feature

Федерер загуби околу 200 милиони долари со повредата

Роџер Федерер загуби најмалку 200 милиони долари, објави швајцарски „Bluewin“. Федерер е акционер на компанијата „Оn“, која се занимава со производство на спортски чевли.

Се шпекулира дека тој поседува три отсто од споменатата компанија, а кога вложил пари во компанијата, цената на една акција била 38,95 долари.

Војната во Украина, пандемијата на коронавирус и други фактори предизвикаа пад на цената на акцијата на 17,37 долари, што му донесе огромна загуба на Федерер.

„Треба да се нагласи дека берзата е непредвидлива и дека со скок на акциите за краток временски период, Федерер би можел да го надомести сето тоа, па дури и да заработи уште побрзо“, пишува „Switzerland Times“.

Нејмар сака да остане во Париз Сен Жермен

Фудбалерот на Париз Сен Жермен, Нејмар, изјави дека сака да игра за тој клуб и оваа сезона, и покрај шпекулациите дека ќе го напушта Париз.
„Секогаш сум сакал да останам во клубот. Досега никој од клубот не ми соопштил какви планови има за мене“, потенцира Нејмар.

Тимот на ПСЖ во моментов се наоѓа на турнеја во Јапонија, а Нејмар беше дел од екипата која одигра пријателски натпревар со Урава Ред Дајмондс.

Бразилецот Нејмар во ПСЖ пристигна од Барселона во 2017 година, во трансфер вреден 222 милиони евра. Тој минатата сезона одигра 28 натпревари, постигна 13 гола и забележа осум асистенции.

Фетел негира трансфер во Мекларен

Четирикратниот светски шампион Себастијан Фетел ја потврди својата желба да остане во Формула 1 по крајот на тековната сезона, но ги отфрли сугестиите дека би можел да го заземе местото на Даниел Рикиардо во Мекларен.

Договорот на 35-годишниот Германец со Астон Мартин истекува на крајот на 2022 година, а од тимот објавија дека започнале преговори со него и неколку пати изјавија дека сакаат тој да остане со нив.

Веќе преговараме, мислам дека постои јасна намера да продолжиме заедно и наскоро ќе видиме точно каде се нашите позиции“, објасни Фетел на „Пол Рикар“.

Засега немаше индикации дека Фетел бара место во друг тим, но последните денови се шпекулира дека тој би можел да заврши во Мекларен.

„Видете, познавам некои луѓе во Мекларен, но мислам дека тоа се само гласини“, прокоментира Фетел.

Нагелсман: Кејн е прескап за Баерн

Тренерот на Баерн Минхен, Јулијан Нагелсман, изјави дека напаѓачот на Тотенхем Хари Кејн е прескапа опција за Баварците.

Тимот од Минхен е во потрага по класичен напаѓач кој би го заменил Роберт Левандовски кој се пресели во Барселона.

„Кејн е извонреден играч, и еден од ретките кои можат да играат на позиција десетка или класичен центарфор. Има одличен удар со глава, и со двете нозе. Единствен проблем е што тој во моментов е прескап за Баерн“, изјави Нагелсман.

Хари Кејн за Тотенхем има одиграно 385 натпревари на кои постигна 247 гола и запиша 59 асистенции.

Милитао во Реал до 2028 година

Дефанзивецот на Реал Мадрид, Едер Милитао, ќе го продолжи договорот со кралскиот клуб, објавува весникот Марка.

Со новиот договор, Бразилецот ќе ја зголеми платата од 4 на 7 милиони евра годишно. Според информациите на Марка, шпанскиот шампион во договорот ќе вметне и откупна клаузула од дури 500 милиони евра.

Милитао е член на Реал од 2019 година кога за сума од 50 милиони евра пристигна од Порто. За тимот од Мадрид има одиграно 91 натпревар и е стрелец на 4 гола.

Иниго Мартинез е фаворит за дефанзивен лидер на Барса

Барселона е во потрага по квалитетен дефанзивец, а прва желба на Каталонците е Жил Кунде од Севиља.

Меѓутоа, Французинот е блиску до трансфер во Челзи за 55 милиони фунти, па Барселона мора да разгледува алтернативи. Кунде преферира трансфер на „Камп Ноу“, но Барселона не може да се договори со Севиља и да ја израмни понудата на Челзи.

Резервна опција на Каталонците е дефанзивецот на Манчестер Сити и шпански репрезнетативец, Емерик Лапорт.

28-годишниот дефанзивец не е прва опција кај Пеп Гвардиола и сака да ја промени средината, а Чави смета дека ќе биде идеална замена за Пике.

Вест Хем пред потпис со Скамака

Англискиот клуб Вест Хем се договори со калчолигашот Сасуоло околу купувување на италијанскиот репрезентативец Џанлука Скамака.

Целиот трансфер се очекува да достигне сума од 36 милиони евра плус дополнителни бонуси кои ќе зависат од настапите на напаѓачот во неговиот нов клуб Вест Хем.

Интерес за италијанскиот фудбалер покажуваше и францускиот шампион ПСЖ, меѓутоа најповолна финансиска понуда испрати премиерлигашот од Лондон.

Томовски останува голман на Вардар

Голманот на македонската ракометна репрезентација, Мартин Томовски, одлучи и во наредната сезона да остане во РК Вардар 1961.

Томовски е член на Вардар од минатата година и беше еден од најзаслужните поединци во тимот кој успеа да ја освои дуплата круна во македонскиот ракомет.

Иако се очекуваше Томовски да го напушти скопскиот клуб со оглед на казната од ЕХФ со која му се забрани на Вардар да настапува во Лигата на шампиони, сепак тој одлучи да остане во црвено-црниот дрес и во следната сезона.

Адетокунбо ќе игра за Грција на претстојното Европско првенство

Претседателот на грчкиот кошаркарски сојуз соопшти дека играчот на Милвоки, Јанис Адетокунбо ќе настапи за репрезентацијата на Грција на Европското првенство.

27-годишниот крилен центар во 2019 и 2020 година беше прогласен за најкорисен играч во регуларниот дел од НБА лигата.

Минатата година со Милвоки беше шампион на НБА и беше прогласен за МВП во финалната серија.

Грција на ЕП ќе игра во групата Ц заедно со селекциите на Естонија, Украина, Велика Британија, Италија и Хрватска.

Европското првенство ќе се одржува од 1. до 18. септември, во четири држави.

Интер го натера Лукаку на медитеранска диета

Фудбалскиот клуб Интер му наложи на својот напаѓач Ромело Лукаку да започне нов режим на исхрана и да применува медитеранска диета, за да се врати на пристојна килажа.

Белгискиот голгетер се врати во Милано на позајмица од Челзи каде настапуваше една сезона. Пред заминувањето во Лондон тој имал 101 килограм, а сега неговата килажа била значително поголема.

На Лукаку му е наложено во наредниот период да конзумира риба, салати, пилешко и ширатаки паста, а забрането му е да јаде компир, пржена храна, и не смее да пие пијалоци кои содржат шеќер и алкохол.

Лукаку во претстојната сезона за Интер ќе игра како позајмен играч на Челзи.

«< 1345 1346 1347 1348 1349 >»