Севиља и Јошко Гвардиол од РБ Лајпциг.

Тренерот на Рома Жозе Мурињо беше пресреќен после минималната победа од 1:0 на неговиот тим во финалето од Лигата на Конференции против Фејенорд.

Освен тоа што Рома го освои првиот трофеј организиран од УЕФА, Мурињо стана и првиот тренер кој освоил трофеј во трите активни европски натпреварувања.

„Од првиот ден верувавме дека можеме да го освоиме трофејот во ова натпреварување. Испишавме историја. Она што можам да го кажам е дека се чувствувам како прав Романиста, изјави Мурињо.

После неуспехот со трансферот на Мбапе, Реал Мадрид спремаат висока понуда за уште една фудбалска звезда.

Газета дело Спорт пренесува дека од „Кралскиот клуб“ подготвуваат понуда од 120 милиони евра за доведување на фудбалерот на Милан, Рафаел Леао.

Леао оваа сезона беше право изненадување во Серија А, а неговите одлични настапи во Милан му ја донесоа наградата за најкорисен играч во лигата.

Освен Реал Мадрид, португалскиот крилен напаѓач е интересен и за Ливерпул каде уште е нејасна ситуацијата со новите договори на Салах и Мане.

Откако претходно владата на Велика Британија даде одобрение за продажба на Челзи, сега зелено светло за продажба даде и Премиер лигата.

Во соопштението од лигата се наведува дека конзорциумот кој го предводи Тод Боели ги пројде сите проверки околу сопствеништвото и идниот директор. Сега останува само владата да даде соодветна лиценца за продажба и конечниот договор ќе може да се склучи.

Според претходните податоци, вкупната сума од продажбата на Челзи ќе достигне 4,25 милијарди фунти.

Двајца играчи на Атлетико Мадрид, дефанзивецот Ренан Лоди и крилниот напаѓач Јаник Фереира Караско , предизвикаа интерес за трансфер од англискиот Њукасл, објави „Марка“.

Според изворот, англискиот клуб има намера да понуди 40 милиони евра за бразилскиот дефанзивец. Истот така за услугите на Ренан Лоди е заинтересиран и Јувентус од Торино.

Тренерот на Атлетико Мадрид, Диего Симеоне е против Фереира Караско да си замине од клубот. Белгиецот изјави дека има намера да остане во мадридскиот клуб, но се дознава дека неговиот нов агент бара клуб за неговиот клиент каде што ќе може да добие поголема плата. Ренан Лоди оваа сезона одигра 42 натпревари за Атлетико во сите натпреварувања, постигнувајќи 4 гола и 5 асистенции. Јаник Фереира Караско има 44 настапи за Атлетико оваа сезона, постигнувајќи 6 гола и 7 асистенции.

Реал Мадрид постигнал договор со францускиот репрезентативец, Орелиан Чаумени, пренесуваат шпанските медиуми.

Чуамени минатата сезона се наметна во тимот на Монако, а оваа сезона игра одлично и веќе е стандарден во француската репрезентација.

Откако ја загубија битката за Мбапе, „кралевите“ сега ќе се насочат кон друг Французин и сакаат што побрзо да го договорат трансферот. За Чуамени интерес покажуваат Ливерпул и Челзи, но Реал ја победил конкуренцијата и веќе постигнал договор со Французинот.