Германски Шалке се обидува да го доведе 37-годишниот напаѓач на Ајакс, Клас Јан Хунтелар, кој за овој клуб настапуваше од 2010. до 2017. година. Хунтелар најави повлекување од фудбалот на крајот на оваа сезона, но на Шалке секако му е потребен до крајот на сезоната, со цел да изборат опстанок во Бундеслигата. Шалке во моментот е на претпоследното место на табелата и има четири бода помалку од Келн кој е на 16. место, а има шест бода помалку од Билефелд кои се 15. Овој клуб беше во голема резултатска криза до минатиот викенд, кога ја забележа првата победа по 30 натпревари. На тој натпревар, каптенската трака ја носеше Сеад Колашинац, кој се врати во клубот по настапите за Арсенал. Шалке по успешното враќање на Колашинац се одлучи да тргне и по Хунтелар, кој во текот на седумте сезони поминати во Гелзенкирхен стана вистинска клупска легенда одигрувајќи 240 натпревари во кои постигна 126 погодоци и подели 35 асистенции.

Капитенот на ФК Вардар и повремен репрезентативец на Македонија, Дарко Мицевски беше претставен како нов играч на ФК Рига од Латвија. Мицевски се одлучи да ја прифати понудата од главниот град на таа земја, па Рига ќе биде шестиот клуб во неговата кариера. Мицевски беше дел од црвено-црните од јуни 2018. година, но поради финансиските проблеми со кои се соочува клубот, тој е уште еден на листата играчи кои го напуштија актуелниот првак на Македонија.

Лидерот во шпанската лига, Атлетико Мадрид ја заврши потрагата по фудбалер за навалната линија, ангажирајќи го Муса Дембеле од француски Лион.
Дембеле во дресот на „јорганџиите“ до крајот на сезоната ќе настапува како позајмен фудбалер, а потоа, шпанците ќе го откупат во трансфер вреден 35 милиони евра.
Дембеле на „Ванда Метрополитано“ стадионот ќе го замени Диего Коста, кој си замина од клубот.
Лион празнината на Дембеле ја пополни со доведување на Слимани од англискиот премиерлигаш Лестер.

Игор Ангеловски и ФФМ си подадоа рака за продолжување на соработката, промени по однос на селекторот нема, сега останува играчите да ја подигнат формата, да останат здрави и желни за голем успех.
„Благодарност до претседателот на федерацијата и Управниот одбор за довербата. Не се сомневам дека репрезентацијата, како и досега, ќе ги има најдобрите услови за работа.
Ќе го вложам сиот свој потенцијал да возвратиме со добри игри и да ја продолжиме успешната резултатска низа. Како што ветив и пред јавноста, сѐ она што ми беше понудено во форма на договор го прифатив, а националниот го ставив пред личниот интерес. Благодарност до капитенот, фудбалерите од репрезентацијата и јавноста за поддршката.
Верувам дека сите заедно и сложно повторно ќе се радуваме на големи победи, а овој пат ќе славиме сите заедно низ улиците на нашиот град и нашата држава“, изјави селекторот на македонската репрезентација, Игор Ангеловски.
На Европското првенство нашата селекција ќе дебитира со Австрија, а потоа ќе се сретне со Украина и Холандија.

Многу љубители на фудбалот се заљубени во играњето ФИФА, но само ретки се подготвени во тоа да вложат колку еден тинејџер од Англија. Гејмерот познат како „Гетсби“ ја откри својата совршена опрема за најпопуларната фудбалска видеоигра, за која плати дури шест и пол илјади долари!
Главниот дел од таа опрема го сочинува огромниот монитор, кој му овозможува да го гледа целиот терен додека игра.
„Студирам ИТ и затоа ми треба добра опрема, но на купувањето се одлучив поради тоа што обожавам видеоигри. Кога играм ФИФА, за разлика од противникот, можам да го видам целиот терен. Тоа ми овозможува да испраќам долги топки кои тој не ги очекува, а и во секој момент можем да видам како ми е составена одбраната.“ – вели тој.
Екранот го чинел околу илјада и петстотини долари, а остатокот од опремата се состои од врвна графичка картичка, други компјутерски компоненти како и посебна столица. За сета оваа напредна опрема, тој вложил преку шест и пол илјади долари.

Емполи со официјално соопштение реагираше на одлуката на здравствената комисија да ги стави во карантин тројцата играчи Леонардо Манкузо, Роберто Пирело и Симон Журковски поради наводни позитивни тестови на КОВИД-19.
Наполи го победи Емполи во Купот на Италија со 3:2, но гостинскиот клуб информираше дека Леонардо Манкузо, Роберто Пирело и Симон Журковски имале негативни тестови.
Емполи сега ќе поднесе жалба и се надева дека натпреварот со Наполи можеби ќе се преигра, слично беше пред мечот Јувентус-Наполи во Торино, екипата на Елмас не допатува на средбата, првично беше регистрирана со службен резултат за „старата дама“, а потоа се поништи одлуката и натпреварот дополнително ќе се одигра.

Според пишувањата на бројни италијански медиуми, Милан е во преговори со Марио Манџукиќ. Хрватскиот напаѓач веќе подолго време бара клуб во кој би се вратил во Европа, а Милан се чини како добра опција.
Наводно, Малдини веќе го договорил доаѓањето на Манџукиќ, а хрватскиот интернационалец ќе потпише договор до крајот на сезоната вреден 2 милиони евра, со можност истиот да биде продолжен на уште една сезона.
Исто така, медиумите во Италија јавуваат дека Милан договори уште едно засилување, во името на Суалихо Меите, играчот за врска на Торино, кој во Милано ќе пристигне како позајмен играч со опција клубот да го задржи, доколку се истакне во пролетниот дел од сезоната.